ەلباسى «CNBC Arabia» تەلەارناسىنا سۇحبات بەردى

مەملەكەت باسشىسى سۇحبات بارىسىندا سيرياداعى جاعدايدى تەزىرەك شەشۋ ءۇشىن وسىعان مۇددەلى بارلىق مەملەكەتتەر ءبىر مامىلەگە توقتاۋى تيىستىگىن ايتتى. وسى سۇحباتتان بەينە-ءۇزىندى پرەزيدەنتتىڭ ءباسپاسوز قىزمەتىنىڭ فەيسبۋكتەگى پاراقشاسىندا جاريالاندى. تەلەارنا ءتىلشىسىنىڭ «سيريا ماسەلەسى وتە كۇردەلى. ءالى شەشىمىن تاپقان جوق. ءسىزدىڭ ويىڭىزشا, سيرياداعى داعدارىس جاقىن ارادا ءوز شەشىمىن تابا ما, الدە ۇزاققا سوزىلا ما؟» - دەگەن سۇراعىنا قازاقستان پرەزيدەنتى: ەڭ ءبىرىنشى, بارلىق مۇددەلى مەملەكەتتەر كەلىسىپ, ءبىر جەردەن ءسوز شىعارۋى قاجەت. اسىرەسە, ارالاسىپ جاتقان ۇلكەن مەملەكەتتەر. وكىنىشكە وراي, ارقايسىسى وزدەرىنىڭ مۇددەسىن قورعاپ, ءارتۇرلى جاعدايمەن كىرىسەدى. ارقايسىسىنىڭ ءوز مۇددەسى بار. لاڭكەستىككە قاتىسىپ جۇرگەن ادامدار سونى قولدانادى. بىرىنە ءبىرىن قارسى قويادى. سوندىقتان, مەنىڭ ۇسىنىسىم - بۇۇ اياسىندا بۇكىل دۇنيەجۇزىلىك قوعامداستىق بىرلەسىپ لاڭكەستىككە قارسى تۇرىپ, سيريانىڭ ماسەلەسىن شەشۋى كەرەك. باسقا جول جوق دەپ سانايمىن. سەبەبى, بۇل بارلىق مەملەكەتتەرگە قاۋىپ. ءبىزدى بىلمەيتىن باسقا دۇنيە, باتىس ەلدەرى مۇنىڭ بارلىعى مۇسىلمانداردان شىعىپ وتىر دەپ ويلايدى. لاڭكەستىك پەن مۇسىلماننىڭ اراسىندا ەشقانداي دا تەڭدىك (بايلانىس) جوق. بارلىق ەلدەر بىرىگىپ قارسى شىقسا, ونى جەڭۋگە بولادى»,- دەپ جاۋاپ بەرگەن. ەلباسى سۇحبات بارىسىندا ەلىمىزدىڭ بۇۇ قاۋىپسىزدىك كەڭەسىنىڭ 2017-2018 جىلدارداعى تۇراقتى ەمەس مۇشەلىگىنە, يادرولىق قارۋدى تاراتپاۋ ىسىندەگى كۇش-جىگەرىنە جانە رەسپۋبليكانىڭ الەۋمەتتىك-ەكونوميكالىق دامۋىنا قاتىستى قويىلعان سۇراقتارعا دا جاۋاپ بەردى.