استانادا بەنزين تاپشىلىعى نەدەن بولدى؟

قازاقستاننىڭ ەنەرگەتيكا ءمينيسترى قانات بوزىمباەۆ وتكەن دەمالىس كۇندەرى بەنزين باعاسىنىڭ قىمباتتاۋى بويىنشا تۇسىنىكتەمە بەردى. «بىرىنشىدەن, سەنبى كۇنى مەن دە الەۋمەتتىك جەلىلەر ارقىلى «قازمۇنايگاز»-دىڭ جانار-جاعار ماي ستانسالارىندا بەنزيننىڭ تالونمەن ساتىلىپ جاتقانىن ءبىلدىم. كەشە عانا ءوزىم سول ستانسالاردى ارالاپ شىقتىم. جاعداي تۇزەلدى. نەگىزگى سەبەپ - قاتتى ايازدا بەنزينگە دەگەن سۇرانىس ەكى جارىم ەسەگە وسكەن. سوندىقتان قازمۇنايگازدا تاپشىلىق تۋىنداعان. نەگىزى, اتالعان ستانسالاردا كۇندە 100 توننا بەنزين ساتىلادى. ال وتكەن سەنبى سۇرانىس كۇرت ءوسىپ, 220 تونناعا جەتكەن», - دەپ اتاپ كورسەتتى ق.بوزىمباەۆ. ءمينيستردىڭ سوزىنە قاراعاندا, قازىرگى كەزدە استانادا قاجەتتى جانار-جاعار مايدىڭ كولەمى بار. «قازىرگى كەزدە سول بەنزيندى رەسەيدەن الىپ, مىنا جاقتا ساتاتىن بولساق, ءبىر ءليتردىڭ باعاسى 140 تەڭگە بولۋى كەرەك. بىراق بىزدە ءوزىمىزدىڭ بەنزينىمىز بار. ەكەۋىن قوسقاندا ءادىل باعا 135-140 تەڭگە اينالاسىندا بولادى. سوندىقتان قاراشا ايىندا 92 ماركالى بەنزيننىڭ باعاسى 130 تەڭگە بولۋى ءتيىس. ەگەر 170 بولسا, 200, مۇمكىن 300 بولسا دا, ءبىز تەز ارادا تابيعي مونوپوليالاردى رەتتەۋ جانە باسەكەلەستىكتى قورعاۋ كوميتەتىمەن تەكسەرىس وتكىزىپ, ورنىنا قوياتىن شىعارمىز», - دەدى مينيستر.