قازاقستاندىق دەلەگاتسيا حالىقارالىق كونگرەسكە قاتىستى

قر كونستيتۋتسيالىق كەڭەسىنىڭ توراعاسى ي. روگوۆ باستاعان قازاقستاندىق دەلەگاتسيا تۇركيانىڭ ستامبۇل قالاسىندا قۇقىقتانۋ سالاسى بويىنشا وتكەن حالىقارالىق كونگرەسسكە قاتىستى. كونگرەستىڭ اشىلۋ سالتاناتىندا تۇركيا پرەزيدەنتى ر.ت.ەردوگان, تۇركيانىڭ ادىلەت ءمينيسترى بەكير بوزداگ, ازەربايجاننىڭ ادىلەت ءمينيسترى فيكرەت ماممادوۆ, اۋعانىستاننىڭ ادىلەت ءمينيسترى باسير حايداري, ءسوماليدىڭ ادىلەت ءمينيسترى ابدۋللاحي احمەد جاما ءسوز سويلەگەن بولاتىن. جالپى حالىقارالىق جيىنعا 47 ەلدەن 200-دەن استام دەلەگات, سونىڭ ىشىندە كونستيتۋتسيالىق كەڭەستەردىڭ توراعالارى مەن مۇشەلەرى, پروكۋراتۋرالار, ادۆوكاتۋرالار, ادىلەت اكادەميالارىنىڭ باسشىلارى, مەملەكەتتىك ورگانداردىڭ, اكادەميالىق جانە بيزنەس ورتاسىنىڭ وكىلدەرى قاتىستى. كونگرەسس شەڭبەرىندە 21 وتىرىس وتكىزىلدى. كونستيتۋتسيالىق كەڭەس توراعاسى ي.روگوۆ, جوعارعى سوت كەڭەسىنىڭ توراعاسى ا.سمولين, استانا قالاسى الماتى اۋداندىق سوتىنىڭ توراعاسى ع.ءناسىردىنوۆ, جوعارعى سوت جانىنىداعى سوت تورەلىگى اكادەمياسىنىڭ رەكتورى م. بەيبىتوۆ بايانداما جاسادى. كونگرەسس قورىتىندىسى بويىنشا, لاڭكەستىكتىڭ بارلىق ەل ءۇشىن ەڭ ءبىرىنشى قاۋىپ ەكەنى ايتىلدى. لاڭكەستىككە قارسى تۇرۋ حالىقارالىق ىنتىماقتاستىقتى تالاپ ەتەتىنىنە, لاڭكەستىكپەن كۇرەستى جۇرگىزۋ ازاماتتاردىڭ قۇقىقتارى مەن بوستاندىقتارىنىڭ شەگىندە جۇزەگە اسىرىلۋى تيىستىگىنە ءمان بەرىلدى. «وسىعان بايلانىستى بارلىق ەلدە سوت جانە قۇقىق قورعاۋ ورگاندارى ارالارىندا بىرقاتار قىلمىستار تۇرلەرىنە لاڭكەستىكتى, كيبەرقىلمىستى (اقپاراتتىق تەحنولوگيالار سالاسىنداعى قىلمىستى) قارجىلاندىرۋعا, ەسىرتكى زاتتارى ساۋداسىنا, ادام ساۋداسىنا قارسى ءىس-قيمىل جاساۋدا ىنتىماقتاستىقتى دامىتۋ, سونداي-اق حالىقارالىق ۇيىمداسقان قىلمىستىق توپتارمەن كۇرەستى ۇيلەستىرۋدى كۇشەيتۋ ۇسىنىلدى», - دەلىنگەن استانا قالالىق سوتى تاراتقان ءباسپاسوز بايانىندا.