نەسيەگە اۋىل شارۋاشىلىعى تەحنيكاسىن جاڭا تاسىلمەن الۋعا بولادى

اۋىل شارۋاشىلىعى تەحنيكاسىن نەسيەلىك سەرىكتەستىكتەر ارقىلى ساتىپ الۋ قازاقستاندىق شارۋالار اراسىندا كەڭ تاراعان تاجىريبە, - دەپ حابارلادى «اگرارلىق نەسيە كورپوراتسياسى» اق ءباسپاسوز قىزمەتى. «بيىل جاڭا جۇيە ىسكە قوسىلدى. بۇل اۋىل شارۋاشىلىعى تەحنيكاسىن نەسيەلىك سەرىكتەستىكتەر (نس) جۇيەسى ارقىلى ساتىپ الۋ. اتالعان ءونىم - ەكىنشى دەڭگەيلى بانكتەر ارقىلى تابىستى جۇزەگە اسقان اۆتونەسيەلەۋدىڭ بالاماسى. بۇعان دەيىن دە نس اۋىل شارۋاشىلىعى تەحنيكاسىن نەسيەلەندىرەتىن ەدى, بىراق نەسيەلەر كەپىلگە عانا بەرىلەتىن. اۋىل شارۋاشىلىعىندا كەپىل قويۋ ماسەلەلەسىنە بايلانىستى ءبىز جاڭا جۇيە ەنگىزۋ تۋرالى شەشىم قابىلدادىق. بۇل اۋىل شارۋاشىلىعى تەحنيكاسىن العاشقى جارنامەن ساتىپ الۋ», - دەدى «اگرارلىق نەسيە كورپوراتسياسى» اق باسقارۋشى ديرەكتورى ايجان كەنجەباەۆا. ونىڭ ايتۋىنشا, اتالعان ءونىمنىڭ ەرەكشەلىگى سول, باستاپقى جارنا اقشالاي دا, جەر ۋچاسكەسى, تەحنيكا, تۇرعىن ءۇي, اۆتوكولىك سەكىلدى كەپىل تۇرىندە دە قابىلدانادى. «اتالعان ءونىمنىڭ ديناميكاسىن زەرتتەي كەلە, ونىڭ شارۋالار اراسىندا تابىستى جۇزەگە اسقانىن تولىق سەنىممەن ايتا الامىز. بيىل 3 اي ىشىندە بىزگە 300 ميلليون تەڭگەگە ءوتىنىم ءتۇستى. بۇل تەك قانا تىركەلگەن وتىنىمدەر, قۇجاتتار پاكەتىن جيناپ جۇرگەن تاعى كوپتەگەن اۋىل شارۋاشىلىق تاۋار وندىرۋشىلەرى بار», - دەدى ايجان كەنجەباەۆا. اقمولا وبلىسىنداعى نەسيەلىك سەرىكتەستىكتەر ءبىرىنىڭ ءتورايىمى باعيلا بۇرىمباەۆا نەسيەلەۋدىڭ جاڭا ءتاسىلى ەنگەن سوڭ, اۋىل شارۋاشىلىعى تەحنيكاسىن نەسيەگە العىسى كەلەتىن شارۋالار سانىنىڭ كۇرت وسكەنىن اتاپ ءوتتى.