جانارماي نەگە جەتپەيدى؟

ەنەرگەتيكا مينيسترلىگىنىڭ جانار-جاعارمايدى ساتۋشى كومپانيالارعا ءبولۋ جولدارى تۇسىنىكسىز. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە «قموز» جشس باسشىلىعى ايتتى. ولار باسقوسۋ بارىسىندا ەلىمىزدە 4700-گە جۋىق جانار-جاعارماي قۇيۋ ستانساسى بار ەكەنىن جەتكىزدى. الايدا, ولاردىڭ 4300-ءى عانا جۇمىس ىستەپ تۇر. جشس باسقارۋشى ديرەكتورى داۋلەت قاليحانوۆتىڭ كەزدەسۋدەگى سوزىنە قارا­عاندا, جوعارىداعى ساننىڭ 326-سى – «قازمۇنايگاز», 270-ءسى – «گەليوس» ءجا­نە 131-ءى «سينويل» كومپانيالارىنا تيەسىلى. «ءبىز كومپانيامىزدى ەنەرگەتيكا مينيسترلىگىنىڭ مۇناي ونىمدەرىن ءبولۋ كەستەسىنە قوسىپ, ءۇش مەكەمەدەن كەيىنگى ەڭ ءىرى ءتورتىنشى جقس رەتىندە, ولارمەن بىردەي, ءتىپتى شالعاي وڭىرلەردەگى جانار-جاعارماي قۇيۋ ستانسالارىن جانارمايمەن قامتاماسىز ەتۋدى ماقسات ەتكەن ەدىك. وسى ۇدەدەن شىقتىق, اعىمداعى جىلعى قىركۇيەك ايىندا ەنەرگەتيكا مينيسترلىگى «قموز» جشس-ءىن وزدەرىنىڭ ءبولۋ كەستەسىنە قوستى. ءبىزدىڭ سەرىكتەستىك جەلىلەرىنىڭ جالپى تۇتىنۋ كولەمى شامامەن 80 مىڭ توننانى قۇرايدى. الايدا, ءبىز ءوتىنىش بەرىلگەن كولەمنىڭ تەك 1660 تونناسىن عانا الدىق. بۇل تەك وڭتۇستىك قازاقستان وبلىسى قاجەت­تى­لىگىنىڭ نەبارى ەكى پايىزىنا عانا جەتكىلىكتى», دەدى ول. داۋلەت قاليحانوۆتىڭ مالىمەتىنشە, قىركۇيەك ايىندا «قازمۇنايگاز» – 78  مىڭ, «گەليوس» – 36 مىڭ, «سينويل» 41 مىڭ توننا جانار-جاعارماي العان. «ال ءبىز سونشا تومەن مولشەردە ءونىم الۋى­مىزدى العاشقىدا نارىقتاعى جاڭا ويىن­شى ەكەندىگىمىزبەن بايلانىستىردىق جانە ءبولۋ كەستەسىنە العاش رەت قاتىسىپ وتىرعاندىعىمىزدى دا ەسكەرگەن بولار دەپ ويلادىق. كەلەسى ايدا دۇرىستالار دەپ ۇمىتتەندىك تە. بىراق, قازان ايىندا بىردە-ءبىر توننا بەنزين بولىنگەن جوق. قازىرگى ۋاقىتتا ەنەرگەتيكا مينيسترلىگىنىڭ وكىلدەرى مۇنى پاۆلودار مەن شىمكەنت مۇناي وڭدەۋ زاۋىتتارىندا جوسپارلى جوندەۋ جۇمىستارىنىڭ باستالۋىمەن تۇسىندىرۋدە», دەدى «قموز» جشس باسشىسى. دەگەنمەن, جوعارىدا اتالعان ءۇش الپاۋىت كومپانيا قازان ايىندا قىركۇيەك ايى­نان دا جوعارى كولەمدە مۇناي ونىمدەرىن العان. «بىزدەرگە رەسۋرستاردىڭ قانداي جولمەن بولىنەتىندىگى تۇسىنىكسىز», دەدى كومپانيا وكىلدەرى. جيىندا بىلگەنىمىزدەي, قازىرگى تاڭ­دا قازاقستان اۋماعىندا مۇناي ءوڭ­دەيتىن ءۇش زاۋىت جۇمىس ىستەيدى ەكەن. ولار­دىڭ نارىققا شىعارىپ وتىرعان ونىمدەرى تۇتىنۋشىلاردىڭ سۇرانىسىن قاناعاتتاندىرۋعا ابدەن جەتكىلىكتى كورىنەدى. اسحات رايقۇل, «ەگەمەن قازاقستان»