«باقىت دەگەن – جاقسىلىقتى قايتارۋ...»

الماتىداعى ۇلتتىق كىتاپحانادا گەرولد بەلگەر اتىنداعى مەموريالدى كابينەت اشىلدى. سونىمەن قاتار, جازۋشىنىڭ بەلگىلى رەجيسسەر ەرمەك تۇرسىنوۆتىڭ الەۋمەتتىك جانە گۋمانيتارلىق قورىنىڭ قولداۋىمەن جارىق كورگەن «پلەتەنە چەپۋحي» اتتى كىتابىنىڭ 1-ءشى تومىنىڭ تۇساۋكەسەرى ءوتتى.  قازاقستاننىڭ حالىق جازۋشىسى, ەلۋدەن استام كىتاپتىڭ اۆتورى, پۋبليتسيست, قازاق ادە­بيەتى كلاسسيكتەرىنىڭ كوپتەگەن شىعارمالارىن ورىس تىلىنە اۋدارىپ, الەمگە تانىتۋدا ولشەۋسىز ۇلەس قوسقان گەرولد كارلوۆيچ بەلگەردىڭ دۇنيەدەن وتكەنىنە ەكى جىلعا جۋىقتادى. رەسەيدە دۇنيەگە كەلىپ, قازاق اۋى­لىندا وسكەن ۇلتى نەمىس جازۋشى قالامگەرلىگىمەن قوسا قايراتكەرلىگى ارقىلى دا تانىلعان تۇلعا. مەموريالدى كابينەتتىڭ اشى­­لۋ­ىنا ارنايى كەلگەن جازۋ­شى­نىڭ زايىبى رايسا زاكىر­قىزى حيسماتۋللينا ءوزى ءۇشىن اسا قىمبات كىتاپتىڭ جارىققا شىققانىنا قۋانعانىن, ويتكەنى, گەر-اعاڭ ءۇشىن ءوز كۇندەلىگىن كىتاپ ەتىپ شىعارۋ ۇلكەن ارمان بولعانىن, سول ارماننىڭ ورىندالىپ وتىرعانىن ايتتى. «ول ارقاشان «ءاربىر ادام ءۇشىن باقىتتىڭ ءوز ولشەمى بار. مەن ءۇشىن باقىت دەگەن – ماعان جاسالعان جاقسىلىقتى قايتارۋ, جاقسىلىققا جاقسىلىقپەن جاۋاپ بەرە ءبىلۋ. قازاق ەلى – مەنىڭ تۋعان ورتام, ءوز انام بولدى» دەپ ايتاتىن ەدى. ول وتان الدىنداعى, تۋعان جەر, قوعام مەن جاقىن ادامدارى الدىنداعى بورىشىن وتەپ كەتۋدى ماقسات تۇتتى. سول بورىش ءۇشىن ەڭبەك ەتتى. كوز جۇمار الدىندا جانساقتاۋ بولىمىندە وياتۋ ءۇشىن قىزىم ەكەۋىمىز «ويانساڭشى, كىتابىڭدى شىعارۋ كەرەك قوي» دەپ ايتقانىمىزدا, ەس-ءتۇسسىز جاتقان ونىڭ كوزىنەن ءبىر تامشى جاس دومالاپ اعىپ ءتۇستى... ۇلى دالانىڭ ۇلى نەمىسى اتالىپ كەتكەن گەرولد كارلوۆيچ ومىردەن وزعاندا قازاق حالقى تاراپىنان سونشالىقتى ىستىق ىقىلاستى كورەمىن دەپ كۇتپەپ ەدىم», – دەپ تەبىرەنە كوزىنە جاس العان رايسا زاكىرقىزى جينالعان قاۋىمعا العىسىن ءبىلدىردى. جازۋشى دۇنيەدەن وتكەن سوڭ قۇرىلعان قوردىڭ ديرەكتورى قانات تورەبايدىڭ ايتۋىنشا, قور ۇجىمى گەرولد بەلگەردىڭ 8 جاسىنان باستاپ جازعان, بار­لىعى 30 داپتەردەن تۇراتىن كۇن­دەلىكتەرىن «پلەتەنە چەپۋحي» دەگەن اتپەن 4 توم ەتىپ شىعارۋدى ويعا العان ەكەن. گەر-اعاڭنىڭ امانات ەتىپ كەتكەن مۇراسىن كوپشىلىك نازارىنا ۇسىنۋدى پارىز ساناعان ەرمەك تۇرسىنوۆتىڭ اتالمىش قورى 2 مىڭ دانا تارالىممەن شىققان العاشقى تومدى ەلىمىزدىڭ بارلىق كىتاپ دۇكەندەرىنەن ساتىپ الۋعا بولاتىنىن ايتتى. گەرولد بەلگەر ەسىمىن ەستە قالدىرۋ ماقساتىندا, سونداي-اق, «قازاقفيلم» كينوستۋدياسى تۇسىرگەن «بەلگەر» اتتى دەرەكتى فيلم دە جينالعان جۇرتتىڭ نازارىنا ۇسىنىلدى. ميرا بايبەك, «ەگەمەن قازاقستان» الماتى