قوعامدى قۇندىلىقتار بىرىكتىرەدى

استاناداعى «قازمەديا ورتالىعى» عيماراتىندا تاۋەلسىزدىكتىڭ  25 جىلدىعىنا وراي, قازاقستان حالقى اسسامبلەياسىنىڭ قولداۋىمەن, «قازاقستاندىق بىرەگەيلىك, ەتنوسارالىق كەلىسىم جانە قوعامداعى ءتىل مادەنيەتىنىڭ دەڭگەيىن ارتتىرۋ» تاقىرىبىندا «ماڭگىلىك ەل» جالپىۇلتتىق پاتريوتتىق يدەياسىن ىلگەرىلەتۋگە باعىتتالعان ءدارىس ءوتتى. وعان پارلامەنت دەپۋتاتتارى, قحا مۇشەلەرى, قوعام قايراتكەرلەرى, ساياساتكەرلەر, عىلىمي جانە شىعارماشىلىق زيالىلار, ەتنومادەني جانە جاستار بىرلەستىكتەرىنىڭ وكىلدەرى, ەرىكتىلەر قاتىستى. شارانى ۇيىمداستىرۋشىلاردىڭ ايتۋىنشا, ءدارىستىڭ ماقساتى – قوعامدىق كەلىسىم مودەلى مەن جالپىۇلتتىق بىرلىكتىڭ بىرەگەي تاجىريبەسىن ناسيحاتتاۋ. وسى ورايدا, جيىنعا قاتىسۋشىلار قازاقستاندىق پاتريوتيزم ارقىلى ەتنوسارالىق قاتىناستار مەن قازاقستان حالقىنىڭ بىرلىگىن ودان ءارى نىعايتىپ, تاجىريبە الماسۋعا باعىتتالعان وزەكتى ماسەلەلەردى تالقى تارازىسىنا سالدى. ءدارىستىڭ اشىلۋىندا ءسوز العان «قازاقستان حالقى اسسامبلەياسىنىڭ قورى» قق ديرەكتورى قۇرمانبەك قازانباسوۆ: «تاۋەلسىز ەلدىڭ, جالپى تاۋەلسىز ادامنىڭ ارمان-ماقساتى بولادى. ونى ورىنداۋ ءۇشىن ءاربىر ۋاقىتىن جوسپارلايدى. ءبىزدىڭ ەلىمىزدىڭ ساياسي تۇرعىدا بولسىن, ەكونوميكا جاعىنان بولسىن 25 جىلدا قول جەتكىزگەن جەتىستىكتەرى از ەمەس. قازىر تاۋەلسىز قازاقستاننىڭ سيمۆولىنا اينالعان, ارقاشان دا ماقتاناتىن استانامىز بار», دەدى. سونداي-اق, بۇل ءدارىستىڭ تاقىرىبى تەگىننەن-تەگىن تاڭدالىپ الىنباعانىن ايتتى. «جالپى, «ماڭگىلىك ەل», ونىڭ ىشىندە «ماڭگى» دەگەن ءسوزدىڭ ءتۇپ-توركىنىنە تەرەڭ ۇڭىلەر بولساق, ول – جەر, ول – قازاقستان مەملەكەتىنىڭ اتاۋى, ول – كوك تۋىمىز, ءتىلىمىز, ءدىلىمىز, ءداستۇرىمىز. ال ولاردى قۇرمەتتەپ, ماڭگى ساقتايتىن بولساق, جەرىمىزدىڭ, ەلىمىزدىڭ دامۋىنا ۇلەس قوسساق, قازاقستان ەلىنىڭ دە ماڭگى بولاتىنىنا ءسوز جوق», دەدى قۇرمانبەك جۇماعالي ۇلى. ال «استانا حالىقارالىق قارجى ورتالىعى اكىمشىلىگىنىڭ» اق باسقارۋشى ديرەكتورى ساياسات نۇربەك: «ءبىز 3 جىل بۇرىن ۇلكەن زەرتتەۋ جۇمىستارىن جۇرگىزدىك. مەن ول كەزدە «نۇر وتان» پارتياسى جانىنداعى قوعامدىق «ساياسات» ينستيتۋتىنىڭ ديرەكتورى بولعان ەدىم. سول كەزدە ءبىز قازاقستان قوعامىنىڭ قۇندىلىقتارىن جەتە زەرتتەپ, زەردەلەي باستادىق», دەي كەلە, وسىدان 10-15 جىل بۇرىن ەلدەردىڭ دامۋى, ەكونوميكالىق وركەندەۋى, مودەرنيزاتسيا قابىلەتتىلىگى ءداستۇرلى ۇعىمدارمەن تۇسىندىرىلەتىنىن, بىراق, كەيىن تەرەڭدەتىلگەن زەرتتەۋلەردىڭ ارقاسىندا بۇل ۇعىمداردىڭ اۋىسقانىن, ولاردىڭ ورنىنا باسقا تۇسىنىكتەر پايدا بولعانىن, قازىرگى تاڭدا ينستيتۋتسيونالدى ەكونوميكادا ۇلكەن توڭكەرىس, ۇلكەن وزگەرىس بولىپ جاتقانىن جەتكىزدى. سونىمەن قاتار, ول كەز كەلگەن مەملەكەت ەكونوميكاسىنىڭ دامۋىنا تەك رەسمي ينستيتۋتتار ەمەس, قۇندىلىقتار دا تىكەلەي اسەر ەتەتىنىن ايتتى. بۇل كۇنى ءىس-شاراعا قاتىسقان ازاماتتار سونىمەن قاتار, «ۇلتتار اراسىنداعى كەلىسىم – تاۋەلسىز قازاقستاننىڭ ەڭ باستى جەتىستىگى», «جىراۋلىق – پاتريوتتىققا تاربيەلەۋ قۇرالى», «قازاقستاندىق قوعامدىق كەلىسىم مودەلى – قازاقستان حالقى اسسامبلەياسى اياسىندا ازاماتتىق پەن ءپاتريوتيزمدى قالىپتاستىرۋ» دەگەن تاقىرىپتار بويىنشا ءسوز سويلەدى. ءلايلا ەدىلقىزى, «ەگەمەن قازاقستان»