ەلىمىزدە دەنە شىنىقتىرۋ مەن سپورتتىڭ دامۋىنا, ونىڭ بۇقارالىق سيپات الۋىنا ايرىقشا كوڭىل ءبولىنىپ كەلەدى. بۇل سالاداعى ەڭ باستى ماقسات – جەرگىلىكتى تۇرعىنداردىڭ, ونىڭ ىشىندە جاستاردىڭ سالاماتتى ءومىر سالتىن ۇستانۋ ارقىلى دەنساۋلىعىن ساقتاۋعا ىقپال ەتۋ, سپورت نىساندارىنىڭ قولجەتىمدىلىگىن ارتتىرۋ. مىنە, ەل تاۋەلسىزدىگىنىڭ 25 جىلدىعىنا وراي جامبىل وبلىسى, شۋ قالاسىندا اشىلعان زاماناۋي دەنەشىنىقتىرۋ جانە ساۋىقتىرۋ كەشەنى وسى باعىتتا ءوز جۇمىسىن باستاپ كەتتى. كسرو ەڭبەك سىڭىرگەن جاتتىقتىرۋشىسى يۋري تسحايدىڭ باستاماسىمەن قولعا الىنعان بۇل سپورت كەشەنى مەملەكەتتىك-جەكەمەنشىك ءارىپتەستىك نەگىزىندە سالىندى. جوبالىق سمەتالىق قۇنى 480 ملن. تەڭگەنى قۇرايدى.
الداعى ۋاقىتتا سپورت سۇيەتىن بالالاردىڭ ناعىز ورداسىنا اينالاتىن بۇل جاڭا عيمارات سپورتتىق-ساۋىقتىرۋ بلوگى مەن جاتاقحانادان تۇرادى. سونداي-اق, ترەناجەر, تاەكۆوندو, بوكس, كۇرەس زالدارىمەن قامتىلعان. 24 توسەك-ورىنعا ارنالعان ون بولمە, 16 ورىنعا ارنالعان اسحانا جانە بۋفەت بار. وسى تۇستا ايتا كەتۋ كەرەك, بۇگىنگى كۇنى وبلىستاعى جالپى سپورت نىساندارىنىڭ سانى 2016-نى قۇرايدى.
سوڭعى جىلدارى بۇل وڭىردە مەملەكەتتىك-جەكەمەنشىك ءارىپتەستىك شەڭبەرىندە سالىنعان نىساندار قاتارى كوبەيىپ كەلەدى. سونىڭ دالەلى رەتىندە شۋ قالاسىندا اشىلعان «ارايلىم» بالاباقشاسىن دا ايتۋعا بولادى. 150 ورىندىق ءۇش قاباتتى عيماراتتىڭ قۇرىلىس جۇمىستارىن مەردىگەر «كومپانيا-مارك» جشس ءوتكەن جىلى باستاعان بولاتىن. جوبانىڭ جالپى قۇنى 340 ملن تەڭگەنى قۇرايدى.
بۇل مەملەكەتتىك-جەكەمەنشىك ارىپتەستىك باعدارلاماسى اياسىندا اشىلعان ەلۋىنشى بالاباقشا ەكەن. قازىرگى تاڭدا شۋ اۋداندا 943 ءبۇلدىرشىن بالاباقشا كەزەگىندە تۇر. «ارايلىم» بالاباقشاسىندا مەكتەپ جاسىنا دەيىنگى ءبۇلدىرشىندەرگە ءبىلىم بەرۋ جانە وقىتۋ ءۇشىن قاجەتتى نارسەنىڭ ءبارى بار. بالاباقشادا مۋزىكا, سپورت زالدارى, ويىن بولمەلەرى, ءتورت مەديتسينالىق كابينەت, اكىمشىلىك كەڭسەلەر, سونداي-اق بالالار ويىن الاڭى سوعىلعان.
ورالحان ءداۋىت,
«ەگەمەن قازاقستان»
جامبىل وبلىسى
سۋرەتتەردى تۇسىرگەن
اقادىل رىسماحان
