قازاقستان 2018 جىلى 20 جاڭا سۋ قويماcىن سالۋدى باستايدى

قازاقستان 20 جاڭا سۋ قويمانىڭ قۇرىلىسىن 2018 جىلى قولعا الادى دەپ كۇتىلۋدە. بۇل تۋرالى بۇگىن اۋىل شارۋاشىلىعى مينيسترلىگىندە وتكەن ءباسپاسوز ءماسليحاتىندا مينيسترلىكتىڭ سۋ رەسۋرستارى كوميتەتى سۋ شارۋاشىلىق مەكەمەلەرىن دامىتۋ جانە پايدالانۋعا بەرۋ باسقارماسىنىڭ جەتەكشىسى مۇرات بەيسەنوۆ ءمالىم ەتتى, دەپ حابارلايدى قازاقپارات. باسقارما باسشىسى ءسوز باسىندا قازاقستانداعى سۋ قويمالاردىڭ سانىنا جانە ولاردى باسقارۋ پرينتسيپىنە توقتالدى. «وسى جىلدىڭ 1 قازانىنداعى مالىمەتكە سۇيەنسەك, قازاقستان رەسپۋبليكاسىنىڭ اۋماعىندا 309 سۋ قويماسى بار. ونىڭ ىشىندە 83-ءى رەسپۋبليكالىق مەنشىكتە, 191 سۋ قويما كوممۋنالدىق  مەنشىكتە, 35-ءى جەكەمەنشىك. سۋ رەسۋرستارى كوميتەتىنىڭ اۋماقتاردا سەگىز باسسەيندىك ينسپەكتسياسى بار. جالپى, قازاقستاندا سۋ رەسۋرستارىن باسقارۋ ءپرينتسيپى باسسەيندىك پرينتسيپكە نەگىزدەلگەن. سوندىقتان دا, سۋ رەسۋرستارى كوميتەتىنىڭ باسسەيىندىك ينسپەكتسيالارى ءىرى سۋ قويمالارىنىڭ جۇمىسىنا ۇنەمى مونيتورينگ جۇرگىزەدى»,-دەپ حابارلادى م.بەيسەنوۆ. ەكى جىل بۇرىن وسى سۋ رەسۋرستارى كوميتەتىنىڭ باسشىلىعى قازاقستان 2020 جىلعا دەيىن 20 جاڭا سۋ قويما سالۋ تۋرالى باعدارلاما ازىرلەدى دەپ حابارلاعان ەدى. قازاقپارات ءتىلشىسىنىڭ وسى ماسەلە توڭىرەگىندەگى سۇراعىنا جاۋاپ بەرگەن م.بەيسەنوۆ ول سۋ قويمالاردى قارجىلاندىرۋ تەك 2017-2018 جىلدارى باستالاتىنىن حابارلادى. «ەلباسىنىڭ تاپسىرماسى بويىنشا, سۋ رەسۋرستارىن باسقارۋ جونىندەگى مەملەكەتتىك باعدارلاما اياسىندا 21 سۋ قويما سالىنادى دەپ كوزدەلگەن. ازىرگە, ەكونوميكاداعى داعدارىسقا بايلانىستى, اقشا بولىنگەن جوق. بۇگىنگى تاڭدا «قازسۋشار» رەسپۋبليكالىق مەملەكەتتىك كاسىپورنىنىڭ ماماندارى جاڭا سۋ قويمالارىن سالۋ جونىندەگى تەحنيكالىق نەگىزدەمە  ازىرلەپ جاتىر. قاراجات 2017 جىلدان باستاپ اۋەلى تەحنيكالىق ەكونوميكالىق نەگىزدەمە ازىرلەۋگە, سودان كەيىن جوبالاۋ-سمەتالىق قۇجاتتامالارىن ازىرلەۋگە, 2018 جىلدان باستاپ وسى جوبالاردى جۇزەگە اسىرۋعا اقشا بولىنەدى دەپ جوسپارلانىپ وتىر. بۇگىنگى تاڭدا ازىرگە قارجى بولىنگەن جوق. بيۋدجەتتىك كودەكسكە سايكەس, ءبىز جاڭا تالاپتاردى ورىنداپ, ۇلتتىق ەكونوميكالىق مينيسترلىكتىڭ قورىتىندىسىن الۋىمىز كەرەك», - دەپ ءتۇسىندىردى م.بەيسەنوۆ.