ساناۆياتسيا 5 جىلدا 10 مىڭنان استام قىزمەت كورسەتتى

5 جىل ىشىندە سانيتاريالىق اۆياتسيا ماماندارى بارلىعى 10 938  مەديتسينالىق قىزمەت كورسەتكەن. ناقتى سول جەردە كورسەتىلگەن كومەك بارلىق مەديتسينالىق قىزمەتتىڭ 28 % -ىن قۇرايدى. بۇل تۋرالى primeminister.kz سايتى جازدى. سونداي اق, قر ءدسادم-ءنىڭ مالىمەتى بويىنشا, استانا قالاسىنان 2 721 ۇشىرىلىم, الماتى قالاسىنان – 582, وڭىرلەردە – 5 301 ۇشىرىلىم, وڭىرارالىق – 39 ۇشىرىلىم جاسالعان. سانيتاريالىق اۆياتسيا شاقىرتۋلارىنىڭ ىشىندە ءبىرىنشى ورىندى بالالار جاسىنداعى پاتولوگيا الادى - 22%; ەكىنشى ورىندا - جاراقاتتانۋشىلىق, جازاتايىم وقيعالار جانە ۋلانۋلار - 21 %; ءۇشىنشى ورىندا – اكۋشەرلىك تاجىريبەدەگى شۇعىل جاعدايلار - 18%; ءتورتىنشى ورىندا – جاڭا تۋعان نارەستەلەردىڭ پاتولوگيالارى - 16%; بەسىنشى ورىندا - قان اينالىمى جۇيەسى اۋرۋلارى - 13% جانە وزگە دە اۋرۋلار (نەۆرولوگيالىق, ەندوكرينولوگيالىق, جۇقپالى, حيرۋرگيالىق جانە ت.ب.) - 10%. بۇگىنگى تاڭدا قازاقستاندا سانيتاريالىق اۆياتسيا مۇددەسىندە 35 اۆياكولىك قولدانىلادى (21 ۇشاق جانە 14 تىكۇشاق). سانيتارلىق اۆياتسيا قىزمەتىن وسى قىزمەتكە ليتسەنزياسى بار 13 اۆياكومپانيا, ونىڭ ىشىندە قازاقستان وڭىرلەرىندە – 11 اۆياكومپانيا, رەسپۋبليكالىق دەڭگەيدە – 2 اۆياكومپانيا كورسەتەدى. سانيتاريالىق اۆياتسيانىڭ موبيلدىك بريگادالارى ارنايى جانە جوعارى مامانداندىرىلعان مەديتسينالىق كومەكتى قازاقستانننىڭ بارلىق ايماعىندا تاۋلىك بويى كورسەتۋگە دايىن اسا بىلىكتى جوعارى مامانداندىرىلعان دارىگەرلەرمەن جاساقتالعان. ەستەرىڭىزگە سالا كەتەيىك, سانيتاريالىق اۆياتسيا دەنساۋلىق ساقتاۋ ۇيىمدارىنىڭ الەۋمەتتىك باعدارلانعان, ەرەكشە ءتۇرى بولىپ تابىلادى, ونىڭ قىزمەتى ەلىمىزدىڭ شالعايداعى اۋداندارىندا تۇراتىن حالىققا ۋاقىتىلى جانە ساپالى مەديتسينالىق كومەك كورسەتۋگە باعىتتالعان. 2012 جىلعى 29 جەلتوقساندا قر ۇكىمەتىنىڭ قاۋلىسىمەن قر ءدسادم «رەسپۋبليكالىق سانيتاريالىق اۆياتسيا ورتالىعى» شجق رمك قۇرىلعان. 2013 جىلعى 26 ماۋسىمداعى قر ءدسادم بۇيرىعىنا سايكەس اتالعان ورتالىققا شۇعىل مەديتسينالىق كومەك كورسەتۋ ۇيىمدارىنىڭ قىزمەتىن ۇيلەستىرۋ بەكىتىلگەن.