ماجىلىستەگى «اق جول» دەپۋتاتتىق فراكتسياسىنىڭ مۇشەسى مەرۋەرت قازبەكوۆا باستاپ, فراكتسيانىڭ باسقا مۇشەلەرى قوستاعان حات ۇلتتىق بانكتىڭ توراعاسى دانيار اقىشەۆتىڭ اتىنا جولداندى. وندا بىلاي دەلىنگەن: «ءبىز ۇستىمىزدەگى جىلدىڭ 29 شىلدە جانە 7 قىركۇيەك كۇندەرىندە ءسىزدىڭ اتىڭىزعا شەتەلدىك ۆاليۋتامەن قارىز العان ادال بورىشكەرلەردىڭ مۇددەسىن قورعاۋ ءۇشىن «يپوتەكالىق زايمداردى قايتا قارجىلاندىرۋ» باعدارلاماسىن جەتىلدىرۋ تۋرالى ۇسىنىس جاساعان ساۋالدار جولداعان ەدىك. ويتكەنى, باعدارلامانىڭ شارتى العان نەسيەلەرىن دۇرىس وتەمەي جۇرگەن بورىشكەرلەرگە جەڭىلدىك جاساپ, ولاردىڭ قارىزىن شەتەلدىك ۆاليۋتانىڭ بىلتىرعىدان بۇرىنعى كۋرسىمەن قايتا ەسەپتەگەنىن, ال قارىزىن ۋاقتىلى وتەپ جۇرگەن ادال بورىشكەرلەر ءۇشىن ۆاليۋتانىڭ قازىرگى كۋرسىن قولدانىپ قايتا ەسەپتەلگەنىن, سونىڭ ناتيجەسىندە ولاردىڭ قارىزى 70-80 پايىزعا كوبەيىپ كەتكەنىن جازدىق. بىزدىڭشە, باعدارلامانىڭ شارتى ادال بورىشكەرلەردى قولداۋدىڭ ورنىنا ونى تولەگىسى كەلمەيتىندەردى ىنتالاندىرادى.
ول-ول ما, بۇل كونستيتۋتسياداعى ازاماتتار تەڭدىگىنىڭ نورماسىن بۇزادى. وسىعان بايلانىستى ءبىز جاعدايدى تۇزەتۋ شارالارىن قاراستىرۋدى سۇراعان ەدىك. ەكى ساۋالىمىزعا دا ءبىز ۇلتتىق بانك توراعاسىنىڭ ورىنباسارى و.سمولياكوۆ قول قويعان جالتارما جاۋاپ فورماسىنداعى جاۋاپتار الدىق. وندا ءبىزدىڭ سۇراقتارىمىزعا جاۋاپ بەرۋدىڭ ورنىنا باعدارلامانىڭ جالپى سوماسىنىڭ ساندارى, قاتىساتىن بانكتەردىڭ ءتىزىمى, باعدارلامانىڭ شارتتارى جانە ت.ب. عانا كورسەتىلگەن. وسىعان بايلانىستى «اق جول» دەپۋتاتتىق پارتياسىنىڭ مۇشەلەرى سىزگە تومەندەگىلەردى حابارلايدى:
- مۇنداي جالتارما جاۋاپتى ءبىزدىڭ كوتەرگەن ماسەلەمىزگە جاۋاپ دەپ سانامايمىز;
- ءبىزدىڭ ساۋالدارىمىزدى قاراۋدى ءۇشىنشى رەت تالاپ ەتىپ, وعان نەگىزدەلگەن جاۋاپ بەرۋىڭىزدى تالاپ ەتەمىز;
- ۇلتتىق بانكتىڭ اتىنان جالتارما جاۋاپتى دايىنداعان قىزمەتكەرلەرىڭىزدى جاۋاپكەرشىلىككە تارتۋىڭىزدى وتىنەمىز.
