قر World Botanic EXPO-2016 كورمەسىندە ۇزدىك ۇشتىككە كىردى

تۇركيانىڭ انتاليا قالاسىندا اياقتالعان «انتاليا ەكسپو - 2016» حالىقارالىق بوتانيكالىق كورمەسىندە قازاقستاندىق پاۆيلون قاتىسۋشى 54 مەملەكەتتىڭ ىشىنەن ءۇشىنشى ورىن الدى, دەپ حابارلايدى قر بعم ءباسپاسوز قىزمەتى. تۇركيادا التى اي بويى وتكەن World Botanic EXPO-2016 حالىقارالىق مامانداندىرىلعان كورمەسىندە قازاقستاندىق پاۆيلون باقشا ەكستەرەرى مەن ينتەرەرىن جاساۋ نوميناتسياسىندا ءۇشىنشى ورىن الدى. قازاقستاندىق پاۆيلوندى كورمە بارىسىندا 75 ەلدىڭ وكىلى تاماشالاعان. قازاقستاندىق پاۆيلوننىڭ ەكسپوناتتارىن قر بعم عىلىم كوميتەتى جانىنداعى بوتانيكا جانە فيتوينترودۋكتسيا ينستيتۋتى ازىرلەپ, كوپشىلىككە ۇسىنعان. پاۆيلون قوناقتارى پالەوبوتانيكالىق ۇلگىلەر جيىنتىقتارى تۇرىندە جاسالعان قازاقستاننىڭ فلوراسىنىڭ تاريحىمەن تانىسىپ, «قىزىل كىتاپقا» ەنگىزىلگەن سيرەك كەزدەسەتىن جانە جويىلىپ بارا جاتقان سەگىز اعاش تۇقىمداس وسىمدىك ءتۇرىن كورە الدى. ماراپاتتاۋ سالتاناتىندا ءسوز سويلەگەن «انتاليا ەكسپو-2016» ۇيىمداستىرۋ كوميتەتىنىڭ توراعاسى, تۇركيانىڭ ازىق-ت ۇلىك, اۋىل جانە مال شارۋاشىلىعى ءمينيسترى فارۋك چەليكتىڭ ايتۋىنشا, 191 كۇننىڭ ىشىندە كورمەگە 4,5 ميلليوننان اسا جەرگىلىكتى جانە شەتەلدىك قوناق كەلگەن. كەيبىر كۇندەرى كورمە قوناقتارىنىڭ سانى 70 مىڭنان اسقان. «انتاليا ەكسپو-2016» حالىقارالىق بوتانيكالىق كورمەسى ءوز جۇمىسىن 22 ساۋىردە باستاعان بولاتىن. كورمە فيلوسوفياسى - «بولاشاق ۇرپاقتىڭ جاسىل الەمى», باستى تاقىرىبى - «گۇلدەر مەن بالالار». كورمە اۋماعى 120 گەكتاردى قۇرادى, وندا 54 مەملەكەتتىڭ پاۆيلونى جۇمىس ىستەدى.