ازات پەرۋاشەۆتىڭ جاڭا كىتابى شىقتى

الماتىداعى ءال-فارابي اتىنداعى قازاق ۇلتتىق ۋنيۆەر­سيتەتىندە «اق جول» پارتياسىنىڭ توراعاسى, اتالعان پارتيانىڭ ماجىلىستەگى فراكتسياسىنىڭ جەتەكشىسى ازات پەرۋاشەۆتىڭ «پىكىرتالاستى ەكونوميكا» اتتى جيناعىنىڭ تۇساۋكەسەرى ءوتتى. پارتيا جەتەكشىسى ءوزىنىڭ جاڭا جيناعىندا 2011-2015 جىلدار ارالىعىنداعى جازبالارىن, بۇقارالىق اقپارات قۇرالدارىنا بەرگەن ماقالالارى مەن سۇحباتتارىن توپتاستىرىپتى. ۇلتتىق ۋنيۆەرسيتەتتە وتكەن كى­تاپ تۇساۋكەسەرىندە فيلوسوفيا جانە سايا­ساتتانۋ, ەكونوميكا, تاريح, زاڭ فا­كۋلتەتتەرىنىڭ ستۋدەنت­تەرى ساياسات­كەردىڭ جاڭا جيناعىنا قىزىعۋشىلىق تانىتتى. الدىمەن تۇساۋكەسەردە ساياساتتا ءوز پىكىرىن سوڭىنا دەيىن قورعاي الاتىن مەملەكەتشىل ازاماتتىڭ جاڭا كىتابى جاستارعا قانداي پايداسى بار, بولاشاق ماماندارعا باعدارى بار ما دەگەن ساۋالعا جاۋاپ ىزدەلدى. ەلىمىزدەگى ءۇش بىردەي ۋنيۆەرسي­تەتتىڭ پروفەسسورى بولىپ تابىلاتىن اۆتوردىڭ «پىكىرتالاستى ەكونوميكا» كىتابىنا نەگىزىنەن نارىقتىق رەفورمالاردىڭ جايى, جەكە بيزنەستى دامىتۋ مەن قورعاۋدىڭ جولدارى وزەك بولعان. وسى تۇرعىدان العاندا تاۋەلسىزدىكتى بەكەمدەۋ مەن ۇلتتىق مۇددەلەردى العا جىلجىتۋعا دا ءمۇد­دەلى ەكونوميكا كوزدەگەن ماقساتقا قانداي دەموكراتيالىق تەتىكتەر ارقىلى قول جەتكىزۋگە بولاتىنى  جيناقتا جەت­كىلىكتى باياندالادى. سول سياقتى اۆتوردىڭ پارلامەنت وتىرىستارىنداعى كاسىبي تۇرعىداعى كوزقاراستارى مەن شەشەندىكتىڭ ۇلگى­سىندەي باياندامالارى تالاي پىكىر­تالاسقا قوزعاۋ سالدى. كىتاپتاعى پىكىر قارا­ما-قايشىلىقتارى, ليبە­رالدىق  قۇندىلىقتارعا قىزمەت ەتۋ ۇلگىلەرى – مەملەكەتتىڭ قالىپتاسۋى مەن زاماناۋي قازاقستاننىڭ ەكونو­ميكالىق ۇدەرىس جولدارىن وقىپ جاتقان ستۋدەنتتەر ءۇشىن دە, ساياسي پارتيالاردىڭ شەجىرەسى ءۇشىن دە قىزىقتى بولعانى ءسوزسىز. سوندىقتان دا بيزنەستىڭ دە جايىن مەڭگەرگەن, سايا­ساتتى دا بەس ساۋساعىنداي بىلەتىن اۆ­تورعا ۋنيۆەرسيتەت ستۋدەنتتەرى عانا ەمەس, وقى­تۋشىلارى تاراپىنان دا سۇراقتار مەن ۇسىنىستار كوپ بولدى. كىتاپتىڭ تۇساۋكەسەرىندە ءسوز العان­داردىڭ ىشىندە «پىكىر­تا­لاستى ەكونوميكا» كىتابىن وقىپ, تالقى­لاۋعا دايىن كەلگەندەر تابىلدى. ماسەلەن, ۋنيۆەرسيتەتتىڭ حالىق­ارالىق قاتىناستار فا­كۋل­تەتىنىڭ پروفەسسورى مالىك اۋعان كىتاپتا جاريالانعان ماتە­ريال­­­­داردىڭ قاي-قايسىسى دا وزەكتى دەيدى. ونىڭ ويىنشا, جاڭا جيناقتىڭ ەرەك­شەلىگى, پارلامەنتتىڭ ىشكى ءومىرىن دە ورنەكتەيدى. سول سياقتى ساياساتتاعى كىشى پارتيالاردىڭ اتقاراتىن ءرولى, قوسىپ جاتقان ۇلەسى از ەمەس دەسەك, ونىڭ دالەلى دە قولىمىزداعى وسى جيناق دەدى تاريح عىلىمدارىنىڭ دوكتورى مالىك ءالشىوراز ۇلى. كىتاپ تۇساۋكەسەرىندە ۋنيۆەرسي­تەتتىڭ تاريح فاكۋلتەتىنىڭ پروفەسسورى امان­جول قالىش,  فيلوسوفيا فاكۋلتەتىنىڭ پروفەسسورى گۇلجيھان نۇرىشەۆا ءوز پىكىرلەرىن ورتاعا سالدى. ماسەلەن, گۇلجيھان جۇمابايقىزى كىتاپقا عانا قاتىستى ەمەس, اۆتوردىڭ ادام رەتىندەگى دە جاستارعا ونەگە بولاتىنداي, ءوزى سىرتتاي سىرالعى جاقسى قاسيەتىن مىسالعا كەلتىرگەنى جاستار ءۇشىن ۇلگى ءسوز ەدى. كەزدەسۋ سوڭىنا قاراي ۋنيۆەرسيتەت ستۋدەنتتەرى ساياسات پەن ەكونو­ميكاعا, الەۋمەتتىك جۇمىسكەرلەردىڭ بەدەلىن كوتەرۋگە, شاعىن جانە ورتا بيزنەستى دامىتۋعا, جاستاردىڭ مەملەكەتتىك قىزمەتكە كەلۋىنە بايلانى­ستى سان قىرلى ساۋالدارىن قويۋعا مۇمكىندىك الدى. سول سياقتى نەگە جاستار ساياسي پارتيالارعا مۇشە بولۋعا اسىقپايدى سىندى سۇراقتار تالقىلاندى. جاڭا كىتاپتىڭ الداعى كۇندەرى ەلىمىزدىڭ باسقا ايماقتارىنداعى جوعا­رى وقۋ ورىندارىنىڭ ستۋدەنت­تەرى اراسىندا تۇساكەسەرى ءوتىپ, تالقى­لانباق. ايناش ەسالي, «ەگەمەن قازاقستان» الماتى