تۇرعىن ۇيلەر قۇرىلىسىنىڭ 90%-ى اياقتالدى

ەكسپو-2017 حالىقارالىق مامانداندىرىلعان كورمە اۋماعىنداعى تۇرعىن ۇيلەردىڭ قۇرىلىسى 90 %-عا اياقتالدى. كەشە «بايتەرەك» ۇلتتىق باسقارۋشى حولدينگى» اق باسقارما توراعاسى ەربولات دوساەۆ قۇرىلىس بارىسىمەن تانىستى.   «بايتەرەك» حولدينگى ءوزىنىڭ ەن­شىلەس ۇيىمى «بايتەرەك دەۆەلو­پ­مەنت» اق ارقىلى استانا قالاسىندا ەكسپو-2017 حالىقارالىق مامان­داندى­رىلعان كورمە اۋماعىنداعى تۇر­عىن ۇيلەردىڭ, ساۋدا-ويىن-ساۋىق ورتا­لى­عىنىڭ قۇرىلىسىن ينۆەستيتسيالايدى. اۋدانى 107 مىڭ شارشى مەتر (1374 پاتەر) 42 تۇرعىن ءۇي سالىندى. ۇيلەرگە سىرتقى جانە ىشكى جەلىلەر جەتكىزىلدى, پاتەرلەردى ىشكى ارلەۋ, ۇيلەردىڭ قاسبەتتەرىن ارلەۋ اياقتالدى, اۋماقتى كورىكتەندىرۋ جۇمىستارى ءجۇرىپ جاتىر. تۇرعىن ءۇي كەشەندەرىندە پاركينگتەر, سونداي-اق, كوممەرتسيالىق ءۇي-جايلارعا ارنالعان اۋداندار كوزدەلگەن. قۇرىلىس-مونتاج جۇمىستارى كەستەگە سايكەس جۇرگىزىلۋدە. حالىقارالىق مامانداندىرىلعان كورمەنى وتكىزۋ كەزىندە پاتەرلەر حالىق­ارالىق قاتىسۋشىلاردى ورنالاستىرۋ ءۇشىن كورمەنىڭ ۇيىمداستىرۋشىلارىنا جالعا بەرىلەدى. كورمە اياقتالعاننان كەيىن نارىق تالاپتارىنا سايكەس تۇر­عىن ۇيلەر ساتۋعا شىعارىلاتىن بولادى. جالپى اۋدانى 138 مىڭ شارشى مەتردى قۇرايتىن ساۋدا-ويىن-ساۋىق ورتالىعىنىڭ قۇرىلىسى اياقتا­لىپ قالدى. سىرتقى كوممۋنيكاتسيا­لار جەتكىزىلدى, ىشكى جەلىلەردى سالۋ, عيماراتتىڭ ىشكى جانە سىرتقى ارلە­نۋى, سونداي-اق, ىرگەلەس اۋماقتى كورىك­تەندىرۋ جۇمىستارى ءجۇرىپ جاتىر. تۇرعىن ءۇي نىساندارى مەن ساۋدا-ويىن-ساۋىق ورتالىعىن پايدالانۋعا بەرۋدىڭ بولجامدى كۇنى – 2016 جىلعى 1 جەلتوقسان. نىسانداردى سالۋ كەزىندە 3,7 مىڭ جۇمىس ورنى قۇرىلدى. وسى نى­­ساندار پايدالانۋعا بەرىلگەننەن كەيىن شامامەن 2,5 مىڭ ادام تۇراقتى جۇ­مىسپەن قامتاماسىز ەتىلەتىن بولادى. «بايتەرەك» حولدينگىنىڭ ەنشىلەس كومپانياسى «بايتەرەك دەۆەلوپمەنت» اق قارجىلاندىراتىن تاعى ءبىر نىسان – بۇل «اۋرا» بيزنەس ورتالىعى. جالپى اۋدانى 38 086 شارشى مەتر ىسكەرلىك كەشەن ەكسپو-2017 كورمەسىنىڭ جانىندا ورنالاسقان. 2018 جىلعى 1 توقساندا پايدالانۋعا بەرىلەدى دەپ كۇتىلۋدە. ارنۇر اسقار, «ەگەمەن قازاقستان»