دۋشانبەدە قازاقستان ادەبيەتىنىڭ بۇرىشى اشىلدى

قازاقستان رەسپۋبليكاسى تاۋەلسىزدىگىنىڭ 25-جىلدىعىن اتاپ ءوتۋ شەڭبەرىندە قازاقستاننىڭ  دۋشانبە قالاسىنداعى ەلشىلىگىنىڭ باستاماسىمەن تاجىكستاننىڭ ۇلتتىق كىتاپحاناسىندا قازاقستاندىق ادەبيەت بۇرىشىنىڭ اشىلۋ سالتاناتى ءوتتى, دەپ حابارلايدى egemen.kz سىرتقى ىستەر مينيسترلىگىنىڭ سايتىنا سىلتەمە جاساپ. اشىلۋ سالتاناتىندا ەلشى نۇرلان سەيتىموۆ اتالعان ءىس-شارانى وتكىزۋ ەكى حالىقتىڭ باي ادەبي مۇراسىنىڭ ودان ءارى تىعىز جاقىنداسۋىنا, سونداي-اق قازاقستان مەن تاجىكستان اراسىنداعى مادەني-گۋمانيتارلىق بايلانىستاردىڭ نىعايۋىنا سەبەپ بولاتىنىن اتاپ ءوتتى. سونىمەن قاتار, قازاقستاندىق تاراپ جۇيەلى تۇردە جاڭارتىپ وتىراتىن قازاق, تاجىك, ورىس پەن اعىلشىن تىلدەرىندەگى قازاقستاندىق جانە تاجىكستاندىق اۆتورلاردىڭ كىتاپتارى ۇلتتىق كىتاپحانانىڭ قورىنا تابىس ەتىلدى. اتالمىش ءىس-شاراعا ۇلتتىق كىتاپحانانىڭ باسشىلىعى, «بايتەرەك» قازاق مادەني ورتالىعىنىڭ توراعاسى زاۋرە ءسامينوۆا, باق پەن تاجىكىستاننىڭ جوو ستۋدەنتتەرى قاتىستى.