2016 جىلى جالعان كاسىپكەرلىك مەملەكەتكە 94 ملرد تەڭگە زيان اكەلدى

2016 جىلى جالعان كاسىپكەرلىكتەن مەملەكەتكە 94 ملرد تەڭگە زارداپ كەلدى. بۇل تۋرالى بۇگىن قر جوعارى سوتتا وتكەن «ەكونوميكالىق قىلمىستارعا بايلانىستى ىستەردى قاراۋ كەزىندەگى وزەكتى پروبلەمالار» اتتى دوڭگەلەك ۇستەلدە قر قارجى مينيسترلىگى مەملەكەتتىك كىرىستەر كوميتەتى توراعاسىنىڭ ورىنباسارى تىلەۋ جاڭعاراشەۆ ءمالىم ەتتى. «جالعان كاسىپكەرلىك ارقىلى سالىقتان جالتارۋ, قاراجاتتى زاڭسىز سىرتقا شىعارۋ نەمەسە كەرىسىنشە ونى زاڭداستىرۋ سىندى قۇقىقبۇزۋشىلىقتار جاسالادى. رەسمي ستاتيستيكا بويىنشا, 2015 جىلى اتالمىش قىلمىستاردىڭ كەسىرىنەن مەملەكەتكە 92 ملرد تەڭگە زالال كەلگەن. 2016 جىلدىڭ 9 ايىندا ونىڭ كولەمى 94 ملرد تەڭگەدەن اسىپ وتىر. ءبىز بۇنى مەملەكەتتىڭ ەكونوميكالىق قاۋىپسىزدىگىنە كەلىپ وتىرعان تىكەلەي قاۋىپ دەپ سانايمىز. «كولەڭكەلى ەكونوميكانىڭ» ۇلەسى ءجىو-ءنىڭ 28 پايىزىن قۇرايدى. ونىڭ نەگىزگى بولىگىن جالعان كاسىپكەرلىك ارقىلى زاڭسىز قاراجاتتى زاڭداستىرۋ الىپ جاتىر. قازىرگى ۋاقىتتا ەكونوميكالىق تەرگەۋ ورگاندارىنىڭ قاراۋىندا 2 مىڭنان استام قىلمىستىق ءىس بار. وندا شامامەن 15 مىڭنان استام كونتراگەنت تەرگەۋگە الىنىپ وتىر», - دەيدى ول. ونىڭ ايتۋىنشا, ءتيىستى زاڭدارعا وزگەرتۋلەر مەن تولىقتىرۋلار ەنگىزىلمەسە, جالعان كاسىپكەرلىككە قاتىسى جوق بيزنەسكە زالالى كەلۋى ىقتيمال. سەبەبى تەرگەۋگە الىنعان كونتراگەنتتەردىڭ قاتارىندا ءوز ءىسىن ادال اتقارىپ جۇرگەن كاسىپكەرلەر دە بار. ءوز كەزەگىندە «اتامەكەن» ۇلتتىق كاسىپكەرلەر پالاتاسىنىڭ باسقارما توراعاسىنىڭ ورىنباسارى رۋستام ءجۇرسىنوۆ قىلمىستىق كودەكستىڭ جالعان كاسىپكەرلىك تۋرالى 215-بابىنىڭ قۇرىلىمىن قايتا قاراۋ قاجەتتىگىن اتاپ ءوتتى. «جالعان كاسىپكەرلىك دەگەن قىلمىس تمد ەلدەرىنىڭ رەسەي, قازاقستان جانە بەلارۋس مەملەكەتتەرىنەن باسقا ەلدە جوق», - دەيدى ر. ءجۇرسىنوۆ. سوندىقتان ول تەرگەۋ بارىسىندا ادال كاسىپكەرلەردىڭ كاسىبىن «تۇنشىقتىرىپ» تاستاماۋ ماقساتىندا تۇبەگەيلى وزگەرىستەردىڭ قاجەتتىلىگىن اتاپ ءوتتى.