بىشكەكتەن گران-پريمەن ورالدى

تاياۋدا بىشكەكتە تۇركى حالىقتارىنىڭ ۇلى ويشىلى ءجۇسىپ بالاساعۇننىڭ 1000 جىلدىعى مەن قازاقستان تاۋەلسىزدىگىنىڭ 25 جىلدىعىنا ارنالعان «دوستىق» فەستيۆالى ءوتتى. حالىقارالىق فەستيۆال اياسىندا وتكەن عىلىمي-تاجىريبەلىك كونفەرەنتسيادا تارباعاتايلىق 7-سىنىپ وقۋشىسى ەلەركە جاماعاتوۆا گران-پريگە يە بولدى. جانتىكەي اۋىلىنىڭ ق.ساتباەۆ اتىنداعى ورتا مەكتەبىندە وقيتىن ەلەركە جاماعاتوۆا تۋعان جەرىنىڭ تاريحىن تۇگەندەپ جۇرگەن ءبۇلدىرشىن. ول ايگىلى حالىق ەمشىسى ىرعىزباي دوسحانا ۇلىنىڭ ءومىرى مەن ونىڭ ەمگە پايدالانعان دارىلىك شوپتەرى تۋرالى عىلىمي-زەرتتەۋ ەڭبەگىمەن «جۇزدەن جۇيرىك, مىڭنان تۇلپار» شىعىپ, تۋعان ەلىنىڭ مەرەيىن كوتەردى. كونفەرەنتسيادا دارىندى بالالاردى قولداۋ مەن دامىتۋ باعىتىندا رەسپۋبليكالىق «دارىن» عىلىمي-تاجىريبەلىك ورتالىعىمەن بىرلەسە جۇمىس ىستەپ كەلە جاتقان ۇستازى الما تەمىرجانوۆا دا ماراپاتتالدى. سونداي-اق, مەكتەپتىڭ وقۋ ءىسىنىڭ مەڭگەرۋشىسى ارداق وجاەۆا ءى ورىندى ەنشىلەدى. جۇلدەلى ورىندار ءۇشىن ديپلوم مەن باعالى سىيلىقتارعا يە بولعان وقۋشى, ۇستاز جانە وقۋ مەڭگەرۋشىسى ىستىقكولگە, «رۋح-وردو» اشىق اسپان استى مۇراجايىنا جانە چولپون اتا قالاسىنا سايا­حاتتاپ قايتتى. دۋمان اناش, «ەگەمەن قازاقستان» شىعىس قازاقستان وبلىسى