استانادا عارىش كۇندەرى وتۋدە

استانادا «قازاقستانداعى عارىش كۇندەرى-2016» حالىقارالىق سەمينارى باستالدى. بيىل ەلىمىزدىڭ باستى عارىشتىق فورۋمى جەردى قاشىقتىقتان زوندتاۋ عارىش جۇيەسىنىڭ جۇمىسى جانە قر دالدىگى جوعارى سپۋتنيكتىك ناۆيگاتسيا جۇيەسى مىسالىندا زاماناۋي عارىش تەحنولوگيالارىنىڭ پراكتيكالىق تاجىريبەسىنە جانە پەرسپەكتيۆالارىنا ارنالعان. سەمينار قاتىسۋشىلارىنىڭ الدىندا سويلەگەن سوزىندە قر قورعانىس جانە اەروعارىش ونەركاسىبى ءمينيسترى بەيبىت اتامقۇلوۆ پرەزيدەنتتىڭ قازاقستاننىڭ عارىش سالاسىن قۇرۋ بويىنشا قويعان مىندەتىنىڭ ماڭىزدىلىعىن باسا ايتتى.   «وزدەرىڭىزگە دە ءمالىم, ءبىر ايدان استام ۋاقىت بۇرىن قازاقستان رەسپۋبليكاسى پرەزيدەنتىنىڭ جارلىعىمەن جاڭا مينيسترلىك – قورعانىس جانە اەروعارىش ونەركاسىبى مينيسترلىگى قۇرىلعان بولاتىن. ونىڭ باستى مىندەتتەرىنىڭ ءبىرى ادامزاتتىڭ بارلىق ومىرلىك سالالارىندا تەرەڭ ىقپالداسىپ كەلە جاتقان عارىش قىزمەتىن دامىتۋ بولىپ تابىلادى. بۇل ءۇردىس مەملەكەت الدىنا ماڭىزدى مىندەت قويادى, ول – ءبىر مەزگىلدە عارىش قىزمەتىنىڭ باعىتتارىنىڭ تولىق كەشەنىن جانە سوڭعى تۇتىنۋشىعا باعىتتالعان عارىش قىزمەتتەرىنىڭ كەڭ سپەكترىن دامىتۋ. الەمدەگى عارىش تەحنولوگيالارىن قولدانۋدىڭ ماڭىزدى باعىتتارىنىڭ ءبىرى جەردى قاشىقتىقتان زوندتاۋ (جقز) مالىمەتتەرىن ەكونوميكانىڭ ءتۇرلى سالالارىندا پايدالانۋ. وعان قوسا, بارلىق دەڭگەيلەردەگى مەملەكەتتىك سەكتور عارىش تۇسىرىلىمدەرىنىڭ نەگىزگى ساتىپ الۋشىسى بولىپ قالۋدا. ولاردى ۇسىنۋ تەحنولوگياسى دا جەتىلدىرىلىپ كەلەدى», – دەدى مينيستر. ب. اتامقۇلوۆ سونداي-اق مينيسترلىك قازاقستاننىڭ عارىش ونىمدەرى مەن قىزمەتتەرىن سەنىمدى جەكىزۋشى بولىپ قالىپتاسۋى بويىنشا بەلسەندى جۇمىس جۇرگىزىلەتىنىن ايتتى.