اقۇشتاپ باقتىگەرەەۆا. كىتاپتىڭ دا كيەسى بار

ەگەمەندىك – بىزدەر  ءۇشىن ەڭ قىمبات ۇعىم. تاۋەلسىزدىككە قول جەتكىزگەن 25  جىلدىڭ ىشىندە  ءبارىمىز قيىندىقتاردى  بىرگە كوتەرىپ, جەتىس­تىكتەرىمىزدىڭ كىرپىشتەرىن  بىرگە قالاسىپ كەلەمىز. وسىنىڭ بارىنە ءبىز تەك ءبىر عانا اۋىزبىرشىلىگىمىزدىڭ ارقاسىندا عانا قول جەتكىزدىك. وسى تۇرعىدا باتىس قازاقستاننىڭ ەڭ ۇلكەن بايلىعى  قاراشىعاناق گاز-كەن ورنى ەكەنى انىق. بۇل – تەك ەلىمىزگە عانا ەمەس, اتى الەمگە ايگىلى كەنىش. ونىڭ ەلگە تيگىزگەن شاپاعاتى از ەمەس. تاۋەلسىزدىكتىڭ العاشقى جىل­دارىنداعى وتپەلى تۇستا جانە ودان كەيىنگى داعدارىستى كەزەڭدەردە ورال وڭىرىندە قازاق دراما تەاترى عيماراتى تۇرعىزىلىپ, ءساندى دە سالتاناتتى مەكتەپتەر, جاستارعا ارنالعان ساراي مەن قادىر ورتالىعىنىڭ سالىنۋى – وسىنىڭ ايعاعى. ءبىر سوزبەن ايتقاندا, قاراشىعاناق ەلىمىزدىڭ ۇلتتىق ماقتانىشىنا اينالدى. ونىڭ الەۋمەتتىك جوبالارعا بولەتىن قارجىلاي كومەگىنىڭ ناتيجەسىندە ايماقتا ءسانى مەن سالتاناتى كەلىسكەن ءبىلىم وشاقتارى بوي كوتەردى. ءما­دەنيەت پەن دەنساۋلىق ساقتاۋ نىساندارى سالىنىپ, پايدالانۋعا بەرىلدى. ەندىگى كەزەكتە وسى نىسان­داردا ءبىلىمدى ۇرپاق پەن ساۋاتتى مۇعالىمدەرىمىزدىڭ جەتكىلىكتى بولعانىن قالايمىز. باتىس قازاقستان وبلىسىن زا­مانىمىزدىڭ زاڭعار جازۋشىسى ءابىش كەكىلباەۆ «قازاقستاننىڭ ۆەناسى» دەپ اتادى. ويتكەنى, قۇر­مانعازى مەن داۋلەتكەرەي, مۇحيت پەن دينا وسكەن ورتا, ولار­دىڭ شىعارمالارى دۇنيەگە كەلگەن توپىراق مۋزىكا الەمىندە كەيىنگى ۇرپاقتى تەربەتىپ, تاربيەلەپ كەلەدى. بۇل ەلدە وپەرا مەن سوناتا سەكىلدى كلاسسيكالىق مۋزىكالاردى جازعان بازارباي جۇمانيازوۆ, قۇرمانعازى وركەسترىن الەمگە تانىتقان ديريجەر شامعون قاجىعاليەۆ دۇنيەگە كەلگەن. وسى توپىراقتا بۇگىنگى كۇنى قازاق تەاترىنا اتىن بەرۋدى بارشا باتىسقازاقستاندىقتار سۇراپ جۇرگەن حاديشا بوكەەۆاداي تالانتتى اكتريسانىڭ, تايىر جاروكوۆ پەن جۇبان مولداعاليەۆتاي, قادىر مىرزا الىدەي ۇلىلاردىڭ كىندىك قانى تامعان. بۇلار تەك ءبىر عانا ورالدىڭ ەمەس, قازاق ۇلتى مەن ۇلى دالا ەلىنىڭ برەندىنە اينالىپ كەلەدى. ادەبيەت پەن ونەردىڭ وسىنداي ءبىرتۋار تۇلعالارىنىڭ ەسىمدەرىن بولاشاق پەن كەلەر عاسىرلارعا جالعاۋ – ءبارىمىزدىڭ ورتاق پارىزىمىز. مۇنىڭ ءوزى ەڭ الدىمەن ۇرپاق تاربيەسى ءۇشىن قاجەت. مۇنداي ۇلى ەسىمدەردىڭ اتى-جوندەرى تەك ولاردىڭ ومىرگە كەلگەن نەمەسە ومىردەن وتكەن كۇندەرىندە عانا ساحنالاردان ەستىلىپ قالماۋى كەرەك. ولاردىڭ ەسىمدەرى اۋەجايلاردا قوناقتاردى قارسى الىپ, جارقىراپ تۇرعانى جاراسىپ كەتپەس پە ەدى؟ ويتكەنى, ءبىز قايتكەندە دە كەيىنگى ۇرپاقتى قالامگەرلەردىڭ ارتىنا قالدىرعان مۇرالارى ارقىلى تاربيەلەۋدى جوققا شىعارا الماساق كەرەك. الايدا, بۇگىنگى كۇندەرى جازۋشىلاردىڭ شىعارعان كىتاپتارى ءۇشىن قالاماقى تولەنبەيدى. كىتاپ جازىپ, كۇن كورۋ مۇمكىن ەمەس. قازىرگى بالالار مەن جاس جەتكىنشەكتەر كىتاپتاردى عالامتوردان وقيدى. قازىر كىتاپتاردىڭ تۇتاستاي ينتەر­نەتتىك نۇسقالارى پايدا بولۋدا. دەگەنمەن, كادىمگى باسپادان شىققان تۋىندىنىڭ جاس ۇرپاقتىڭ ساناسىنا بەرەتىن اسەرى مەن تاعىلىمى مول, بولەك ەكەنىن ايتقىم كەلە­دى. جوعارىدا ايتىلعانداي, ۇلى تۇلعالاردى دارىپتەيتىن جۋرنا­ليستەردىڭ الاتىن جالاقىسى دا ماردىمسىز. ماسەلەنىڭ وسى جاعىن دا مۇقيات ويلاستىرۋ كەرەك سەكىلدى. ءبىز ەرتەڭگى كۇنگە ۇلكەن سەنىممەن قارايمىز. بۇگىنگى جاستارىمىزدىڭ ساناسى تەرەڭ, بىلىمدەرى جەتكىلىكتى. قازاق ەلى ءبىلىمدى ۇرپاعىمەن مەيىرىمدى انالارى مەن جانە تاربيەلى قىزدارىمەن وزگە ۇلتتارمەن تەرەزەسى تەڭ ءومىر سۇرۋگە تولىق مۇمكىندىكتەرى بار. اقۇشتاپ باقتىگەرەەۆا, اقىن, حالىقارالىق «الاش» سىيلىعىنىڭ لاۋرەاتى ورال