پەتروپاۆل قالاسىندا ءبىرىنشى ليگا كوماندالارى اراسىنداعى قر بىرىنشىلىگىندە 3-ورىنعا يە بولعان «قىزىلجار سق» فۋتبول كومانداسى ويىنشىلارىن ماراپاتتاۋ ءراسىمى ءوتتى.
كۇن قاھارماندارىن قىزىل كىلەمدە قارسى العان سولتۇستىك قازاقستان وبلىسىنىڭ اكىمى ەرىك سۇلتانوۆ سپورتشىلارعا قولا مەدال تابىستادى.
«بۇگىن سولتۇستىكقازاقستاندىق فۋتبول تاريحىنداعى ايتۋلى كۇن. ءبىرىنشى ليگا كوماندالارى اراسىنداعى قر بىرىنشىلىگىندەگى قولا مەدال – ءوڭىر ءيميدجىن قالىپتاستىرۋعا ۇلكەن ۇلەس قوسادى. سىزدەردىڭ جەتىستىكتەرىڭىز وسكەلەڭ ۇرپاققا ۇلگى. بولاشاقتا سىزدەر ۇزدىك سپورتتىق ناتيجەلەر مەن ءىرى جەڭىستەرگە جەتەتىندەرىڭىزگە زور سەنىم بىلدىرەمىن!», - دەدى ەرىك حامزا ۇلى.
ءوڭىر باسشىسى سپورتشىلاردىڭ باپكەرلەرىنە جوعارى ناتيجە كورسەتىپ, ۇزدىك سپورتشىلار تاربيەلەگەنى ءۇشىن العىسىن ءبىلدىردى.
سونىمەن قاتار, وبلىس باسشىسى سقو-دا فۋتبولدى دامىتۋ ءۇشىن ماتەريالدىق-تەحنيكالىق بازانىڭ نىعايتىلىپ, ينفراقۇرىلىمدى دامىتۋ جۇمىستارى قارقىندى جۇرگىزىلىپ جاتقانىن اتاپ ءوتتى. سوڭعى ەكى جىلدا 263 فۋتبول جانە شاعىن فۋتبول الاڭدارى سالىنسا, ونىڭ 46-ى زاماناۋي جاساندى جابىنمەن قاپتالعان. بۇگىندە «قاراساي» ستاديونىندا كۇردەلى جوندەۋ جۇمىستارى جۇرگىزىلۋدە. ال, سپورتشىلارىمىز جىل بويى جاتتىعا الۋى ءۇشىن «جاستار» ستاديونىندا جابىق فۋتبول مانەجىنىڭ قۇرىلىسى باستالدى.
سالتاناتتى شارا بارىسىندا ءوڭىر باسشىسى فۋتبولشىلارعا ءتۇرلى اتالىم بويىنشا ماراپاتتار تابىستادى. «ۇزدىك قاقپاشى» اتاعىنا تيمۋربەك زاكيروۆ يە بولسا, «ۇزدىك قورعاۋشى» بولىپ نەمانيا ۆيديچ تانىلدى. سونىمەن قاتار, اسلان جانۇزاقوۆ «ۇزدىك جارتىلاي قورعاۋشى», بوشكو ستۋپيچ «ۇزدىك شابۋىلشى», ال ءالي اليەۆ «ماۋسىمنىڭ ەڭ ۇزدىك ويىنشىسى» اتاندى.
«قىزىلجار سق» فۋتبول كلۋبىنىڭ كاپيتانى ەۆگەني اۆەرچەنكو وبلىس باسشىلىعىنا, باپكەرلەر شتابىنا, جانكۇيەرلەرگە قۇراما اتىنان العىسىن ءبىلدىردى.
