الاتاۋ اياسىنداعى الامان

قىسقى ۋنيۆەرسيادانىڭ باستالاتىن شاعىنا 100 كۇن قالدى ەندى تۋرا 100 كۇننەن كەيىن, ياعني 2017 جىلعى 29 قاڭتاردا الماتىدا الەم ستۋدەنتتەرىنىڭ قىسقى ويىندارى – ۋنيۆەرسيادا سالتاناتتى جاعدايدا اشىلادى. ول اقپاننىڭ 8-ىنە دەيىن سوزىلادى. ۋنيۆەرسيادا – حالىقارالىق ستۋدەنتتەر سپورتى فەدەرا­تسيا­سىنىڭ (FISU) اياسىندا وتەتىن ستۋدەنتتەر اراسىنداعى حالىقارالىق سپورت جارىستارى. بۇل ءدۇبىرلى دوداعا 17-28 جاس ارالىعىنداعى ستۋدەنتتەر, اسپيرانتتار جانە ۋنيۆەرسيتەتتەر تۇلەكتەرى جىبەرىلەدى. قازاقستان ۋنيۆەرسيادالارعا ءوزى تاۋەلسىزدىك العاننان كەيىن, 1993 جىلدان قاتىسا باستادى. سودان بەرى بۇل سايىستاردىڭ كورى­گىن قىزدىرۋعا رەسپۋبليكانىڭ 700-دەن استام ستۋدەنتى اتسالىسىپ, ناتيجەسىندە 125 مەدالدى جەڭىپ الىپ قايتتى. حالىقارالىق ستۋدەنتتەر سپورتى فەدەراتسياسى 2011 جىلعى 29 قاراشا كۇنى بريۋسسەلدە الما­تى قالاسىن 2017 جىلى وتەتىن 28-ءشى دۇنيەجۇزىلىك قىسقى ۋني­ۆەر­سيا­دانىڭ استاناسى دەپ جاريالادى. ءسويتىپ, قازاقستان تمد ەلدەرى اراسىنان ءبىرىنشى بولىپ قىسقى ۋنيۆەرسيادانى وتكىزۋ قۇقىعىنا قول جەتكىزدى. وسىدان كەيىن ۋنيۆەر­سيا­دا-2017 ويىندارىن وتكىزۋ ءجو­نىندەگى ديرەكتسيا قۇرىلدى. ونىڭ باسشىسى بولىپ نايل نۇروۆ تاعايىندالدى. الماتىدا ۋنيۆەرسيادا-2017 ويىندارىن وتكىزۋ باستاماسىن قازاقستان ستۋدەنتتىك سپورت فەدەراتسياسى كوتەردى. قازىر الماتى قىسقى ۋنيۆەر­سياداسىنا الەمنىڭ 55 ەلىنەن 2000 ستۋدەنت كەلەدى دەپ كۇتىلۋدە. الاتاۋ اياسىندا ستۋدەنتتىك ويىندار ءوتىپ جاتقان كەزەڭدە وعان شەتەلدەردەن كەلەتىن جانە ەلىمىزدىڭ ءار ايماعىنان جينالاتىن 3000 ەرىكتى قىزمەت كورسەتەدى. سونىمەن بىرگە, شەتەلدەردەن 30 مىڭنان استام قوناقتار مەن تۋريستەر كەلەتىنى بەلگىلى بولىپ وتىر. بۇدان بولەك, الەمدىك ستۋدەنتتەر سايىستارىنىڭ تەلەاۋديتوريا­سى 1 ميلليارد ادامدى قۇرايدى. ويىندار ترانسلياتسياسى جاھاننىڭ 80 ەلىنە تاراتىلادى. الماتى قىسقى ۋنيۆەر­سيا­دا­سىندا ستۋدەنت-سپورتشىلار جا­رىس­تىڭ 12 ءتۇرى بويىنشا مەدال­داردى ساراپقا سالادى. ولاردىڭ اراسىندا بياتلون, تاۋ شاڭعىسى, كيورلينگ, كونكي سپورتى, شاڭعى قوسسايىسى, شاڭعى جارىسى, ترام­پلين­نەن شاڭعىمەن سەكىرۋ, سنوۋبورد, مانەرلەپ سىرعاناۋ, فريس­تايل, شايبالى حوككەي, شورت-ترەك بار. جارىستار الماتى قالاسى مەن ونىڭ ماڭىنداعى 8 سپورت نىسانىندا وتەدى. بۇلاردى «شىمبۇلاق» تاۋ شاڭعىسى كۋرورتى, «مەدەۋ» بيىك تاۋلى سپورت كەشەنى, «سۇڭقار» شاڭعى ءترامپلينى حالىقارالىق كەشەنى, بالۋان شولاق اتىنداعى سپورت جانە مادەنيەت سارايى, «الاتاۋ» شاڭعى جانە بياتلون ستاديونى كەشەنى, «تاباعان» سپورت جانە ويىن-ساۋىق كەشەنى, «الماتى ارەنا» جانە «حالىق ارەنا» سپورت كەشەندەرى قۇرايدى. ۋنيۆەرسيادا ۇرانى – «قانا­تىڭدى كەڭ سەرپى!». بۇل جاستاردى ەرەسەكتەر سپورتى بيىگىن باعىن­دىرۋعا شاقىرۋ بولىپ تابىلادى. سەرىك ءپىرنازار, «ەگەمەن قازاقستان»