ۆاحيد جانە ونىڭ كومانداسى

وتكەن ماۋسىمدا عانا ءبىرىنشى ليگادا ويناپ, بيىل پرەمەر-ليگادا ونەر كورسەتكەن ورالدىڭ «اقجايىق» فۋتبول كلۋبى چەمپيوناتتى ءبىرشاما ءساتتى باستاعانىمەن, ونى قورىتىندىلايتىن تۇستا ءبىراز تۇيىققا تىرەلدى. بۇعان كوماندا تىزگىنىن سول كەزگە دەيىن ۇستاپ كەلگەن تالعات ءبايسۋفينوۆتىڭ قازاقستان ۇلتتىق قۇراماسىن باسقارۋعا كەتىپ قالعانى تىكەلەي اسەر ەتتى. ءسويتىپ, دوپ دوداسىنىڭ ءبىرىنشى بولىگى مارەگە جەتىپ, كوماندالار التى كلۋبتان ەكى توپقا بولىنگەن كەزدە سوڭعى ورىنداعى «اقجايىق» ءوزىنىڭ الدىنداعى «تارازدان» تۋرا توعىز ۇپايعا قالىپ تۇردى. بۇل كەزدە اياقدوپتان حابارى بارلاردىڭ كوپشىلىگى ورال­دىقتاردان ءۇمىت ءۇزدى دەسە دە بولادى. كلۋبتى وسىنداي قيىن ساتتە قولعا العان تاعى ءبىر قازاق­ستاندىق مامان ۆاحيد ماسۋ­دوۆقا «اقجايىقتى» العا شىعارۋ وڭايعا تۇسكەن جوق. دەگەن­مەن, ونىمەن بىرگە جاڭا فۋتبول­شىلاردىڭ كەلۋى ويىندى قايتا قۇرۋعا مۇمكىندىك بەردى. سونىڭ ارقاسىندا كوماندا كاپيتانى مەيرام ساپانوۆ باستاعان جىگىتتەر بىرىنشىلىكتىڭ ەكىنشى ءبو­لى­گىن كەرەمەت ورلەۋ ۇستىندە وتكى­زىپ, 10 ويىننىڭ 8-ىندە قارسى­لاستارىنان باسىم ءتۇستى. مىنە, وسى كوزسىز ەرلىككە پارا-پار ويىنداردىڭ ناتيجەسىندە ورالدىقتار العا ۇزاپ كەتىپ قالعان كوماندالاردىڭ سوڭىنان «قوس اتپەن قۋىپ» شىعىپ, ولاردىڭ ەكەۋىنەن كومبەگە جەتە بەرگەندە باسىپ وزدى. ءسويتىپ, ءوزىنىڭ پرەمەر-ليگادا قالۋ جونىندەگى ماقساتىنا جەتتى. مۇنى باس جات­تىقتىرۋشى ۆاحيد ماسۋدوۆ تال­­دىقورعاندا وتكەن سوڭعى ويىن­­نان كەيىن: «ءبىزدىڭ وسىلاي جا­سايتىنىمىزعا ەشكىم سەنبەپ ەدى, ال ءبىز مەجەمىزدەن وتتىك», دەپ ءبىر اۋىز سوزبەن تۇيىندەپ بەردى. وسى رەتتە كوماندانىڭ بۇل تابىسقا سەلەكتسيالىق جۇمىستاردى دۇرىس جۇرگىزۋى ارقىلى جەتكەنىن دە ايتا كەتەيىك. بۇل جونىندە ءسوز ەتكەندە, پاراگۆايدان قازاقستانعا اياق باسقان ءبىرىنشى ويىنشى, جارتىلاي قورعاۋشى فرەددي كورونەل ورتيز الدىمەن اۋىز­عا ىلىگەدى. ماۋسىم باسىندا كەلگەن لەگيونەر ۇزاماي بەلدى وي­ىن­­شىلاردىڭ بىرىنە اينالدى. شا­بۋىلدى ۇيىمداستىرۋمەن بىرگە ستان­دارتتى جاعدايدى جاقسى ورىن­دايتىن فرەددي بىرىنشىلىك قورىتىندىسىندا 8 گولمەن «اقجايىقتىڭ» باس مەرگەنى اتاندى. كوماندانى ورگە سۇيرەگەندەر قاتارىندا تاجىريبەلى ەدۋارد سەرگيەنكو مەن سەربيالىق قورعاۋ­شى پرەدراگ گوۆەداريتسانى دا اتاپ وتۋگە بولادى. چەمپيوناتتىڭ ورتا تۇ­سىندا كەلگەن قاقپاشى دەنيس تولەباەۆ ارتىنشا ارىپتەستەرى نۇربولات قالمەنوۆ پەن رومان باگاۋتدينوۆتىڭ «ورنىن تارتىپ السا», نيگەريالىق مايكل وديبە ورتالىق قورعاۋشى دا­نيلو نيكوليچتى ىعىستىرىپ شىعاردى. سول سەكىلدى تىڭنان قوسىلعان راحىمجان روزىباكيەۆ, شابۋىل­شىلار, سەرب ميروسلاۆ لەچيچ پەن ۋكراين كونستانتين دۋدچەنكو ءبىراز سەرپىن قوستى. چەمپيونات سوڭىنا تامان چيلي ەلىنىڭ وكىلى ماتياس رۋبيو دا نەگىزگى قۇرامنان ءوز ورنىن تاپتى. فۋتبولدان 2018 جىلعى الەم چەمپيوناتىنىڭ ىرىكتەۋ تۋرنيرىندە قازاقستاننىڭ دانيا­مەن 11 قاراشا كۇنى وتەتىن كەزدەسۋ قارساڭىندا تاڭداۋلى 35 اياقدوپ شەبەرىنىڭ قاتارىندا «اقجايىقتان» ءۇش بىردەي ويىنشى, اتاپ ايتقاندا, وڭ قاپتالداعى قورعاۋشى ەلدار ابدراحمانوۆ, جارتىلاي قورعاۋشىلار رۋسلان ۆاليۋللين مەن راحىمجان رو­زىباكيەۆ ۇلتتىق قۇرامانىڭ وقۋ-جاتتىعۋ جيىنىنا شاقىرتۋ الدى. ارينە, 23 ويىنشىدان تۇ­راتىن تۇپكىلىكتى تىزىمگە ەنبەسە دە, ۇلتتىق قۇراما باپكەر­لەرىنىڭ كوزىنە ىلىگۋىنىڭ ءوزى – ۇلكەن جەتىستىك. تاعى ءبىر جايت, «اق­جايىق» فۋتبول كلۋبى وزگە ءارىپ­تەستەرىنە قاراعاندا, نەگىزىنەن ءوز تاربيەلەنۋشىلەرىنە سۇيەنەتىن كلۋب رەتىندە ەرەكشەلەنە الادى. ەندەشە, ول وسى باعىتتان تانباي, كەلەسى ماۋسىمعا تاس-ءتۇيىن دايىندالۋ كەرەكتىگى ايتپاسا دا تۇسىنىكتى بولسا كەرەك. عايساعالي سەيتاق, جۋرناليست تەمىر قۇسايىن, «ەگەمەن قازاقستان» ورال