قالىقتاعان اندەر-اي!

جاقىندا قازاق ۇلتتىق ونەر ۋنيۆەرسيتەتىنىڭ «شوپەن» كونتسەرتتىك زالىندا كوپتەگەن حالىقارالىق جانە رەسپۋبليكالىق بايقاۋلاردىڭ لاۋرەاتتارى, وسى وقۋ ورنىنىڭ وقىتۋشىلارى, اعايىندى كومپوزيتورلار سەرىكجان مەن ءالىبي ءابدىنۇروۆتاردىڭ ءان-رومانستارىنان اشىق بايقاۋ, ياعني قوس كومپوزيتوردىڭ ۆوكالدىق شىعارمالارىنان ورىنداۋشىلاردىڭ ءداستۇرلى III باي­قاۋى ءوتتى. جاستاردىڭ مۋزىكالىق شىعارما­شىلىعىن شىڭداۋ ماقساتىنداعى مۇنداي مادەني شارالار الەمدىك تاجىريبەدە وتە ءجيى كەزدەسەتىن جايت. ال ەندى ونەر دوداسىنىڭ اعايىندى كومپوزيتورلاردىڭ تۋىندىلارىنا ارنالىپ جانە مۇنىڭ ءداستۇرلى شاراعا اينالۋى تەك قازاق ۆوكالى ونەرىنە عانا ءتان جوبا بولىپ قالاتىنى داۋسىز. سول سەبەپتى دە انشىلەر سايىسى ەلىمىزدىڭ مۋزىكالىق ومىرىندەگى ەلەۋلى وقيعا سانالادى. سونىمەن قاتار, مۇنى مۋزىكانتتاردىڭ ونەر ۋنيۆەرسيتەتىندەگى ۆوكال جانرىن دامىتۋعا قوسىپ وتىرعان ۇلكەن ۇلەسى دەۋ كەرەك. كومپوزيتسيا كافەدراسىنىڭ دوتسەنتى سەرىكجان مەن اعا وقىتۋشى ءالىبي ءابدىنۇروۆتار ءان-رومانستارىن ورىنداۋدان وتكەن بايقاۋدى قازاق ۇلتتىق ونەر ۋنيۆەرسيتەتى مەن كومپوزيتورلار وداعىنىڭ استانا قالالىق بولىمشەسى بىرلەسىپ ۇيىمداستىرىپ وتىر. قازىلار القاسىنا قازاقستاننىڭ ەڭبەك سىڭىرگەن قايراتكەرى, «ۆوكالدىق ونەر» كافەدراسىنىڭ مەڭگەرۋشىسى ازامات جىلتىر­كوزوۆ توراعالىق ەتتى. ەلوردادا ءۇشىنشى رەت وتكىزىلگەن دوداعا قاتىسۋشىلارعا قالاۋلارى بويىنشا كومپوزيتورلاردىڭ تاڭداۋلى ءبىر-ءبىر ءانى مەن رومانسىن ورىنداۋ مىندەتتەلدى. يسپانيا توپىراعىندا ءحVى عاسىردا باستاۋ العان رومانستار كەرەمەتى قازىرگى تاڭدا تورتكۇل دۇنيەنىڭ كەز كەلگەن بۇرى­شىنا تاراپ ۇلگەرگەن. ولاردىڭ اتتارى ءارتۇرلى بولعانىنا قاراماستان, نازىك ءيىرىمى, ليريكالىق سازى ءبىر-بىرىنە ەگىز قوزىداي ۇقساس بولعاندىقتان جاس جانر قازاق ۇلتتىق ءان كوگىندە دە قاناتىن قومداپ, دامىپ كەلەدى. ويتكەنى, حالقىمىزدىڭ ءان ونەرىنە رومانستار ەشقاشان جات بولعان ەمەس. شەتەلدەردە رومانستى ل.بەتحوۆەن, ف.شۋ­بەرت, ر.شۋمان, ف.شوپەن, ف.ليست سىن­­­دى ۇلى تۇلعالار كوككە ورلەتسە, قا­زاق رومان­سىنىڭ الىبى ا.جۇبانوۆ, م.ءتو­لەباەۆ, ە.برۋسيلوۆسكي, ل.حاميدي, ق.قو­جامياروۆ, س.مۇحامەدجانوۆ, ە.راح­ما­ديەۆ, ع.جۇبانوۆا مۋزىكالارىمەن اس­قاقتادى. سوعان وراي ءان-رومانستار قازاق­ستانداعى كوپتەگەن شىعارمالاردىڭ بەينەلى بەدەرىنە اينالعانى بۇلتارتپاس شىندىق. ءان ونەرىن ناسيحاتتاۋ, شىعارماشىل جاستاردى قولداۋ, تالانتتى جاس مۋزىكانتتاردى ىزدەپ تابۋ – ۆوكالشىلار بايقاۋىن وتكىزۋدەگى باستى ماقسات. قاتىسۋشىلار بايقاۋ باعدارلاماسى تالابىنا ساي ونەر كورسەتىپ, شىعارمالاردى جاتقا ورىندادى. بايگە شارتىندا جاسقا قاراي ەشكىمگە شەكتەۋ قويىلعان جوق. نەگىزىنەن اقىن جۇپار اقتومپىشقىزىنىڭ ولەڭدەرىنە جازىلعان ءان-رومانستار شىرقالدى. وزگەلەردەن بۇرىن مارە سىزىعىن كەسكەن دۇلدۇلدەر قوشەمەتتەلىپ, جەڭىمپازدار ديپلومدارمەن, اقشالاي سىيلىقتارمەن ماراپاتتالدى. جوعارى وقۋ ورىندارى ستۋدەنتتەرى اراسىندا م.يساەۆا مەن ا.قالماعانبەتوۆا ءى جۇلدەگە يە بولسا, كوللەدجدەن م.روماشوۆ وزا شاۋىپ بايگە الدى. قاراشاش توقسانباي, «ەگەمەن قازاقستان»