قۇقىق قورعاۋشىلار كوكپاردى قولدايدى

پاۆلودار وبلىسىنىڭ ماي اۋدانىنا قاراستى كەڭتۇبەك اۋىلىندا كوكپار تارتۋدان اۋداندىق ىشكى ىستەر ءبولىمىنىڭ كۋبوگى ءۇشىن اۋداننىڭ اشىق بىرىنشىلىگى ءوتتى. ال مۇنىڭ الدىندا اۋداندىق پروكۋراتۋرانىڭ باستاماسىمەن وسىنداي كوكپار جارىسى وتكەن ەدى. جالپى, اۋىل مەن اۋدان اۋما­عىندا كوكپارشىلاردى شاقىرىپ, جارىس وتكىزىپ تۇرۋدىڭ وسكەلەڭ ۇرپاققا بەرەتىن ونەگەسى كوپ. وب­لىستاعى نەگىزىنەن كوكپارشى جىگىتتەرىمىز ەكىباستۇزدىڭ اقكول اۋىلىندا, باياناۋىلدا, ماي اۋدانىندا, اقسۋدا تۇرادى. بۇعان دەيىن اۋدان ورتالىعى – كوكتوبە اۋىلىنىڭ ماڭىندا كوكپار ويىنىنىڭ جاناشىرى بولعان, سوعىس ارداگەرى حاسەن سەيىتقازيندى ەسكە الۋعا ارنالعان وبلىستىق چەمپيونات وتكەن بولاتىن. وندا ەكىباستۇزدىڭ اقكول اۋىلىنىڭ «پىراق», «سامۇرىق» جانە ماي اۋدانىنىڭ «ساتى» كوماندالارى جۇلدەلى ورىنداردان كورىندى. كوكپارشىلاردىڭ ايتۋلارىنشا, «پىراقتىڭ» كاپيتانى داۋرەن جانداربەكوۆ, ورازالى ءشوپشين باستاعان ەركەبۇلان ەگىنباەۆ, مەرەكە سماعۇلوۆ, ەر­عا­نات قادىروۆ, نۇربول جاق­سى­بەكتەر ءۇشىن كوكپار ويىن عانا ەمەس, ءومىر ءسۇرۋ سالتىنا اينالىپتى. اۋداندا وتكەن بۇل جولعى كوكپار جارىسىنا مالايسارى, كەڭتۇبەك, اقشيمان, ساتى اۋىل­دارىنىڭ كوماندالارى قاتىستى. ۇزدىك ۇشتىكتە كورىنگەن مالايسارى, كەڭتۇبەك اۋىلدارى كومانداسىنىڭ ارنايى سىي­لىعىن اۋداندىق ىشكى ىستەر ءبولىمى جەرگىلىكتى پوليتسيا قىز­مەتىنىڭ باستىعى, پوليتسيا پود­پولكوۆنيگى بەرەكە احمەتوۆ تابىس ەتتى. ەكىنشى ورىن يەلەنگەن اقشيمان كوكپارشىلارىن ارنايى جۇلدەسىمەن اۋدان پروكۋرورى سەرجان تەمىروۆ ماراپاتتادى. ال ءبىرىنشى ورىنعا يە بولعان ساتى كومانداسىنا ارنايى جەڭىمپازعا بەرىلەر كۋبوكتى اۋداندىق ىشكى ىستەر ءبولىمىنىڭ باستىعى نىعمەتوللا قابباسوۆ تابىستادى. جارىستىڭ ەڭ ۇزدىك شابۋىلشىسى جۇلدەسىن الماس جۇماعاليعا ىشكى ىستەر ءبولىمى باستىعىنىڭ ورىنباسارى, پوليتسيا پودپولكوۆنيگى بەرىك زابيەۆ تاپسىردى. اۋىلداردا ات باپتاپ, كوكپار تارتۋعا قۇمار جاستار كوبەيىپ كەلە جاتقانى, ارينە, قۋانتادى. بيىل قىرعىزستاندا وتكەن ءىى ءدۇ­نيەجۇزىلىك كوشپەندىلەر ويى­نىندا ءبىزدىڭ وبلىستان اقسۋلىق بەكبولات ىسقاقوۆ باردى. بەكبولات تا كوك­پارشى, يت جۇگىرتىپ, قۇس سالۋدى سەرىك ەتكەن ساياتشى. ال كوكپارعا قۇمارتقان قۇقىق قورعاۋشىلاردىڭ ۇلتتىق ويىنىمىزعا قولداۋ كورسەتكەن باستاماسى جاقسى-اق. فاريدا بىقاي, «ەگەمەن قازاقستان» پاۆلودار وبلىسى, ماي اۋدانى