بۇگىن استاناداعى وقۋشىلار سارايىندا تاۋەلسىزدىكتىڭ 25 جىلدىعى مەن بۇۇ بالالار قورىنىڭ (يۋنيسەف) 70 جىلدىعىنا وراي, دۇنيەجۇزىلىك بالالار كۇنىن مەرەكەلەۋ اياسىندا «بالاعا مەيىرىمدى قازاقستان» تاقىرىبىندا حالىقارالىق كونفەرەنتسياسىنىڭ اشىلۋ سالتاناتى ءوتتى. بۇل ءىس-شارا قازاقستان پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ, قازاقستان پارلامەنتى ءماجىلىسىنىڭ, قازاقستانداعى بالالار قۇقىعى بويىنشا ۋاكىلى جانە ەلىمىزدەگى بۇۇ بالالار قورىنىڭ (يۋنيسەف), «سامۇرىق-قازىنا» اق قولداۋىمەن, سونداي-اق, ءبىلىم جانە عىلىم مينيسترلىگىنىڭ ۇيىمداستىرۋىمەن ءوتتى.
حالىقارالىق كونفەرەنتسيانىڭ ماقساتى – «ماڭگىلىك ەل» جالپىۇلتتىق پاتريوتتىق يدەياسى نەگىزىندە جاس ۇرپاقتىڭ بويىندا باي رۋحاني قۇندىلىقتى, ولاردىڭ ازاماتتىق ۇستانىمىن قالىپتاستىرۋ.
سالتاناتتى شارانىڭ اشىلۋىندا ءسوز سويلەگەن مەملەكەتتىك حاتشى گۇلشارا ابدىقالىقوۆا وسىنداي ماڭىزدى جيىنعا قاتىسۋعا كەلگەن بالالارعا ريزاشىلىعىن ءبىلدىردى. مەملەكەتتىك حاتشى ءوز سوزىندە قازاقستان بالالارى مەن جاسوسپىرىمدەرىنىڭ ءوز دارىندىلىعى جاعىنان الەمنىڭ 100 ەلى اراسىندا 12 ورىندا تۇرعانىن اتاپ ءوتتى.
«بيىل 1200 بالا حالىقارالىق جارىستاردا جۇلدەلى ورىندارعا يە بولدى. جالپى, دارىندىلىق جاعىنان العاندا ەلىمىزدىڭ بالالارى دۇنيەجۇزىندەگى 100 مەملەكەتتىڭ ىشىندە 12-ءشى ورىندى ەنشىلەپ وتىر. ال وسىدان 20 جىل بۇرىن بۇل كورسەتكىش بويىنشا ەلىمىز 50-ءشى ورىندا تۇرعان ەدى. قازىر ءبىز قازاقستاندى دامىعان 30 ەلدىڭ قاتارىنا قوسامىز دەگەن ماقساتتى ۇستانىپ جۇرگەنىمىزدى بىلەسىزدەر, ال بالالارىمىز بۇل مەجەگە وزدەرىنىڭ ءبىلىم-بىلىكتەرىمەن-اق جەتىپ قويدى», – دەدى گۇلشارا ناۋشاقىزى.
سونىمەن قاتار, مەملەكەتتىك حاتشى قازاقستان ءوز تاۋەلسىزدىگىن العان ۋاقىتتان بەرى 13 حالىقارالىق قۇجاتتى راتيفيكاتسيالاعانىن, ال بيىلعى جىلدىڭ ماڭىزدى وقيعاسى ەلباسى نۇرسۇلتان نازارباەۆتىڭ تاپسىرماسىمەن بالا قۇقىقتارى جونىندەگى ۋاكىل ينستيتۋتىنىڭ قۇرىلۋى بولعاندىعىن اتاپ ءوتتى.
«قازىرگى تاڭدا ەلىمىزدە 5 ميلليوننان استام بالا بار. 2000 جىلدان باستاپ, قازاقستانداعى تۋ كورسەتكىشى 1,4 پايىزعا ارتىپ, جىل سايىن 400 مىڭعا تارتا ءسابي دۇنيە ەسىگىن اشادى. جالپى العاندا, قازاقستانداعى بالالار قۇقىعىن قورعاۋ, ولارعا كومەك كورسەتۋ باعىتىندا ءتيىستى شارالار جۇرگىزىلىپ كەلەدى», – دەدى گۇلشارا ناۋشاقىزى.
بۇدان كەيىن بەيبىتشىلىك جانە كەلىسىم سارايىندا ودان ءارى جالعاسقان اۋقىمدى شاراعا مەملەكەتتىك حاتشىدان بولەك, پارلامەنت سەناتىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ ءتورايىمى داريعا نازارباەۆا, پارلامەنت ءماجىلىسىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى ماۋلەن اشىمباەۆ, ادام قۇقىقتارى جونىندەگى ۋاكىل اسقار شاكىروۆ, بۇۇ بالالار قورىنىڭ (يۋنيسەف) اتقارۋشى ديرەكتورىنىڭ ارنايى وكىلى ماريەلەنا ۆيۆياني, قازاقستانداعى بۇۇ بالالار قورىنىڭ وكىلى يۋري وكساميتنىي, ەلىمىزدەگى بالا قۇقىقتارى جونىندەگى ۋاكىل زاعيپا باليەۆا, سونىمەن قاتار, ۇلىبريتانيا, شۆەيتساريا, نورۆەگيا, يرلانديا, گەرمانيا, سلوۆەنيا, يتاليا, حورۆاتيا, رەسەي, بەلارۋس, ازەربايجان, لاتۆيا, ليتۆا سەكىلدى ەلدەردەن كەلگەن شەتەلدىك ساراپشىلار قاتىسىپ, ءسوز سويلەدى.
بۇگىن حالىقارالىق كونفەرەنتسيا اياسىندا بالالار فەستيۆالىنىڭ دە اشىلۋ ءراسىمى ءوتتى. وعان ەلىمىزدىڭ بارلىق وڭىرىنەن كەلگەن 500-گە تارتا بالا قاتىستى. ولاردىڭ بارلىعى – ءتۇرلى الەۋمەتتىك جوبالار كونكۋرستارىنىڭ, عىلىمي جارىستاردىڭ, الەۋمەتتىك جوبالاردىڭ, رەسپۋبليكالىق جانە حالىقارالىق شىعارماشىلىق بايقاۋلاردىڭ جەڭىمپازدارى. الداعى جىلداردان باستاپ داستۇرگە اينالاتىن بۇل كونفەرەنتسيا ەرتەڭ ودان ءارى جالعاسپاق. بۇل كۇنى شەتەلدىك جانە وتاندىق ساراپشىلار «بالا جانە زاڭ», «بالانىڭ كوزقاراسىن قۇرمەتتەۋ», «بالا جانە وتباسى», «بالا جانە ونىڭ قۇقىقتارى», «بالالار جانە زورلىق-زومبىلىقپەن كۇرەس», «بالا جانە دەنساۋلىق», «مۇمكىندىكتەرى شەكتەۋلى بالالار», «بالا جانە كاسىپكەرلىك», «بالا جانە قورشاعان ورتانىڭ جاعدايى», «بالالار جانە ءبىلىم الۋ, مەكتەپكە دەيىنگى تاربيە» سەكىلدى ماسەلەلەر بويىنشا پىكىر الماسىپ, ءوز ويلارىن ورتاعا سالاتىن بولادى.
ءلايلا ەدىلقىزى,
"ەگەمەن قازاقستان".
سۋرەتتەردى تۇسىرگەن ورىنباي بالمۇرات
