استانادا قازاقستان, تۇركيا, ازەربايجان, قىرعىزستان جانە يراننىڭ ارنايى قىزمەتتەرىنىڭ باسشىلارى باس قوستى.
باقىلاۋشى رەتىندە رەسەي, ۋكراينا جانە گرۋزيالىق ماماندار شاقىرىلعان. جينالعاندار حالىقارالىق لاڭكەستىك ۇيىمداردىڭ كۇش العانىنا الاڭداۋشىلىق ءبىلدىرىپ, بۇل ورتاق پروبلەما دەستى. ولاردىڭ جولىن كەسۋدىڭ امالدارىن قارادى. شاراعا قاتىسقان ۇلتتىق قاۋىپسىزدىك كوميتەتىنىڭ توراعاسى كارىم ءماسىموۆ ءوزارا كاسىبي بايلانىستى ارتتىرۋ قاجەت دەگەن ويىن ايتتى, دەپ جازادى «حابار» ارناسى.
«حالىقارالىق كواليتسيانىڭ سوققىلارىنا قاراماستان لاڭكەستىك ءوز وكتەمدىگىن جالعاستىرۋدا.تەررورلىق شابۋىلدار گەوگرافياسى كەڭەيۋدە. لاڭكەستەر ارەكەتتەرىنىڭ تاكتيكاسى مەن ادىستەرى مىڭ قۇبىلۋدا. ينتەرنەت جەلىلەرىندە لاڭكەستىكتى ناسيحاتتاۋ اۋقىمى دا كەمىمەي وتىر. دايش اتىن جامىلعان باسقا دا توپتار جاڭا سىر-قاتەرلەر تۋدىرۋدا, ونىڭ ىشىندە كونفەرەنتسياعا قاتىسۋشى ەلدەر قوسىمشا قارجى كوزدەرىن ىزدەۋدە. وسى ءۇردىستىڭ بارلىعى حالىقارالىق, وڭىرلىك قاۋىپسىزدىك جاعدايىنا, مەملەكەتتەرىمىزدىڭ ساياسي تۇراقتىلىعىنا تىكەلەي ىقپال ەتۋدە», - دەپ اتاپ ءوتتى قر ۇقك توراعاسى ك. ءماسىموۆ.
قاۋىپسىزدىك كەڭەسىنىڭ حاتشىسى ۆلاديمير جۇماقانوۆ بولسا, بۇل جۇمىستار جۇيەلى بولۋى ءۇشىن ورتاق جوسپار قۇرۋدىڭ ماڭىزدىلىعىن اتادى.
«الەمدىك قاۋىمداستىق جۇيەلى جوسپار قۇرىپ, بىرلەسىپ جۇمىس ىستەسە, تەرروريزممەن كۇرەس ناتيجە بەرەدى. بۇگىن ءوزارا ىقپالداستىقتى ارتتىرا الامىز. ول ءۇشىن ماڭىزدى اقپاراتتاردى الماستىرىپ, كاسىبي تۇرعىدا تاجىريبە ءبولىسۋىمىز كەرەك. الەمدىك قاۋىپسىزدىك زاماناۋي جۇمىس جۇيەسىن قاجەت ەتەدى», - دەدى قر پرەزيدەنتىنىڭ كومەكشىسى - قاۋىپسىزدىك كەڭەسىنىڭ حاتشىسى ۆلاديمير جۇماقانوۆ.
شارا 18 قازان كۇنى وتكەن بولاتىن.
