قولجەتىمدى ۇيلەر كوبەيە تۇسپەك

حالىقتى تۇرعىن ۇيمەن قامتۋ ماسەلەسى قاشاننان وزەكتى بولىپ كەلەدى. وسى كۇرمەۋى قيىن شارۋانى جۇزەگە اسىرۋ ءۇشىن ەلىمىزدە كوپ جۇ­مىستار جاسالۋدا. سونىڭ ءبىرى دە, بىرەگەيى 2010-2014 جىلدارعا ارنالعان تۇرعىن ءۇي قۇرىلىسى باعدارلاماسى بولىپ تابىلادى.تۇرعىن ءۇيدى سالۋ مەن تاراتۋدى «قازاقستاننىڭ تۇرعىن ءۇي قۇرىلىس جيناق بانكى» اق ار­قىلى جۇزەگە اسىرۋ كوزدەلگەن. ما­مان­داردىڭ ايتۋىنشا, جەرگىلىكتى اتقارۋشى ورگاندار بانكپەن كەلىسىلگەن جوبالاردى تاڭداعان سوڭ تۇرعىن ءۇي قۇرىلىسىن پايدالانۋعا بەرۋدى قامتاماسىز ەتەدى. بانك تۇرعىن ءۇي قۇرىلىس جيناق جۇيەسىنە قاتىسۋشى­لار قاتارىنان تۇرعىن ءۇي ساتىپ الۋشىلار پۋلىن قۇرىپ, ولاردىڭ اراسىندا پاتەرلەردى بولەدى, پۋل قاتىسۋشىلارى وزدەرىنە بولىنگەن پاتەرلەردى تۇرعىن ءۇي قۇرىلىس جي­ناعى مەن بانك بەرگەن تۇرعىن ءۇي زاە­مى ەسەبىنەن ساتىپ الادى. تۇرعىن ءۇيدى پايدالانۋعا بەرگەن ساتتە تۇر­عىن ءۇي زاەمىن الۋ تالاپتارىن ورىنداعان بانك سالىمشىلارى ساتىپ الۋشىلار پۋلىن قۇرۋ كەزىندە با­سىمدىققا يە بولادى. اتالعان تۇر­عىن ءۇيدى ساتىپ الۋ ارالىق جانە الدىن-الا تۇرعىن ءۇي زاەمدارى ەسەبىنەن دە جۇزەگە اسىرىلادى. 2011-2013 جىلدارى ەلىمىزدىڭ بارلىق وبلىستا­رىنىڭ, استانا جانە الماتى قا­لالارىنىڭ جەرگىلىكتى اتقارۋشى ور­گان­دارى رەسپۋبليكالىق بيۋدجەتتەن تۇرعىن ءۇي قۇرىلىس جيناق جۇيەسى قاتىسۋشىلارىنا ارنالعان 3 سانات­تاعى جايلىلىق دەڭگەيى بويىن­شا تۇرعىن ءۇي قۇرىلىسىن قارجى­لان­دىرۋعا 80,84 ميلليارد تەڭگە قارجى بولەدى. وسى باعدارلاماعا بايلانىستى وبلىستىق قۇرىلىس باسقارماسىندا وتكىزىلگەن دوڭگەلەك ۇستەلدە قۇرىلىس سالاسىنىڭ جانە «قازاقستاننىڭ تۇر­عىن ءۇي قۇرىلىس جيناق بانكى» اق اقتوبە وبلىستىق فيليالىنىڭ وكىل­دەرى بۇل ماسەلەلەرگە كەڭىرەك توقتا­لىپ, تەرەڭىرەك تۇسىنىك بەردى. وبلىس بويىنشا ءۇش جىلدا 93600 شارشى مەتر تۇرعىن ءۇيدى تاپسىرۋ جوس­پارلانىپ وتىر. بۇل شامامەن 1170 پاتەر. وعان رەسپۋبليكالىق بيۋدجەتتەن 8 ميلليارد 428 ميلليون تەڭگە بولىنگەن. بيىل 26100 شارشى مەتر تۇرعىن ءۇي سالىنادى, ياعني 400-گە جۋىق پاتەر پايدالانۋعا بەرىلەدى. جاڭا پاتەرلەردىڭ 1 شارشى مەترى 90 مىڭ تەڭگە تۇرادى. جاڭادان سالىنا­تىن ۇيلەر قالانىڭ «بولاشاق» جانە «باتىس-2» شاعىن اۋداندارىندا بوي تۇزەيدى. اسىرەسە, «باتىس-2» شاعىن اۋدانىندا قۇرىلىس قارقىندى ءجۇر­گىزىلەتىن بولادى. مۇندا تۇرعىن ۇيلەردەن بولەك «دينا» گيپەرماركەتى, يننوۆاتسيالىق مەكتەپ, بالاباقشا جانە باسقا دا نىساندار بوي كوتەر­مەك. بۇل جولعى سالىناتىن ۇيلەردىڭ ساپاسى الدىڭعىلاردان الدەقايدا جوعارى بولماق. تازا كىرپىشتەن قالا­ناتىن ۇيلەردىڭ ءىشى دە ءتاۋىر ماتەريالدارمەن سىلانىپ, سىرتقى ەسىكتەرىنە حابارلاسۋ اپپاراتى قوندىرى­لادى. قازىردىڭ وزىندە بۇل اۋماقتارعا ينجەنەرلىك جەلىلەر جۇرگىزىلىپ جا­تىر. دوڭگەلەك ۇستەلگە قاتىسۋشى قالا­لىق قۇرىلىس ءبولىمى باستىعىنىڭ ورىنباسارى گەننادي دۋداكوۆتىڭ مالىمدەۋىنشە, جاقىندا قۇرىلىس ءجۇر­گىزەتىن مەردىگەرلەر اراسىندا تەن­دەر وتەدى. جەڭىمپازدار انىقتالىپ, كۇن جىلىعاسىن-اق قۇرىلىس باستا­لادى. ۇستىمىزدەگى جىلدىڭ جەلتوقسان ايىندا وسى باعدارلاماعا قاتىسۋشى­لار العاشقى پاتەرلەرگە قونىس­تانادى. بۇل ۇيلەرگە قول جەتكىزەمىن دەۋشىلەر «تۇرعىن ءۇي قۇرىلىس جيناق بانكىنە» وتىنىشتەرىن بىلدىرەدى. حا­لىققا تومەن پايىزبەن نەسيە بەرۋ ءۇشىن مەملەكەت بانكتىڭ جارعىلىق قورىنا 26 ملرد. تەڭگە قارجى بولگەن. — ءبىزدىڭ بانك ارقىلى باسپانالى بولعىسى كەلەتىندەر الدىمەن ءۇش جىل بويىنا پاتەردىڭ جالپى قۇنىنىڭ 50 پايىزىن جينايدى. سودان كەيىن 4-5 پايىزدىق وسىممەن قالعان 50 پايى­زىن نەسيەگە الادى. ساتىپ العالى وتىرعان پاتەرىن كەپىلگە قويادى. قا­زىر­گى تاڭدا ءبىزدىڭ 15 مىڭعا جۋىق سالىمشىلا­رىمىز بار. ونىڭ تەڭ جارتىسى تۇرعىن ءۇي الۋعا قارجى جيناۋشىلار — دەيدى «تۇرعىن ءۇي قۇرىلىس جيناق بانكى» اق وبلىستىق فيليالىنىڭ ديرەكتورى گۇلنار دابىلوۆا. بيىلعى جولداۋدا «ازاماتتاردىڭ ءومىر ساپاسىنىڭ وزىق كورسەتكىشى – تۇرعىن ءۇي جايلىلىعىنىڭ دەڭگەيى» دەپ اتاپ كورسەتىلگەن بولاتىن. قازىر قولعا الىنىپ جاتقان جاڭا باعدار­لاما وسى مىندەتتەردى تۇبەگەيلى شەشۋگە باعىتتالعان. مۇنىڭ ءوزى حالىق­تىڭ جايلى دا ارزان پاتەرلەرگە يە بولۋ مۇمكىندىگىن ارتتىرا تۇسەتىنى ءسوزسىز. ساتىبالدى ءساۋىرباي, اقتوبە وبلىسى.