باس پروكۋرور: ۇلتاراقتاي جەرگە يە بولۋ - ءار قازاقتىڭ ارمانى

قازاقستاننىڭ باس پروكۋرورى جاقىپ اسانوۆ بارشا قازاقستاندىقتاردى جەرمەن قامتۋ تۋرالى زاڭ جوباسىن جاساۋدى ۇسىندى. مەملەكەتتىك ورگانداردىڭ دەرەگى بويىنشا, 2016 جىلى جەر كەزەگىندە تۇرعان 1,4 ميلليون ادام بار. «ەلباسىنىڭ بارلىق xالىققا جەر بەرىڭدەر دەگەن تاپسىرماسى بار. بىراق, ارينە, xالىققا جەردى ايدالادان بەرمەيمىز عوي. وعان ينفراقۇرىلىم جۇرگىزۋ كەرەك, بالاباقشا مەن مەكتەپ كەرەك, اۋرۋxانا قاجەت, مۇنىڭ بارلىعى - اۋقىمدى شارۋا. بىراق دەگەنمەن ۇلتتىق ەكونوميكا مينيسترلىگى, اۋىل شارۋاشىلىعى مينيسترلىگى, وبلىستىق اكىمدەر, پروكۋراتۋرا - بارلىعىمىز وتىرىپ ويلاسساق. ءبىز مىنا نارسەنى ۇعۋىمىز كەرەك, اقشادان باسقا ءبىر ۇلكەن ماسەلە بار. ءاربىر قازاقتىڭ ارمانى - ۇلتاراقتاي جەر الىپ, مال اسىراپ, باقشا ەگۋ. ونىڭ ارمانى سول. كەڭ ءۇي سالىپ, كەلىن ءتۇسىرىپ, قولىنان ءشاي ءىشىپ, سولاي ەمەس پە!؟ ءبىزدىڭ قانىمىزعا سىڭگەن قاسيەت, مەنتاليتەتىمىز. ادامعا قانشا پاتەر بەرسەك تە, ونىڭ ءبارىبىر ارمانى - جەر ءۇي» دەدى باس پروكۋرور. ونىڭ ايتۋىنشا, وسى كەزدە جەردى زاڭسىز باسىپ الۋ فاكتىلەرى دە تىيىلار ەدى. «ەلباسى تاپسىرما بەردى. ءبىز ەندى وسىنى وتىرىپ, تەز ارادا, قانداي جولى بار, انىقتاپ, ويلاسىپ, ۇكىمەتكە ناقتى ۇسىنىس بەرۋىمىز كەرەك. سوندا xالىقتىڭ دا قاجەتتىلىگىن وتەيمىز, ەلباسىنىڭ دا تاپسىرماسىن ورىندايمىز», - دەپ ءتۇيدى ويىن ج. اسانوۆ. ەستەرىڭىزگە سالساق, بۇگىن باس پروكۋراتۋرادا ءوز بەتىمەن جەرلەردى باسىپ الۋعا قارسى جاڭا جوبا قابىلدانىپ, وسى ماسەلەلەردى شەشۋگە باعىتتالعان كەشەندى جوسپار بەكىتىلدى.