وتقارۋ ويىنشىق ەمەس...

تەرروريزم قاۋپىنىڭ الدىن الۋ ماقساتىندا بىرقاتار زاڭعا وزگەرىستەر مەن تولىقتىرۋلار ەنگىزىلۋدە. پارلامەنتتىك جۇمىس توبىنىڭ قاراۋىنا ۇسىنىلعان «اينالىمداعى جەكەلەگەن قارۋ-جاراق تۇرلەرىنە مەملەكەتتىك باقىلاۋدى جۇزەگە اسىرۋ تۋرالى» زاڭ جوباسى دا وتكىر ماسەلەنى قوزعايدى. بۇل زاڭ جوباسىنا ەنگىزىلۋى ءتيىستى تولىقتىرۋلاردى ىشكى ىستەر مينيسترلىگى ازىرلەپ, ۇسىنعان. قولدانىستاعى زاڭ تالاپتارىن كۇشەيتۋ سوڭعى كەزدەرى ورىن العان توتەنشە وقيعالاردان كەيىن ماڭىزعا يە بولىپ وتىر. اتاپ ايتقاندا, وسىعان دەيىن جەكە ادامداردىڭ يەلىگىنە بەرىلەتىن قارۋ تۇرلەرى «5 + 5» ەرەجەسىمەن ساۋدالاناتىن ەدى. ياعني, ءبىر جەكە تۇلعاعا 5 قىسقا ۇڭعىلى مىلتىق جانە 5 تەگىس ۇڭعىلى وتقارۋ ساتىپ الۋعا رۇحسات بەرىلەتىن. بىلاي قارا­عانعا, ءبىر ادامنىڭ باسىندا ون ءتۇرلى وتقارۋدىڭ بولۋى تاڭدانىس تۋعىزعانىمەن, اڭشىلىق پەن مەرگەندىك كاسىبىن مەڭگەرگەن تاراپ­تىڭ وكىلدەرى ءۇشىن بۇل قالىپتى سانالادى ەكەن. «قورامساق» قارۋ-جاراق اسسوتسياتسياسىنىڭ ۆيتسە-پرەزيدەنتى سەرگەي كاتنوۆتىڭ ايتۋىنشا, ناعىز اڭشى ءۇشىن بەسقارۋدىڭ ساي بولۋى شارت. «ءبىر اڭشى وسىنشاما قارۋدى قايتەدى؟ مىسالعا, ءىرى تۇلعالى جانۋارلاردى شولاق مىلتىقپەن اتىپ قۇلاتا المايسىز. سول سياقتى, جاقىن قاشىقتىققا ۇشاتىن وقپەن كوزدەگەنىڭىزدى الىس­تان اتىپ ءتۇسىرۋ مۇمكىن ەمەس. اڭشىلىقتىڭ تاعى ءبىر ەرەكشەلىگى, قۇس اتۋعا ارنالعان مىلتىقتى قاسقىرعا كەزەنۋگە ءمۇل­دەم بولمايدى. وسىنداي شارتپەن العاندا, ءبىر ادامدا 10 ءتۇرلى قا­رۋدىڭ بولۋى قيسىندى...», دەيدى ول. ءدال وسى كاسىبي اڭشىلار مەن مەرگەندەردىڭ قاۋىمداستىعى زاڭ تالاپتارىنىڭ بىردەن كۇشەي­تىلگەنىنە قاتىستى قارسى ءۋاج ايتۋدا. سونىڭ ءبىر پاراسىن الما­تىدا باس قوسقان ماماندار تال­قىعا سالدى. «كيپر» تالداۋ ورتا­لىعىنىڭ ۇيىمداستىرۋىمەن بولعان تالقىلاۋدا زاڭ جوباسىنا ەنگىزگەلى تۇرعان وزگەرىستەر ءدال وسى قالپىندا قابىلداناتىن بولسا, وتاندىق قارۋ-جاراق دۇكەندەرى مەن اڭشىلار قاۋىمداستىعى زارداپ شەگۋى مۇمكىن دەگەن پىكىر ايتىلدى. جوبادا جەكە تۇلعالارعا قارۋ ساۋدالاۋدىڭ مولشەرىن «5 + 5» تالابىنان «2 + 2» دەڭگەيىنە ءتۇسىرىلۋ كوزدەلگەن. تولىق تەكسەرۋدەن ءوتىپ, قارۋ ۇستاۋعا رۇقسات بەرىلگەن ازامات ەندى تەك اڭشى قارۋىنىڭ  ەكى تۇرىنە عانا قول جەتكىزە الادى. اڭشىلىقتى كاسىپ ەتكەندەر مەن وسى سالادان ناپاقا تاۋىپ, قوماقتى سالىق تولەپ وتىرعان كاسىپكەرلەر بۇعان نارازى. ۇلتتىق مەرگەندەر قاۋىمداستىعى باسقارماسىنىڭ توراعاسى الەكساندر تەننىڭ ايتۋىنشا, ىشكى ىستەر مينيسترلىگى ءبىر-جاقتى كوزقاراس ۇستانىپ وتىر ەكەن. – ءيا, قارۋ-جاراق ويىنشىق ەمەس. بىراق, اڭشى قارۋىنا نەمەسە ءوزىن ءوزى قورعاۋ ماقساتىندا ۇستايتىن قارۋعا قاۋىپ توندىرەتىن قۇرال رەتىندە قاراپ, ونى بىردەن تارتىپ الۋعا تىرىسپاۋ كەرەك. ەڭ الدىمەن, ەلىمىزدەگى اڭشىلار مەن قارۋ ۇستاۋعا رۇقسات بەرىلگەن ادامدار ءجىتى باقىلاۋدا بولۋى ءتيىس. ولار جىل سايىن ارنايى تەكسەرۋدەن ءوتىپ, كەرەكتى انىقتامالاردى ىشكى ىستەر ورگاندارىنا وتكىزىپ تۇرادى. اڭشىلاردىڭ ءۇي جاعدايىندا قارۋ ساقتايتىن ورىندارى دا تەكسەرىلەدى. قاۋىپسىزدىك شارالارى ساقتالادى. ولار تۋرالى جەكە مالىمەتتەر دە وتە قۇپيا, پوليتسيامەن قورعالادى, – دەدى مامان. قالاي بولعاندا دا, قارۋ-جا­راق دۇكەندەرىنە قاتىستى شا­را­لاردىڭ دا قاتايتىلعانى دۇ­رىس. پارلامەنتتىك جۇمىس تو­بى­­نىڭ قاراۋىنا ۇسىنىلعان «اي­نا­لىم­داعى جەكەلەگەن قارۋ-جا­راق ءتۇر­لەرىنە مەملەكەتتىك باقى­لاۋدى جۇزەگە اسىرۋ تۋرالى» زاڭ جوباسى ەلىمىزدىڭ تىنىشتىعىن ساقتاۋعا باعىتتالعان تولىققاندى قۇجاتقا اينالعانى ماڭىزدى. ماماندار پىكىرى وسىعان سايادى. قالماحانبەت مۇقامەتقالي, «ەگەمەن قازاقستان» الماتى