«تاۋەلسىز قازاقستان» پويىزى ەل ىشىنە جول تارتتى

كەشە قازاقستان حالقى اسسامبلەياسىنىڭ باستاماسىمەن ەل تاۋەلسىزدىگىنىڭ 25 جىلدىعى قۇرمەتىنە ارنالعان «تاۋەلسىز قازاقستان» پويىزى» رەسپۋبليكالىق اكتسياسى باستالدى. ناقتىلاي ايتقاندا, «تاۋەلسىز قازاقستان» اتتى پويىز ەل ىشىنە ساپارعا شىقتى. ەل تاۋەلسىزدىگىنىڭ 25 جىل­دى­عىن لايىقتى اتاپ ءوتۋ – بارشا قازاقستاندىقتىڭ ورتاق ماق­ساتى. وسىناۋ ۇلىق مەرەكەنى بار ءمۇم­كىن­دىگىنشە سالتاناتتى جاعدايدا قارسى الۋ قوعامىمىزعا ۇلكەن جاۋاپ­كەر­شىلىك جۇكتەيتىندەي. قازىرگى تاڭدا ەلىمىز بويىنشا تاۋەلسىزدىگىمىزدىڭ 25 جىلدىعىنا ارنالعان ءتۇرلى شارالار وتكىزىلۋدە. بۇلاردىڭ بارلىعى دا ەل مەرەيىن ءوسى­رىپ, حالىق بىرلىگىن نىعايتۋعا باعىتتالعان. مىنە, وسىنداي شارالاردىڭ ءبىرى كۇنى كەشە اس­تانادان باستاۋ الدى. ول قاشاندا ەل ىنتىماعىن ارتتىرۋعا بەلسەنە اتسالىسىپ جۇرگەن قازاقستان حالقى اسسامبلەياسىنىڭ باستاماسىمەن قولعا الىندى. وسى ارادا بۇل رەسپۋبليكالىق شارانىڭ نەگىزگى ماقساتىن ايتا كە­تەيىك. اكتسيا نەگىزىنەن ەلباسى – قا­زاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ باسشىلىعىمەن ەلىمىزدىڭ تاۋەلسىزدىك جىلدارىندا قول جەتكىزگەن تابىستارىن حالىققا تانىس­تىرۋدى, مەملەكەت دامۋىنىڭ باستى قاعيداتتارى اياسىندا قوعامدى بىرىكتىرۋدى, جاستاردىڭ پاتريوتتىق سەزىمدەرىن كوتەرۋدى, جۇرتشىلىقتى «ماڭگىلىك ەل» يدەياسى توڭىرەگىنە جۇمىلدىرۋعا ىقپال ەتۋدى, الەۋمەتتىك جانە مادەني ءىس-شا­رالار وتكىزۋدى, تۇرعىندارعا ءدارى­گەرلىك, الەۋمەتتىك, قۇقىقتىق قىز­مەت كورسەتۋدى, سونداي-اق, اۋىل شارۋا­شىلىعى مەن كاسىپكەرلىك سالالارى بويىنشا كەڭەس بەرۋدى كوزدەيدى. رەسپۋبليكالىق اكتسيانىڭ باستالۋ سالتاناتى استاناداعى تەمىر جول ۆوكزالىندا ۇيىمداستىرىلدى. وعان مەملەكەتتىك حاتشى گۇلشارا ءاب­دىقالىقوۆا, قحا توراعاسىنىڭ ورىنباسارى – حاتشىلىق مەڭگەرۋشىسى ەرالى توعجانوۆ, پارلامەنت ءما­جىلىسى توراعاسىنىڭ ورىنباسارى ۆلا­ديمير بوجكو, دەپۋتاتتار, قوعام قايراتكەرلەرى, قحا, ەتنومادەني بىرلەستىكتەر مەن جاس­تار ۇيىمىنىڭ مۇشەلەرى, زيالى قاۋىم وكىلدەرى, «قازاقستان تەمىر جولى» ۇك» اق قىزمەتكەرلەرى, قالا تۇرعىندارى قاتىستى. شارانىڭ باستالار ساتىندە ءسوز العان گۇلشارا ابدىقالىقوۆا اتالعان اكتسيانىڭ ءمان-ماڭىزىن اتاپ ءوتتى. – ەلىمىز بويىنشا تاۋەل­سىز­دىگىمىزدىڭ 25 جىلدىعىنا ارنالعان 200-دەن اسا ۇلكەن ءىس-شارالار ۇيىم­داستىرىلماق. سونىڭ ءبىرى – وزدەرىڭىز باس­تالۋ ساتىنە كۋا بولىپ وتىرعان «تاۋەلسىز قازاقستان» پويىزى» اكتسياسى. بۇل پويىز ساناۋلى مينۋتتاردان كەيىن ايماقتارعا, ەلدى مەكەندەرگە جول تارتقالى تۇر. اكتسيانىڭ نەگىزگى ماقساتى – ەلباسى نۇرسۇلتان نازارباەۆ باستاعان ۇلى ىستەردى, جەڭىستەردى پاش ەتۋ, ەل الدىندا تۇرعان اۋقىمدى مىندەتتەردى, «100 ناقتى قادام» ۇلت جوسپارىنىڭ نەگىزگى باعىتتارىن ءتۇسىندىرۋ. سونىمەن قاتار, «تاۋەلسىز قازاقستان» پويىزى ەل تۇرعىندارىنا دارىگەرلىك كومەك, الەۋمەتتىك قولداۋ كورسەتپەك. سونداي-اق, «جۇمىسپەن قامتۋ», «بيزنەستىڭ جول كارتاسى» باعدارلامالارى بويىنشا ءارتۇرلى كەڭەستەر بەرۋ دە اكتسيا اياسىندا باستى نازاردا بولادى. بۇلاردان بولەك, ونەر, ادەبيەت, قوعام قايراتكەرلەرى حالىقپەن كەزدەسۋلەر وتكىزەدى. مەن اتالعان شارانى ۇيىمداستىرۋشىلارعا العىس ايتامىن. بۇگىن ءبىز «تاۋەلسىز قازاقستان» پويىزىنا ءمىنىپ, ەل ىشىنە اتتاناتىن بەلسەندى ازاماتتارعا ءساتتى ساپار تىلەيىك, – دەدى مەملەكەتتىك حاتشى گ.ابدىقالىقوۆا. ءوز كەزەگىندە ەرالى توعجانوۆ تا «تاۋەلسىز قازاقستان» پويىزى» اكتسياسىنا قاتىسۋشىلارعا ءساتتى ساپار تىلەدى. – تاۋەلسىزدىك – ءبىزدىڭ ەڭ باس­تى قۇندىلىعىمىز. قازاقستاندى الەمگە تانىتقان, مەرەيىمىزدى تاسىتقان تاۋەلسىزدىگىمىز قۇتتى بولسىن! بۇگىن كوپتەگەن ازاماتتار ەل ىشىنە اتتانعالى تۇر. ولار تاۋەلسىزدىگىمىزدىڭ 25 جىلى ىشىندە قول جەتكىزىلگەن تابىستارىمىزدى حالىق اراسىنا ناسيحاتتايدى, «ماڭگىلىك ەل» يدەياسىن جۇرتشىلىققا تۇسىندىرەدى. سونداي-اق, جەرگىلىكتى جەرلەردەگى حالىققا كوپتەگەن سالالار بويىنشا كومەك كورسەتەدى. بۇل شاراعا مينيسترلىكتەر, ءۇش ۇلتتىق كومپانيا قولداۋ بىلدىرۋدە. «تاۋەلسىز قازاقستان» پويىزى 35 ەلدى مەكەنگە توقتاپ, ءوز قىزمەتىن حالىققا ۇسىنادى. ال 14 جەلتوقسان كۇنى بۇل پويىز الماتىعا كەلىپ توقتايدى. ياعني, وسى كۇنى 43 كۇندى قامتىعان اكتسيا اياقتالادى. ەندەشە, اكتسياعا ات سالىسۋشى ازاماتتارعا كوزدەگەن ماقساتتارىن ابىرويمەن ورىنداپ شىعۋىنا, امان-ەسەن ورالۋلارىنا شىن جۇرەكتەن تىلەك بىلدىرەمىز, – دەدى ە.توعجانوۆ. قازاقتىڭ تۇڭعىش عارىشكەرى, حالىق قاھارمانى توقتار ءاۋ­باكىروۆ بۇگىنگى شارانى ۇيىم­داستىرۋشىلارعا العىسىن جەتكىزە كەلىپ, تاۋەلسىزدىكتىڭ 25 جىلدىعى قارساڭىندا قولعا الىنعان اۋقىمدى اكتسيا ماقساتىندا ۇلكەن ماعىنا بار ەكەنىن ءسوز ەتتى. – قۇرمەتتى اعايىن! مىنە, ەلىمىزدىڭ تاۋەلسىزدىگىنە 25 جىل تولدى. وسىعان وراي ۇلكەن اكتسيا ۇيىمداستىرىلىپ وتىر. بۇگىن ءبىز «تاۋەلسىز قازاقستان» پويىزىن جاۋاپتى دا ابىرويلى ساپارعا شىعارىپ سالعالى تۇرمىز. بۇل پويىز ەلىمىزدىڭ تۇكپىر-تۇكپىرىن ارالاپ, ءوز مىندەتىن ويداعىداي ورىنداپ شىعادى دەپ ويلايمىن. حالىققا الەۋمەتتىك كومەك كورسەتىپ, تۇرعىندارعا قولداۋ ءبىلدىرۋدى ماقسات ەتىپ وتىرعان پويىزدىڭ جولعا شىعۋىن ءوزىم وڭدى باستاما دەپ ەسەپتەيمىن. جالپى, ەلىمىزدىڭ جەتىستىگى كوپ. ولاردىڭ بارلىعى تۇگەل ايتىلىپ جۇرگەن جوق. مىنە, وسى ايتىلماي جۇرگەن تابىستارىمىزدى جارقىراتىپ كورسەتۋىمىز كەرەك. بۇل ءوز كەزەگىندە حالىقتىڭ رۋحىن كوتەرەدى, جاستاردىڭ پاتريوتتىق سەزىمدەرىن ارتتىرادى. اسىرەسە, قازاقستاننىڭ 25 جىل ىشىندە حالىقارالىق ارەنادان لايىقتى ورنىن تاپقانىن ايرىقشا اتاپ كورسەتۋىمىز كەرەك. سونىمەن قاتار, جاستارىمىزدى تاربيەلەپ, ولارعا ءبىلىم بەرۋدە كوپتەگەن جۇمىستار اتقارىلدى. بۇل دا تاۋەلسىزدىكتىڭ جەمىسى. وسىنىڭ بارلىعى بۇگىن باستالعالى وتىرعان اكتسيا بارىسىندا حالىققا تۇسىندىرىلەدى دەپ ويلايمىن, – دەدى حالىق قاھارمانى. بۇدان كەيىن پارلامەنت ءماجى­لىسى توراعاسىنىڭ ورىنباسارى ۆلا­ديمير بوجكو, ءماجىلىس دەپۋتاتى گەننادي شيپوۆسكيح ءسوز ءسوي­لەپ, اكتسيانىڭ ماڭىزدىلىعىن, ونىڭ ماقساتى ىزگىلىككە نەگىزدەلىپ وتىر­عانىن اتاپ ءوتتى. سونىمەن بىرگە, اكتسيانىڭ اشىلۋ سالتاناتىندا قازاقستاندىق ونەر جۇلدىزدارى ءان شىرقاپ, جينالعان قاۋىمنىڭ كوڭىلىن ودان ءارى كوتەرە ءتۇستى. سونىمەن, ساعات 14:15-تە تاۋەل­سىزدىكتىڭ 25 جىلدىعىنا ارنالعان اكتسيا اياسىندا «قازاقستان تەمىر جولى» ۇك» اق جابدىقتاعان «تاۋەلسىز قازاقستان پويىزى جولعا شىقتى. استانادان باستاۋ العان پويىزدىڭ العاشقى ايالداماسى – قاراعاندى. بۇل پويىزدا رۋسلان باربوسوۆ باستاعان ارنايى بريگادا قىزمەت كورسەتەدى. ايتا كەتەيىك, «تاۋەلسىز قازاق­ستان» پويىزى» رەسپۋبليكالىق اك­تسيا­سى – تاۋەلسىزدىگىمىزدىڭ 25 جىل­دى­عىنا ارنالعان ءىرى ءىس-شارالار­دىڭ ءبىرى. وعان قازاقستان حالقى اس­سام­بلەياسىنىڭ, «نۇر وتان» پار­تياسىنىڭ مۇشەلەرى, پارلامەنت ءماجى­لىسىنىڭ دەپۋتاتتارى, مادە­نيەت جانە سپورت مينيسترلىگى, عى­لىم جانە ءبىلىم مينيسترلىگى, ءادى­لەت مينيسترلىگى, ۇلتتىق ەكونوميكا مينيسترلىگى, دەنساۋلىق ساق­تاۋ جانە الەۋمەتتىك دامۋ مينيستر­لىگى, اقپارات جانە كوممۋنيكا­تسيالار مينيسترلىگى, اۋىل شارۋاشىلىعى مينيسترلىگى, ىشكى ىستەر مينيسترلىگى, پرەزيدەنت جانىنداعى «قوعامدىق كەلىسىم» رەس­پۋبليكالىق مەملەكەتتىك مەكەمەسى قىزمەتكەرلەرى, زيالى قاۋىم, جاس­تار ۇيىمدارى جانە باق وكىلدەرى قاتى­سۋدا. سونداي-اق, شاراعا «اتا­مەكەن» ۇكپ, «بايتەرەك» ۇلتتىق باسقارۋشى حولدينگى» اق, «دامۋ» كاسىپكەرلىكتى دامىتۋ قورى» اق جانە وزگە دە ۇيىمدار اتسالىسۋدا. تاعى ءبىر ايتا كەتەر جايت, قحا قوعامدىق كەلىسىم كەڭەستەرى مەن «نۇر وتان» پارتياسىنىڭ قابىل­داۋ­لارىندا ءماجىلىس جانە جەرگىلىكتى ءماسليحاتتار دەپۋتاتتارىنىڭ قاتىسۋىمەن كونسۋلتاتيۆتىك قىزمەت ۇسىنىلادى. بۇدان بولەك, اكتسيا اياسىندا قايىرىمدىلىق شارالارى دا باستى نازاردا بولماق. دالىرەگى, پويىز باعىتىنداعى قالا­لار مەن ەلدى مەكەندەر كىتاپحا­نالارىن كىتاپتار توپتاماسىمەن قامتاماسىز ەتەتىن «قحا تەڭدەسسىز سىي», بالالار مەن جاسوسپىرىمدەر ۇيىنە ارنالعان «قايىرىمدىلىق كەرۋەنى» اتتى شارالار وتكىزىلەدى. سونىمەن قاتار, اكتسيا شەڭ­بەرىندە «تاۋەلسىزدىك تاريحى – ۇلت رۋحىنىڭ ولشەمى», «ماڭگىلىك ەل – بولاشاعى ءبىرتۇتاس ۇلتتىڭ رۋحاني نەگىزى», «بەيبىتشىلىك پەن كەلىسىم ۇلگىسى – قازاقستان برەندى», «قحا – قوعامدىق كەلىسىمدى نىعايتۋداعى باس مەدياتور» تاقىرىپتارىندا كەزدەسۋلەر مەن تانىستىرىلىمدار ۇيىمداستىرىلماق. بۇعان قوسىمشا جەتەكشى شىعارماشىلىق ۇجىمداردىڭ, قازاقستاندىق ونەر شەبەرلەرىنىڭ, وڭىردەگى دارىندى جاستاردىڭ مەرەكەلىك كونتسەرتىن وتكىزۋ دە اكتسيا جوسپارىندا بار. سونداي-اق, جوعارىدا اتالعان مينيسترلىكتەردىڭ وكىلدەرى تارا­پى­نان حالىققا قاجەتتى كەڭەستەر بەرىلەدى. ناقتىلاي ايتقاندا, دەنساۋ­لىق سالاسى بويىنشا ءدارى­گەرلىك كەڭەس بەرىلىپ, تولىققاندى مەدي­تسينالىق تەكسەرۋ قىزمەتى كورسە­تىلەدى. ال الەۋمەتتىك ماسەلە­لەر بويىنشا «جۇمىسپەن قامتۋدىڭ جول كارتاسى-2020» باعدارلاماسىنا, ازامات­تار­دىڭ ەڭبەك قۇقىعىن قورعاۋ, زەينەت­اقىمەن قامتاماسىز ەتۋ, جاردەماقى تولەۋ ىستەرىنە قاتىستى كەڭەستەر ۇسىنىلادى. زاڭ سالاسىنا قاتىستى جىلجىمايتىن م ۇلىكتى ەسەپكە الۋ, اليمەنتتەردى تولەۋ, زاڭدى تۇلعانى تىركەۋ, كاسىپوداق قىزمەتى جونىندە جانە تاعى باسقا دا باعىتتاردا كەڭەستەر بەرىلەدى. سول سياقتى, اۋىل شارۋاشىلىعى سالاسىنا بايلانىستى كەڭەس بەرۋ قىزمەتى دە باستى نازاردا بولماق. دالىرەگى, تۇرعىندار ءتيىستى ورگان وكىلدەرىنەن جەر قاتىناستارىنا, ەگىن جيناۋ ناۋقانىنا, كووپەراتسيانى دامىتۋعا, جەكە قوسالقى شارۋاشىلىققا, ەت, ءسۇت ونىمدەرىن وندىرۋگە, وسىمدىكتەردى قورعاۋعا, اسىل تۇقىمدى مال ءوسىرۋ جانە باسقا دا ماسەلەلەرگە قاتىستى ماعلۇماتتار الا الادى. بۇعان قوسا, ءبىلىم سالاسى بويىنشا دا كەڭەس بەرۋ ءىسى جولعا قويىلادى. ياعني, جەرگىلىكتى تۇرعىندار جوعارى ءبىلىم بەرۋ, تەحنيكالىق جانە كاسىبي ءبىلىم بەرۋدىڭ باسىم باعىتتارى تۋرالى اقپاراتتار الاتىن بولادى. جولدىباي بازار, «ەگەمەن قازاقستان» سۋرەتتەردى تۇسىرگەن ەرلان وماروۆ, «ەگەمەن قازاقستان»