ۇلتتىق ونكولوگيا ورتالىعىندا 220 بۇيرەك ترانسپلانتاتسياسى جاسالدى

مەملەكەت باسشىسى ن.ءا.نازارباەۆتىڭ تىكەلەي قولداۋىمەن ەلىمىزدە دەنساۋلىق ساقتاۋ سالاسىنا ايرىقشا كوڭىل ءبولىنىپ كەلەدى. كەشەندى باعدارلامالار قابىلداندى, قوماقتى قارجى باعىتتالدى. سونىڭ ناتيجەسىندە ءىرى قالالارىمىزدا, وبلىس پەن اۋدان ورتالىقتارىندا جاڭا اۋرۋحانالار مەن ەمحانالار سالىندى, زاماناۋي ەمدەۋ ورتالىقتارى دامىعان شەتەلدەردەن الىنعان مەديتسينا سالاسىنداعى وزىق تەحنولوگيالارمەن, وزىق قۇرال-جابدىقتارمەن قامتاماسىز ەتىلدى. حالىققا جاڭا زامان تالابىنا ساي قىزمەت كورسەتەتىن وسىنداي ورتالىقتىڭ ءبىرى – ۇلتتىق ونكولوگيا جانە ترانسپلانتولوگيا عىلىمي ورتالىعى. ەل ۇكىمەتىنىڭ 2009 جىلعى 24 قازانداعى قاۋلىسىنا سايكەس ۇلتتىق مەديتسينالىق حولدينگتىڭ قۇرامىندا «رەسپۋبليكالىق جەدەل مەديتسينالىق جاردەم عى­لىمي ورتالىعى» اكتسيونەرلىك قوعامى قۇرىلدى. ال 2014 جىلى 7 اقپاندا ۇلتتىق مەديتسينالىق حولدينگتىڭ ديرەكتورلار كەڭەسىنىڭ شەشىمى نەگىزىندە بۇل ورتالىقتىڭ «ۇلتتىق ونكولوگيا جانە ترانسپلانتولوگيا عىلىمي ورتالىعى» («ۇوتعو») اق بولىپ اتاۋى ءوز­گەرتىلدى. ورتالىقتى قۇرۋدىڭ ماقساتى – جوعارى ساپالى جانە باسەكەگە قابىلەتتى مەديتسينالىق كومەك كورسەتۋدى قامتاماسىز ەتۋ, سونداي-اق, مەديتسينا عىلىمى, ءبىلىم بەرۋ مەن پراكتيكا سالاسىن­داعى زاماناۋي تەحنولوگيالاردى ەنگىزۋ جانە تاراتۋ. سونىمەن قاتار قازاقستان رەسپۋب­­ليكاسىنىڭ سانيتارلىق اۆياتسيا جەلىسى بويىنشا ءوڭىر­لەر­دەن كەلگەن پاتسيەنتتەرگە, ونىڭ ىشىندە گەستاتسيالىق كەزە­ڭى 32 اپتاعا دەيىنگى جۇكتى ايەل­دەرگە جانە ەكستراگەنيتالدى اسقىنۋلارى بار انالارعا بو­سانعاننان كەيىن دە جوعارى مەدي­تسينالىق كومەك كورسەتۋدە ەرەكشە ءرول اتقارادى. سونداي-اق ور­تالىقتىڭ قاتىسۋىمەن بولاتىن باسقا دا الەۋمەتتىك-ماڭىزدى جو­بالار ىسكە اسىرىلادى. اتاپ ايتار بولساق, ورتالىقتىڭ وڭتايلى قۇرىلىمى بار, كلينيكالىق بازادا پەرسونالدىڭ شتاتتىق سانى 1000 بىرلىك بولسا, ەمدەلۋشىلەر ءۇشىن 240 توسەك ورنى قاراستىرىلعان. «ۇوتعو» اق – كوپبەيىندى مەدي­تسينا سالاسىنداعى ماماندان­دىرىلعان الەمدىك دارەجەدەگى ءبى­رەگەي زاماناۋي ەمدەۋ ءتاسىلىن ۇسى­نادى. بۇل جاڭا ادىستەردى ور­تالىقتىڭ پراكتيكاسىنا ەن­گىزۋگە جول اشادى جانە ايرىقشا اۋىر جانە جوعارى تەحنولوگيالىق مەدي­تسينا سالاسىنىڭ ءبىرى – اعزا­لار مەن تىندەر ترانسپلانتاتسيا­سىن دامىتۋعا مۇمكىندىك بەردى. ءبىزدىڭ ورتالىقتىڭ ىرگەسى قالانعاننان بەرى 56 مىڭنان استام ادام ەم­دەلىپ شىقتى, ناۋقاستاردىڭ جانىن امان الىپ قالۋ ءۇشىن 41 مىڭداي جەدەل ارەكەت ەتۋ شارالارى, ونىڭ ىشىندە جوعارى مامانداندىرىلعان كومەك بويىنشا شامامەن 11 مىڭداي وپەراتسيا جۇرگىزىلدى. گەموفيليا جانە وستەوونكولوگيا, قولقا انەۆريزمالارىن كەشەندى ەمدەۋ كەزىندە سۇيەك كەمىگىنىڭ اللاگەندى جانە گاپلويدتى ترانسپلانتاتسياسى, تەرى ترانسپلانتاتسياسى (كسەنوترانسپلان­تاتسيا پاتەنتى بار) باۋىرعا ترانسپلانتاتسيا جاساۋ, مودۋلدىك بۋىنداردىڭ ورتوپەدياسى سياقتى ەكسكليۋزيۆتى تەحنولوگيالاردى وتان­دىق دەن­ساۋلىق ساقتاۋ پراك­تيكا­سىنا ەنگىزۋ­دىڭ ەرەكشە ماڭىزى بار. 2010 جىلى تامىز ايىندا ونكوگەماتولوگيا جانە سۇيەك كەمىگى ترانسپلانتاتسياسى بولىمشەسىنىڭ اشىلۋى وتاندىق گەماتولوگيانىڭ تاريحىنداعى ەلەۋلى جاڭالىق بولدى. قازاقستان رەسپۋبليكاسىنىڭ گەماتولوگيالىق قىزمەتى دەنساۋ­لىق ساقتاۋدى رەفورمالاۋ جانە دا­مىتۋدىڭ «سالاماتتى قازاقستان» مەملەكەتتىك باعدارلاماسى شەڭ­بەرىندە دەنساۋلىق ساقتاۋ جانە الەۋمەتتىك دامۋ مينيسترلىگىنىڭ باستاماسىمەن 2010 جىلى ونكو­گەماتولوگيالىق پاتولوگيالار – سۇيەك كەمىگى ترانسپلانتاتسياسىن ەمدەۋدىڭ بىرەگەي تەحنولوگياسىن جۇرگىزۋگە مۇمكىندىك العانىن ايتقانىمىز ءجون. گەموبلاستوزاسى بار ناۋقاس­تارعا سۇيەك كەمىگى ترانسپلانتاتسياسىن جۇرگىزۋدى باستاعاننان كەيىن (2010 جىلدان باستاپ) شەتەلگە ەمدەلۋگە كەزەكتە تۇرعان پاتسيەنتتەردىڭ ءوز ەلىمىزدە ەمدە­لۋىنە جول اشىلدى. جىل سايىن ترانسپلانتاتسيالار سانىن ارتتىرا كەلە, قازاقستاندىق گەماتولوگتار شەتەلدە كەڭىنەن تارا­عان قان اۋرۋلارىن ەمدەۋ مەن دياگ­نوستيكالاۋدىڭ جاڭا ادىستەرىن ەنگىزدى. ولار: گەموپوەتيكالىق باعانالىق جاسۋشالاردىڭ (دونوردان) اللاگەندى ترانسپلانتاتسيا­سى (سۇيەك كەمىگى), حالىقارالىق تىزىلىمگە بىرىگۋ, شەتەل دونورلارىن تارتا وتىرىپ, تۋىس ەمەس ادامنان ترانسپلانتاتسيا ءجۇر­گىزۋ. ورتا­لىقتا گەماتولوگيا بولىمشەسى اشىلعاننان باستاپ 200-دەن استام سۇيەك كەمىگى ترانسپلانتاتسياسى جۇرگىزىلدى. ورتالىقتىڭ كلينيكالىق قىز­مە­تىندەگى نەگىزگى باسىمدىق­تاردىڭ ءبىرىن دامىتۋ – گەپاتوبيليارلى ترانسپلانتولوگيا, سونداي-اق, وتان­دىق دەنساۋلىق ساقتاۋدىڭ الدىڭعى قاتارلى كەشەنىن ۇسى­نادى. سونىمەن, 2011 جىلى ور­تالىقتىڭ بازاسىندا ەلىمىزدە العاش رەت ءتىرى دونوردان بۇيرەكتى لاپاروسكوپيالىق الۋ ارقىلى, 2012 جىلى – ەلىمىزدە تۇڭعىش رەت ءولى دونوردان اعزالاردى (بۇيرەك, جۇرەك) مۋلتياعزالىق الۋ ارقىلى, 2013 جىلى – العاش رەت ءولى دونوردان باۋىردى ورتوپتيكالىق ترانسپلانتاتسيا ارقىلى اۋىستىرۋ جانە ەلىمىزدە العاش رەت بالاعا ءتىرى دونوردان باۋىردى ترانسپلانتاتسيالاۋ جۇرگىزىلگەن بولاتىن. 2015 جىلى ءتىرى دونوردان باۋىر ترانسپلانتاتسياسى جاسالدى. ورتالىق قۇرىلعالى بەرى 220-دان استام بۇيرەك ترانسپلانتاتسياسى, 170 سۇيەك كەمىگى ترانسپلانتاتسياسى, شامامەن 100 تەرى جانە 20-دان استام باۋىر ترانسپلانتاتسياسى جۇرگىزىلدى. 2015 جىلى قازاقستان رەسپۋب­ليكاسىنىڭ تۇڭعىش پرەزيدەنتى كۇنىنە ارنالعان ءىس-شارالار شەڭبەرىندە 220-دان استام ترانسپلانتاتسيا جۇرگىزىلگەن بولاتىن. ال 2015 جىلعى 13 تامىزدا دەنساۋلىق ساقتاۋ جانە الەۋمەتتىك دامۋ مينيسترلىگىنىڭ بۇيرىعىمەن «ۇوتعو» اق بازاسىندا گاستروەنتەرولوگيا جانە گەپاتولوگيا بويىنشا رەسپۋبليكالىق ۇيلەستىرۋ كەڭەسى قۇرىلدى. ونىڭ ماقساتى – باۋىر ترانسپلانتاتسياسىنا مۇقتاج پاتسيەنتتەردى ىرىكتەۋ, ولارعا قولداۋ كورسەتۋ جانە باقىلاۋعا الۋ. ورتالىقتىڭ بارلىق (243) نەگىزگى كلينيكالىق ماماندارى اقش, جاپونيا, وڭتۇستىك كورەيا, گەرمانيا, بەلگيا, يتا­ليا, شۆەيتساريا جانە باسقا دا شەتەلدەردىڭ ەڭ ءىرى مەديتسينالىق ورتالىقتارىنان تاعىلىمدامادان ءوتتى. 2013 جىلدان باستاپ ءبىزدىڭ مامانداردىڭ تالىمگەرلىك ەتۋىمەن 6 ماماندىق بويىنشا 60-قا جۋىق رەزيدەنتتەر ءبىتىرىپ شىقتى. ورتالىقتىڭ جاڭارتىلعان ماتەريالدىق-تەحنيكالىق بازاسى جانە ءبىزدىڭ مامانداردىڭ جوعارى بىلىكتىلىگى مەن كاسىبي شەبەرلىگى ناۋقاستاردىڭ دەنساۋلىعىن تەك­سەرۋدى جوعارى دەڭگەيدە جۇرگىزىپ, ەڭ اۋىر كلينيكالىق جاعدايداعى اۋرۋلاردى ديگنوستيكالاۋ مەن ەمدەۋدى جۇزەگە اسىرۋعا مۇمكىندىك بەرەدى. ورتالىقتا ءوز سالاسىنىڭ بىلگىرى, تاجىريبەسى مول جانە دياگنوستيكا مەن ەمدەۋدىڭ الەم بويىنشا جەتەكشى كلينيكالارىندا زاماناۋي ادىستەردى مەڭگەرگەن مەديتسينا عىلىمدارىنىڭ كانديداتتارى مەن دوكتورلارى, جوعارى ساناتتاعى دارىگەرلەر قىزمەت جاسايدى. ەلىمىزدىڭ بارلىق ءوڭىرى­نەن تەلەمەديتسينالىق كونفەرەن­تسيا­نىڭ كومەگىمەن جان-جاقتى اقىل-كەڭەس جۇرگىزۋدە ورتالىقتىڭ ءدارى­گەرلەرىنە دەگەن سۇرانىس وتە جوعارى. سونداي-اق, ماماندار كوشپەلى كونسۋلتاتسيالار وتكىزەدى جانە ءبىزدىڭ ورتالىقتىڭ بازاسىندا جوعارى مامانداندىرىلعان مەديتسينالىق كومەك كورسەتۋ ءۇشىن رەسپۋبليكانىڭ ءار وڭىرلەرىنەن, ونىڭ ىشىندە ناۋ­قاستاردى سا­ني­تارلىق اۆياتسيا جەلىسى بويىنشا جەتكىزە وتىرىپ, ەمدەۋدى جۇزەگە اسىرادى. ورتالىق قۇ­رىل­عان كەزەڭنەن باستاپ شامامەن 1000-نان اس­تام سىرقات ادامعا مەديتسينالىق كو­مەك كورسەتىلدى. اۋرۋلاردىڭ الدىن الۋ ماقساتىندا دا اتقارىلىپ جات­­قان جۇمىس اۋقىمى دا اي­تار­لىقتاي. ماسەلەن, قازاقستان رەس­پۋب­ليكاسى تاۋەلسىزدىگىنىڭ 25 جىل­دى­عىنا وراي 2016 جىلعى 21-23 قىر­كۇيەك كۇندەرى «ۇوتعو» اق  حا­لىقتى ءوز دەنساۋلىعىنا كوڭىل ءبو­لۋگە باعىتتاۋ ءۇشىن جانە اۋرۋدى ەرتە ساتىسىندا انىقتاۋ ءۇشىن اشىق ەسىك كۇنىن وتكىزدى. 750-دەن استام ادام ورتالىقتىڭ جوعارى ساناتتاعى دارىگەرلەرىنە قارالىپ, تەگىن اقىل-كەڭەس الدى. قورىتا ايتقاندا, «ۇلتتىق ونكولوگيا جانە ترانسپلانتولوگيا عىلىمي ورتالىعى» اق –  قازاقستان رەسپۋبليكاسىندا جانە جەكە كلينيكالىق باعىتتار بويىنشا ورتالىق ازيا اۋماعىندا جەتىك مامانداندىرىلعان مەديتسينالىق كومەك كورسەتەتىن جوعارى دەڭگەيدەگى قۋاتتى, كوپ بەيىندى ستاتسيونار. باستى ماقساتىمىز – حالىققا قالتقىسىز قىزمەت كورسەتۋ. ناريمان تابىنباەۆ, «ۇلتتىق ونكولوگيا جانە ترانسپلانتولوگيا عىلىمي ورتالىعى» اق باسقارما توراعاسى