سەرۆيستىك قىزمەت سىن كوتەرمەيدى

پارلامەنت ءماجىلىسىنىڭ سارسەنبىدە وتكەن جالپى وتىرىسىندا دەپۋتات ەرسۇلتان بەكتۇرعانوۆ پرەمەر-مينيستر باقىتجان ساعىنتاەۆقا دەپۋتاتتىق ساۋال جولداعان بولاتىن. وندا بىلاي دەلىنەدى: «ورتالىق ازيا تاريحىندا استانا قالاسىندا تۇڭعىش رەت وتەتىن «ەكسپو-2017. بولاشاق ەنەرگياسى» اتتى كورمەنىڭ اشىلۋىنا دا 220 كۇن قالىپتى. كەلەسى جىلعى ماۋسىمنىڭ 10-ىنان قىركۇيەكتىڭ 10-ىنا دەيىن ءۇش اي ىشىندە باس قالامىزعا 5 ميلليونعا جۋىق قوناق پەن تۋريست كەلەدى دەپ بولجانۋدا. كورمە اياسىندا شەتەلدىك قوناقتاردى ۇلى دالامىزدىڭ تاماشا تابيعاتىنىڭ ۇلگىسى بولىپ سانالاتىن بۋراباي ۇلتتىق تابيعي پاركىنە اپارۋ جوسپارلانىپ وتىر. بىراق, بۇگىنگى تاڭدا سول جەرگە اپاراتىن, دۇنيەجۇزىلىك ۇلگىدە سالىنعان «استانا – بۋراباي» تاس جولى بويىنداعى سەرۆيستىك قىزمەتتەر كورسەتۋ دەڭگەيى ەشقانداي سىن كوتەرمەيدى. توسەلگەن اۆتوبان ءححى عاسىردى كوزگە ەلەستەتسە, جول بويىندا سالىنعان اۆتوتۇراقتارداعى اجەتحانالار وتكەن عاسىردى ەسكە سالادى. ولاردا جىلۋ كوزدەرى, سۋمەن قامتاماسىز ەتۋ اتىمەن جوق بولسا, تۇنگى ۋاقىتتا ول جەرلەرگە, جارىقتىڭ جوقتىعىنان كىرۋدىڭ ءوزى قورقىنىشتى. ولاردى دەر كەزىندە تازارتىپ, سانيتارلىق نورمادا ۇستاۋ جۇمىستارى مۇلدەم جۇرگىزىلمەيدى. بۇل جول – قازاقستانداعى العاشقى اقىلى اۆتوبان رەتىندە جىلىنا ءبىر ميلليارد تەڭگەدەن استام قارجى ءتۇسىرىپ وتىرسا دا, جولاۋشىلار مەن جۇرگىزۋشىلەرگە قاجەتتى جاعداي جاسالماي وتىرعانى وكىنىشتى-اق. جالپى, ايتىلعان كەمشىلىكتەر تەك قانا وسى جولعا عانا قاتىستى ەمەس. رەسمي مالىمەتتەر بويىنشا, ەلىمىزدەگى رەسپۋبليكالىق جانە حالىقارالىق جولدارداعى سەرۆيستىك قىزمەت كورسەتۋلەردىڭ 80 پايىزعا جۋىعى ۇلتتىق ستاندارتتارعا ساي ەمەس ەكەن. بۇل ماسەلەنىڭ شەشىمىن تابۋ ءۇشىن ءتيىستى مينيسترلىكتەر جانە وسى جولدار وتەتىن وڭىرلەردىڭ اكىمشىلىكتەرى جول بويىنا سالىناتىن قۇرىلىس نىساندارىنا جاڭا تالاپتار قويىپ, ولاردىڭ حالىققا ساپالى قىزمەت كورسەتۋىن قاتاڭ باقىلاۋعا السا ەكەن دەيمىز. ال «استانا–بۋراباي» اۆتوبانىنا بايلانىستى ايتاتىن بولساق, حالىقارالىق ەكسپو-2017 كورمەسى اشىلعانعا دەيىن اتالعان جول بويىنداعى سەرۆيستىك الاڭداردى شۇعىل تۇردە ۇلتتىق ستاندارتتار تالاپتارىنا سايكەستەندىرۋدى سۇرايمىز. حالقىمىزدا «كەلگەنشە قوناق ۇيالادى, كەلگەن سوڭ ءۇي يەسى ۇيالادى» دەگەن بار. سوندىقتان, حالىقارالىق دەڭگەيدەگى ءىس-شارانىڭ شەڭبەرىندە ەلىمىزگە كوپتەگەن مەيماندار مەن قوناقتار كەلگەندە, ۇياتقا قالماساق ەكەن دەگىمىز كەلەدى».