تورەگەلدى شارمانوۆ. كەلەشەككە قالار قازىنا

تاۋەلسىزدىك تاڭى – ەجەلگى باتىرلارىمىزدىڭ, الاشىمىزدىڭ ارىستارىنىڭ جاۋكەشتى زامانداردا, قانتوگىس شايقاستاردا قاسىقتاي قانىن قيىپ, سان عاسىرلار بويى  ءتۇرلى جاۋمەن ارپالىس­تا ساقتاپ قالعان كەڭ دالاسىندا بۇگىنگى كۇندە ءومىر ءسۇرىپ وتىرعان ۇرپاقتىڭ ماڭدايىنا بىتكەن باقىتى. تاۋەلسىز قازاقستاننىڭ الەم كارتاسىندا شەكاراسى ايقىندالىپ, كوك بايراعى جەلبىرەپ, ءاردايىم بىتىمگەرلىككە باستايتىن بەيبىت ءۇنىنىڭ جارقىن شىعۋىنا بۇگىندە شيرەك عاسىر ۋاقىت تولىپ وتىر. ەلىمىز وسى كەزەڭ بارىسىندا وراسان قيىن جولداردان ءوتتى. ەكونوميكاسى مەن ساياساتىن جاڭادان قۇرۋعا, ءبىلىمى مەن مادەنيەتىن جاڭعىرتۋعا, جالپى ءومىرىن قايتا قۇرۋىنا  تۋرا كەلدى. بۇل بەيبىت ومىردە بولعان سۇراپىل شايقاستارداي ەدى. تاۋەلسىزدىك تاڭىنىڭ اتۋىن دا زور ءرول اتقارعان  ەلىمىزدىڭ تاريحي ەرەن تۇلعاسى – ەلباسىمىزدىڭ  وسى جىلدار بويى ۇستانعان سىندارلى ساياساتىنىڭ, حالقىمىزدىڭ ماڭداي تەرىن توگىپ ەتكەن قاجىماس ەڭبەگىنىڭ ارقاسىندا ەلىمىز سىن-وتكەلدەردەن سۇرىنبەي ءوتىپ, قازىر وركەنيەت كوشىمەن ىلەسە دامىپ, الەمدەگى الدىڭعى قاتارداعى 30 ەلدىڭ قاتارىنا ۇمتىلۋى – وتكەن شيرەك عاسىرداعى تاماشا جەتىستىگىمىز. قازاق ەلى ۇلى دالامىزدى مەكەندەگەن كوشپەندى حالىقتىڭ لايىقتى ۇرپاعى بولىپ وتىر. ەلباسىمىز تەڭدەسسىز «ماڭگىلىك ەل» يدەياسىن تۇجىرىمداۋمەن قاتار ەلىمىزدى « ۇلى دالا ەلى» دەپ اتاۋدى ۇسىندى. بيىل تاۋەلسىزدىگىمىزگە شيرەك عاسىر تولۋى قارساڭىندا ەلباسى ءوزىنىڭ « ۇلى دالا ۇلاعاتتارى» اتتى ەڭبەگىن جارىققا شىعاردى. بۇل الدىمەن, جاس ۇرپاق ءۇشىن جازىلعان, سەبەبى, ءار جولىنىڭ ءمانى مەن تاربيەسىنىڭ ماڭىزى زور. تاريح قويناۋىنا شەككەن شىنايى ساپار سەكىلدى, وتكەندى زەردەلەپ, بۇگىننىڭ وزەكتى سۇراقتارىنا جاۋاپ قاتۋمەن قاتار ءتۇرلى تىعىرىقتان شىعاتىن ناقتى امال-تاسىلدەر ۇسىناتىن, سونىمەن قاتار, بولاشاققا ارنالعان باتىل ارماندارعا دا قول سوزدىراتىن تەرەڭ ويدىڭ جەمىسى. تۋىندىدا تاۋەلسىزدىك تاعدىرى, ەل مەن جەر, ءتىل مەن ءدىن, قانداستارىمىزدىڭ ەلگە ورالۋى, ساياسات تۇعىرى سەكىلدى كۇردەلى, زاماناۋي وزەكتى تاقىرىپتار قوزعالادى. «وتباسى – وتان تىرەگى» دەپ ەلباسى وتباسى ماسەلەسىن ەرەكشە اتاپ, ارنايى ءبولىم ارناعانى ءۇشىن العىس ايتامىن. ەڭبەكتىڭ, اسىرەسە, ەل بولاشاعى – جاستاردىڭ ساناسىن بيىكتەتىپ, ورەسىن كەڭەيتىپ, جان-جاقتى بىلىممەن سۋسىنداتۋ جولىندا اقىلشى قۇرال بولاتىندىعى ءسوزسىز.