ءوندىرىس ورەنى

مەملەكەت باسشىسىنىڭ ەڭبەك ادامدارى مەن اۋلەتتەرىن قۇرمەت بيىگىنە كوتەرۋ جونىندەگى تاپسىرماسى ەلىمىزدەگى ەڭبەك ەرلەرىن تانىتۋدى كوزدەگەن تالاي تىڭ جوبالارعا تۇرتكى بولدى. دەنساۋلىق ساقتاۋ جانە الەۋ­مەتتىك دامۋ مينيستر­لىگىنىڭ شارۋاشىلىق شەبەرلەرىن انىقتاۋ ماقساتىندا ۇيىمداس­تىرعان «ەڭبەك جولى» بايقاۋى دا وسى ۇدەدەن تابىلادى. سول سىندا «ءوندىرىستىڭ ۇزدىك جاس مامانى» اتالىمىنىڭ جەڭىمپازى اتانعان وسكەمەندەگى مىس زاۋىتى انودتى ءوندىرىس تسەحىنىڭ اعا شەبەرى اسحات زيكەنوۆ تۋرالى اڭگىمەلەمەكپىز. شىعىس ءوڭىرى بويىنشا «جۇمىسشى جاستاردىڭ ۇزدىك تالىمگەرى», «ءوندىرىستىڭ ۇزدىك جاس مامانى» جانە «ۇزدىك ەڭبەك اۋلەتى» اتالىمدارىندا 40-تان استام قاتىسۋشى باق سىنادى. مەتاللۋرگتەردىڭ مادە­نيەت ۇيىندە وتكەن سالتاناتتى ءرا­سىمدە «قازمىرىش» جشس ەڭ­بەك رەسۋرستارى باسقارماسى جاس ماماندى جۇمىستاستارىنا ۇلگى ەتىپ, قوشەمەت كورسەتتى. قۇت­تىقتاۋلاردان كەيىن جاس مامانعا ەڭبەك رەسۋرستارى باس­قار­ماسىنىڭ ماماندارمەن جۇمىس جونىندەگى قىزمەتىنىڭ باسشىسى ەلەنا كالاتسىنسكايا پلانشەتتىك كومپيۋتەر سىيعا تارتتى. اسحات وسىدان 2 جىل بۇ­رىن زاۋىتقا كەن قورىتۋ ما­تە­ريال­دارىن دايىنداۋ تسەحى­نىڭ تيەۋشىسى بولىپ كەلگەن بولاتىن. ءوز تاڭداۋىمەن وسكە­مەن مەتاللۋرگيالىق كەشەنىنە بەت بۇرعان 2014 جىلدىڭ 10 ماۋسىمى ەرەكشە ەستە. «مەتاللۋرگيا جانە ءتۇستى مەتاللۋرگيا» مامان­دىعى بويىنشا باكالاۆردى تامامداعان جاستىڭ الدىندا ەكى جول تۇر ەدى. ەرتەرەك ەڭبەك جو­لىن باستاپ, ءوزىن ينجەنەرلىك تۇر­عىدان دامىتۋ كەرەك پە, الدە شەتەلدىك جوعارى وقۋ ورىن­دارىنىڭ بىرىندە ماگيستراتۋرادا وقىعان ءجون بە؟ ول ويلانباس­تان «قازمىرىشتى» تاڭدادى. سە­بەبى, ءوزى وقىعان د.سەرىكباەۆ اتىن­داعى شىعىس قازاقستان مەم­­لە­كەتتىك تەحنيكالىق ۋنيۆەر­سيتەتى كافەدراسىنىڭ «قازمى­رىش» جشس جانىنان قۇرىلعان فيليالى بار ەدى. وسىندا وقي ءجۇرىپ, بولاشاعىن كاسىپورىنمەن ساباقتاستىرۋدى كوزدەدى. – ادەتتە, وقۋ كوپ ماسەلەنى شەشەدى. وسى ۋاقىت ارالىعىندا جۇمىس ىستەپ جۇرگەن جەرىمنىڭ العا قارىشتى قادام باسىپ كە­لە جاتقان قۋاتتى كاسىپورىن ەكە­نىنە كوزىم جەتتى. تابىستى بولاتىنىما سەنگەندىكتەن زاۋىتتا قالۋدى ءجون سانادىم. كەشە عانا وقۋ بىتىرگەن جاس ماماندار ءۇشىن ءۇمىت پەن تالاپ وتە ماڭىزدى دۇنيە. تالاپتى جاستاردى كومپانيا باسشىلىعى قولدايدى. سون­دىقتان مۇندا مۇمكىندىكتەر مول. وندىرىستەن قول ۇزبەي, ما­گيسترا­تۋرانى ءتامامدادىم. جۇ­مىس­تان كەيىن جانە دەمالىس كۇندەرى وقي ءجۇرىپ, ەمتيحاندارىمدى جاقسى تاپسىردىم, – دەدى ا.زيكەنوۆ. اسحات جۇمىسقا ورنالاسقان العاشقى ساتتەن باستاپ جاڭا ورتاعا بەيىمدەلۋگە بار كۇشىن سالدى. اقىل-كەڭەس سۇراۋعا قى­سىل­مادى. جانىنداعى جاس­تاردان, ءوندىرىستىڭ ارداگەر­لەرىنەن ۇزدىكسىز ۇيرەنگەن جاس جىگىت ولاردىڭ كوز الدىندا ءوستى. تاعىلىمداما بارىسىندا وزىنە كەرەكتى دۇنيەنى الۋعا تىرىسقان ول اسىرەسە, قورى­تۋ ماتەريالدارىن دايىنداۋ تسەحىنىڭ باستىعى ەرمەك قيزامەت­دينوۆ, اتالعان تسەحتىڭ شەبەرى ۆلا­ديمير ساۆەلەۆ, قورعاسىن زاۋىتى بالقىتۋ تسەحىنىڭ باستىعى رادجان شىڭعاليەۆ كومەكتەرىن ايانىپ قالماعانىن ايتادى. ءۇش ايدان كەيىن زاۋىتتاعى سارت-سۇرت قايناعان ەڭبەك مايدانىنا ەتى ۇيرەنىپ, ءوزىن ەركىن سەزىنە باستادى. وسى ورتانىڭ قاجەتتى ءبىر بولشەگى ەكەنىن ءتۇيسىندى. ءبىر جىلدان سوڭ شەبەرلەر مەكتەبىن دە ءتامامدادى. مىس زاۋىتىنىڭ شەتەلدىك ارىپتەستەرىمەن بىرگە وندىرىستىك مىندەتتەردى اتقارا ءجۇرىپ, ەدەل-جەدەل اعىلشىن ءتىلىن مەڭگەرىپ الدى. بىردە اۋىسىم شەبەرىنىڭ مىندەتىن اتقا­رۋ­شىلىقتى جۇكتەگەن باسشىلىق جاس جىگىتتىڭ جىگەرىن بايقاپ, باسقا تسەحقا اۋىسۋعا ۇسىنىس جاسادى. – وندىرىستە ءوزىم اتقاراتىن جۇمىستىڭ بارلىعىنا جەتىك ەدىم. بىراق, قول جەتكىزگەن جەتىس­تىكپەن توقتاپ قالماۋ قاجەت. كاسىپورىن ءوز-ءوزىن وسىرەمىن دەگەن مامانعا مول مۇمكىندىك بە­رەدى, دەيدى ول. ءۇش ءتىلدى ۇزدىك مەڭگەرىپ, ەندى نەمىس ءتىلىن ءۇي­رەنە باستاپتى. العا قويعان ماقساتىنا جەتپەي قويمايتىن قاسيەتى بولار, اسحات جۇمىسشى ما­ماندىعىن تاڭداۋ ارقىلى قازىر­گى قوعامدا جەتىستىكتەرگە جەتۋ­گە بولاتىنىن سوزىمەن دە, ءىسى­مەن دە دالەلدەپ كەلەدى. وسى شارادا وبلىس اكىمىنىڭ ورىنباسارى جاقسىلىق ومار بىلىكتىلىگى جوعارى ماماندار قاي كەزدە دە قاجەتتىگىن, سول سەبەپتى وندىرىسكە لايىقتى ماماندار تاربيەلەۋ كەرەك ەكەندىگىن اتاپ ءوتىپ, ەڭبەكسۇيگىشتىك پەن تاباندىلىقتىڭ ۇلگىسى رەتىندە پرەزيدەنتىمىز نۇرسۇلتان نازار­باەۆتى ايتۋعا بولادى. ەگەر ادال ەڭبەك ەتسەڭىز, ومىردە كوپ ءدۇ­نيەگە قول جەتكىزە الاسىز. سون­دىقتان ەڭبەك كۇنىنىڭ ءمانى ەرەكشە, دەدى. ال وبلىستىق جۇمىسپەن قام­تۋ جانە الەۋمەتتىك باعدار­لا­ما­لاردى ۇيلەستىرۋ باسقارما­سىنىڭ باسشىسى ەلەنا ستا­رەنكوۆا ادام ەڭبەگىنىڭ قوعام­داعى مارتەبەسى مەن ماڭى­زىن كوتەرەتىن ءداستۇرلى باي­قاۋ مەملەكەت باسشىسىنىڭ «جالپىعا ورتاق ەڭبەك قوعا­مى» يدەياسىنىڭ شەڭبەرىندە ەڭبەك ونىمدىلىگىن جانداندىرۋ, جۇمىسشى كاسىبىنىڭ مارتەبەسىن كوتەرۋدى كوزدەيتىنىن جەتكىزدى. ارينە, كۇندە وزگەرىپ جات­قان تەحنولوگيا دا, قارىشتى عى­لىمي ورلەۋ دە, قۋاتتى ءوندىرىس ورىندارى دا, بارلىق جەتىستىك باستاۋىندا ادام ەڭبەگى, تالانتى ءھام كۇش-جىگەرى تۇرعانى انىق. ياعني, «ەڭبەك – ءبارىن جەڭبەك» دەگەن وسى. دۋمان اناش, «ەگەمەن قازاقستان»   وسكەمەن