برازيليادان بيزنەسمەندەر كەلدى

الەمدەگى تۇرعىندار سانىنىڭ كوپتىگى جونىنەن العاشقى بەستىككە كىرەتىن برازيليا تۋرالى  ءبىزدىڭ بىلەتىنىمىز از ەمەس. جازۋشى بەردىبەك سوقپاقباەۆتىڭ ءبىر كەيىپكەرى جاھاندى جايلاعان جۇرتتاردى تۇگەندەپ وتىرىپ, ەلدىڭ ەسىم-سويىن قازاقى تىلمەن تىزبەكتەيتىن ەدى عوي. سونداعى «ءبىراز ەل, ءا...» دەپ بەينەلەيتىن لاتىن امەريكاسىنداعى مەملەكەتىمىز – وسى. سوڭعى 25 جىل ىشىندە قازاقستان مەن برازيليا اراسىنداعى بايلانىس جىل سايىن دامىپ, بەرىك جىپپەن بايلانعان ارىپتەستىككە ۇلاسىپ كەلدى. ال بيىلعى جىلدىڭ  1 شىلدەسىنەن باستاپ ەكى ەل دوستىق قارىم-قاتىناستىڭ جاڭا كوكجيەگىنە قادام باستى. كوپ جىلعى كەلىسىمدەردىڭ ناتيجەسىندە استانا مەن برازيليا اراسىندا ۆيزاسىز رەجىم جۇزەگە استى. بۇل ەكونوميكالىق ارىپتەستىكتىڭ جاڭا كەزەڭگە اياق باسقانىن بىلدىرەدى. 2015 جىلى ەكىجاقتى تاۋار اينالىمى 61,3  ملن اقش دوللارىن قۇرادى. مۇنىڭ  55,7 ملن دوللارى ەكسپورتتىق ءونىم بولسا, 105,6 ملن دوللارى يمپورتتىڭ ۇلەسىندە جۇزەگە اسقان. ەندى وسى ەكى جاقتى بايلانىس جەر­­گى­لىكتى جەردە جالعاسىن تاۋىپ, برازي­ليالىق بيزنەسمەندەردىڭ ىشكى نارىققا قىزىعۋشىلىعى ارتىپ وتىر. بۇعان الماتىدا وتكەن قازاقستان-برازيليا ىسكەرلەرىنىڭ بيزنەس-فورۋمىندا كوز­ جەتكىزدىك. الماتى قالاسىنىڭ كاسىپ­كەر­لەر پالاتاسىنىڭ مۇرىندىق بولۋىمەن برازيليادان بەلگىلى بيزنەسمەندەر توبى كەلىپ, قازاقستان نارىعىنا ينۆەستيتسيا سالۋدىڭ جولدارىن تالقىلادى.  بۇل – ىسكەرلەر اراسىندا ءوتىپ وتىرعان تۇڭعىش جيىن. فورۋم اياسىندا برازيليانىڭ اگرو­ونەركاسىپتىك جانە وندىرىستىك سالاسىنداعى ءۇز­دىك كومپانيالاردىڭ باسشىلارىمەن ءىس­كەر­لىك كەزدەسۋلەر ءوتتى. ەكى جاقتىڭ دا ۇيرەنەتىن, ۇيرەتەتىن ىستەرى ۇشان-تەڭىز ەكەن. ماسەلەن, قازاقستانعا الەمدىك ەت نارىعىندا وزىندىك ورنى بار «JBS», «Minerva Foods», «Copacol» (تاۋىق ەتىن ءوندىرۋشى مونوپوليست) سياقتى كومپانيالاردىڭ ىسىنەن ۇلگى الۋ ارتىق ەتپەس ەدى. كەزدەسۋ بارىسىندا شەتەلدىك كومپانيالار بيزنەستى جۇرگىزۋ تۋرالى تاجىريبەلەرىمەن ءبولىسىپ, بىرلەسىپ ءوندىرىس قۇرۋ مۇمكىندىكتەرىن قاراستىردى. قالماحانبەت مۇقامەتقالي, «ەگەمەن قازاقستان» الماتى