بۇگىن ىستامبۇل قالاسىندا تۇركى كەڭەسى مەن بۇۇ وركەنيەتتەرى اليانسىنىڭ (UNAOC) بىرلەسىپ ۇيىمداستىرۋىمەن «ەكسترەميزمگە قارسى كۇرەستە جاستاردىڭ ءرولى» اتتى حالىقارالىق كونفەرەنتسيا ءوز جۇمىسىن باستادى.
جيىننىڭ اشىلۋ سالتاناتىندا ءسوز العان بۇۇ وركەنيەتتەر اليانسىنىڭ جوعارى وكىلى ءناسىر ابد ءال-ءازيز ان-ناسەر, تۇركيا پرەمەر-ءمينيسترىنىڭ ورىنباسارى تۇعرىل تۇركەش پەن تۇركى كەڭەسىنىڭ باس حاتشىسى راميل گاسانوۆ الەمدىك ەكسترەميزمنىڭ جاستارعا اسەرى مەن توندىرەتىن قاۋىپى جايلى كەڭىنەن باياندادى.
سالتاناتتى شاراعا بۇۇ جانىنداعى ۇيىمداردىڭ جوعارى لاۋازىمدى وكىلدەرى, تۇركيا ۇكىمەت مۇشەلەرى, حالىقارالىق ۇيىم باسشىلارى, ديپلوماتتار, سونىمەن بىرگە مەملەكەت جانە قوعام قايراتكەرلەرىمەن قاتار حالىقارالىق تۇركى اكادەمياسىنىڭ (TWESCO) دەلەگاتسياسى قاتىستى.
ەكى كۇنگە جالعاساتىن عىلىمي جيىنعا افريكا جانە ورتالىق ازيانىڭ 40-قا جۋىق مەملەكەتىنەن كورنەكتى عالىمدار, جاس كوشباسشىلار مەن بىلىكتى ساراپشىلار كەلگەن. جالپى كونفەرەنتسيادا ەكسترەميزمنىڭ ساياسي, الەۋمەتتىك دامۋ اسپەكتىلەرى مەن لاڭكەستىك توپتاردىڭ پايدا بولۋ سەبەپتەرى, سونداي-اق ەكسترەميزممەن كۇرەسۋدە جاستاردىڭ ءرولى سەكىلدى بىرقاتار كەلەلى ماسەلەلەر توڭىرەگىندە وي ءبولىسىپ, پىكىر الماسۋ جوسپارلانعان.
ايتا كەتۋ كەرەك, بۇل كونفەرەنتسيانىڭ ناتيجەلەرى بيىل قاراشا ايىندا قىرعىزستاندا «جاستار جانە سپورت» تاقىرىبىندا وتەدى دەپ جوسپارلانعان تۇركى كەڭەسى مەملەكەت باسشىلارىنىڭ التىنشى سامميتىندە ۇسىنىلاتىن بولادى.
