2001
* 26 قىركۇيەكتە ەلباسى نۇرسۇلتان نازارباەۆ اقش پرەزيدەنتى دجوردج بۋشپەن تەلەفون ارقىلى سويلەستى. ن.ءا.نازارباەۆ قازاقستاننىڭ تەرروريزمگە قارسى كۇرەسكە ءسوز جۇزىندە عانا ەمەس, ءىس جۇزىندە دە قاتىسۋعا جانە بۇل ۇدەرىسكە جاردەم كورسەتۋگە ءازىر ەكەنىن مالىمدەدى. دج.بۋش حالىقارالىق تەرروريزممەن كۇرەس ماسەلەسىندە كورسەتكەن بەكەمدىگى ءۇشىن قازاقستان پرەزيدەنتىنە العىس سەزىمىن ءبىلدىردى. وسى كۇنى ۋكراينا پرەزيدەنتى لەونيد كۋچما رەسمي ساپارمەن استاناعا كەلدى. ەكى ەل پرەزيدەنتتەرى ن.نازارباەۆ پەن ل.كۋچما بىرىككەن مالىمدەمەگە قول قويدى.
* 1 قازاندا ەلباسى نۇرسۇلتان نازارباەۆ گەرمانيا فەدەراتسيالىق رەسپۋبليكاسىنا رەسمي ساپارمەن باردى. ەرتەڭىنە وتكەن قازاقستان پرەزيدەنتى مەن گفر فەدەرالدىق كانتسلەرى گەرحارد شرەدەردىڭ كەزدەسۋىندە قازاقستان ەكونوميكاسىنىڭ ىرعاقتى دامۋىن قامتاماسىز ەتۋ ءۇشىن نەمىس جاعىنىڭ ينۆەستيتسيالىق بەلسەندىلىگىن ارتتىرۋعا قولايلى احۋال تۋعىزۋ قاجەتتىگى جونىندە ورتاق ۇيعارىم جاسالدى.
بۇل تۋرالى «ەگەمەن قازاقستان» گازەتىنىڭ 3 قازان كۇنگى نومىرىندە «گەرمانيامەن ارىپتەستىك بايلانىس» تاقىرىبىمەن ماقالا جارىق كوردى.
* 3 قازاندا پرەزيدەنت نۇرسۇلتان نازارباەۆ جۇمىس ساپارىمەن انكاراعا كەلىپ, تۇركيا پرەزيدەنتى احمەت نەدجدەت سەزەرمەن كەزدەسۋ وتكىزدى.
* 13 قازاندا امەريكا قۇراما شتاتتارىندا كۇيدىرگى اۋرۋىن جۇقتىرۋ جاعدايلارىنا قازاقستاننىڭ قاتىسى بار-مىس دەيتىن جاريالانىمداردىڭ اقش-تىڭ بىرقاتار اقپارات قۇرالدارىندا پايدا بولۋىنا بايلانىستى سىرتقى ىستەر مينيسترلىگى قازاقستان يادرولىق قارۋسىزدانۋ, حيميالىق جانە بيولوگيالىق قارۋدى جويۋ سالاسىنداعى حالىقارالىق شارتتار شەڭبەرىندە وزىنە العان مىندەتتەمەلەردى ورىنداۋعا, سونداي-اق باكتەريولوگيالىق (بيولوگيالىق) جانە ۋلاعىش قارۋدى ءوندىرۋ مەن جيناقتاۋعا تىيىم سالۋ جانە ونى جويۋ تۋرالى كونۆەنتسيانىڭ قاعيداتتارىن ساقتاۋعا تولىق ادال بولىپ وتىر دەپ مالىمدەدى.
* 17 قازاندا قازاقستان رەسپۋبليكاسىنىڭ دەنساۋلىق ساقتاۋ ءىسى جونىندەگى اگەنتتىگى قازاقستان رەسپۋبليكاسىنىڭ دەنساۋلىق ساقتاۋ مينيسترلىگى بولىپ قايتا قۇرىلدى.
* 20 قازاندا ەلىمىز ءوز تاۋەلسىزدىگىنىڭ ون جىلدىعىن اتاپ ءوتىپ جاتقان جىلى تىڭ يگەرگەننەن بەرگى ەڭ بىتىك ‑ گەكتارىنا 14 تسەنتنەردەن استام ورتاشا ءتۇسىم جاعدايىندا 18 ميلليون توننادان ارتىق استىق ءوسىرىلىپ, جيناپ الىندى. پرەزيدەنت نۇرسۇلتان نازارباەۆ رەسپۋبليكا ديقاندارىن قۇتتىقتاۋىندا وسىناۋ ەڭبەك تابىسىن «مەملەكەتتىڭ ەكونوميكالىق الەۋەتىن قالىپتاستىرۋعا عانا ەمەس, سونىمەن بىرگە ءىرى استىق وندىرۋشىلەردىڭ ءبىرى رەتىندە قازاقستاننىڭ الەم جۇرتشىلىعى الدىنداعى بەدەلىن ارتتىرۋعا قوسىلعان لايىقتى ۇلەس» رەتىندە باعالاعان. راسىندا دا, دابىرا-دۇرمەكسىز بىتكەن وراق ناۋقانىندا بۇرىنعى ولشەممەن ايتقاندا, 1 ميلليارد پۇتتان استام استىق جينالعانى ەل ەكونوميكاسى الەۋەتىنىڭ اناعۇرلىم ارتا تۇسكەنىنە داۋسىز دالەل.
*24 قازاندا قازاقستان حالقى اسسامبلەياسىنىڭ VIII سەسسياسى بولىپ ءوتتى. «تاۋەلسىزدىگىمىزدىڭ ون جىلى: بەيبىتشىلىك, پروگرەسس جانە قوعامدىق كەلىسىم» تاقىرىبىندا ەلباسى – قازاقستان حالقى اسسامبلەياسىنىڭ توراعاسى نۇرسۇلتان نازارباەۆ ءسوز سويلەدى. ەل باسشىسى مەملەكەتتىك ۇلتتىق ساياساتتى ىسكە اسىرۋدىڭ نەگىزگى تەتىگى رەتىندە اسسامبلەيا جۇمىسىنىڭ تيىمدىلىگىن ارتتىرۋ قاجەتتىگى ءپىسىپ-جەتىلگەنىن اتاپ كورسەتىپ, قازاقستان قوعامىن توپتاستىرۋ, ەتنوسارالىق ساياساتتا الەۋمەتتىك جانە ەكونوميكالىق ارنانى كەڭەيتۋ, جاستارعا پاتريوتتىق تاربيە بەرۋدى كۇشەيتۋ, جالپىقازاقستاندىق مادەنيەتتىڭ ودان ءارى دامي بەرۋىنە جاردەمدەسۋ مىندەتتەرىن العا تارتتى. «ەلىمىزدەگى ءوزارا سەنىمگە نەگىزدەلگەن ەتنوسارالىق, ەتنومادەني جانە دىنارالىق قاتىناستاردى نىعايتۋ, قازاقستان قوعامىنداعى رۋحاني كەلىسىم ساباقتاستىعىن ورنىقتىرا بەرۋ – ءبىزدىڭ نەگىزگى مىندەتىمىز», دەدى پرەزيدەنت.
* 1 قاراشادا وڭتۇستىك قازاقستان وبلىسىنىڭ ماقتاارال اۋدانىندا سىرداريا وزەنىنىڭ ۇستىنەن تارتىلعان كوپىردى اشۋ سالتاناتى ءوتتى. ونىڭ ۇزىندىعى – 431 مەتر. «تاۋەلسىزدىكتىڭ ءبىرىنشى كۇنىنەن باستاپ حالىقتىڭ وسى جولدى اڭساعانىن مەن بىلەمىن. 54 شاقىرىمدىق جول بۇرىنعى 120 شاقىرىمدىق اينالما جولدى قىسقارتىپ وتىر. ەندى وتانداستارىمىز ەلمەن قارىم-قاتىناستى ەشكىمگە كىرىپتار بولماي جاساي الادى», دەدى ەلباسى نۇرسۇلتان نازارباەۆ كوپىردى اشاردا سويلەگەن سوزىندە. بۇل تۋرالى «ەگەمەن قازاقستان» گازەتىندە «ساۋاپتىڭ ۇلكەنى – كوپىر سالۋ» تاقىرىبىمەن ماقالا جاريالاندى.
* 6 قاراشادا قازاقستان رەسپۋبليكاسى ۇلتتىق عىلىم اكادەمياسىنىڭ ەل تاۋەلسىزدىگىنىڭ 10 جىلدىعىنا ارنالعان سەسسياسى بولىپ ءوتتى. سەسسيادا ءسوز سويلەگەن پرەزيدەنت نۇرسۇلتان نازارباەۆ ۇلتتىق عىلىم اكادەمياسىنىڭ وسى جىلداردا اتقارعان قوماقتى ىستەرىمەن قاتار, جاسالماي جاتقان جۇمىستاردىڭ دا كوپتىگىنە نازار اۋداردى. ەلباسى سول كۇنى «قازاقستان رەسپۋبليكاسى ۇلتتىق عىلىم اكادەمياسىنىڭ كەيبىر ماسەلەلەرى تۋرالى» وكىمگە قول قويدى. وكىم بويىنشا اكادەميانىڭ قىزمەتىن جەتىلدىرۋ جونىندەگى ۇسىنىستاردى تالداپ-جاساۋ ءۇشىن ۆەدومستۆوارالىق كوميسسيا قۇرىلدى, كوميسسياعا ءۇش اي مەرزىمدە عىلىمنىڭ جاي-كۇيىن, ونىڭ الەمدىك دامۋ ۇردىستەرىن, عىلىمي-تەحنيكالىق سالانى باسقارۋدىڭ قازىرگى تاڭداعى ۇيىمداستىرىلۋىن, ەلدىڭ قازىرگى بار عىلىمي كادرلارى مەن عىلىمي-تەحنيكالىق الەۋەتىن, ماتەريالدىق-تەحنيكالىق بازاسىنىڭ جاي-كۇيىن تالداۋ تاپسىرىلدى.
*29 قاراشادا ماسكەۋدە تمد-نىڭ قۇرىلعانىنا 10 جىل تولۋىنا وراي مەرەكەلىك سامميت ءوتتى. وعان ەلباسى نۇرسۇلتان نازارباەۆ قاتىستى. وسى كۇنى قازاقستان مەن ازەربايجان اراسىندا كاسپي تەڭىزىنىڭ تابانىن مەجەلەۋ تۋرالى كەلىسىمشارتقا قول قويىلدى.
*16 جەلتوقساندا قازاق ەلى ءوزىنىڭ العاشقى مەرەيتويىن – تاۋەلسىزدىكتىڭ ون جىلدىعىن اتاپ ءوتتى. استاناداعى كونگرەسس-حوللدا قازاقستان رەسپۋبليكاسىنىڭ مەملەكەتتىك تاۋەلسىزدىگىنىڭ 10 جىلدىعىنا ارنالعان سالتاناتتى ءماجىلىس وتكىزىلدى. ماجىلىستە پرەزيدەنت نۇرسۇلتان نازارباەۆ بايانداما جاسادى.
*17 جەلتوقساندا پرەزيدەنت ن.ءا.نازارباەۆ جۇمىس ساپارىمەن يسپانياعا باردى. يسپانيا ۇكىمەتىنىڭ باسشىسى حوسە ماريا اسنارمەن «مونكلوا» رەزيدەنتسياسىندا وتكەن كەلىسسوزدەر بارىسىندا ەكى جاق حالىقارالىق جاعدايدىڭ كوكەيكەستى ماسەلەلەرى جانە قازاقستان-يسپانيا قارىم-قاتىناستارىنىڭ قازىرگى جاي-كۇيى مەن بولاشاعى تالقىلاندى.
*18-21 جەلتوقسان ارالىعىندا پرەزيدەنت ن.ءا.نازارباەۆ جۇمىس ساپارىمەن اقش-قا باردى. ەكى ەل پرەزيدەنتتەرى ۇزاق مەرزىمدى ستراتەگيالىق سەرىكتەستىكتى نىعايتۋ تۋرالى مالىمدەمەگە قول قويدى.
*22 جەلتوقساندا پرەزيدەنت ن.ءا.نازارباەۆ لوندونعا جۇمىس ساپارىمەن باردى. ساپار بارىسىندا كوپتەگەن مەملەكەت جانە قوعام قايراتكەرلەرىمەن, سونىڭ ىشىندە ۇلىبريتانيانىڭ بۇرىنعى پرەمەر-ءمينيسترى م.تەتچەرمەن كەزدەستى.
