قازاقستاندا جۇمىسشى ماماندىقتارىن دايارلاۋ ەكى ەسە ۇلعايادى

قر ءبىلىم جانە عىلىم مينيسترلىگى قىسقامەرزىمدى كەلەشەكتە جۇمىسشى ماماندىقتارى بويىنشا دايارلىقتى جىلىنا 40 مىڭنان 80 مىڭعا دەيىن 2 ەسە ۇلعايتۋدى جوسپارلاپ وتىر. «ءبىز تەحنيكالىق جانە كاسىپتىك ءبىلىم بەرۋدى تەگىن ۇسىنۋدىڭ جاڭا تەتىگىن ازىرلەدىك. ەندى تۇلەك ارنايى ورتا جانە جۇمىسشى بىلىكتىلىگىنە اقىلى جانە تەگىن نەگىزدە تۇسە الادى. 2017 جىلى گرانتتار ءبىرىنشى كەزەكتە جۇمىسشى ماماندىقتارىنا, ال سوڭعى كەزەكتە, گرانتتار ارتىلىپ جاتسا, ەكونوميكالىق جانە زاڭگەرلىك ماماندىقتارىنا بەرىلەدى دەپ ۇسىنىلادى. ءبىز قىسقامەرزىمدى كەلەشەكتە جۇمىسشى ماماندىقتارى بويىنشا دايارلىقتى 2 ەسەگە – 40 مىڭنان 80 مىڭعا دەيىن ۇلعايتۋدى جوسپارلاپ وتىرمىز», — دەدى قر ءبىلىم جانە عىلىم ءمينيسترى ەرلان ساعاديەۆ «2015 جىلعى 30 قاراشاداعى قر پرەزيدەنتىنىڭ جولداۋى تۇرعىسىنان جۇمىسپەن قامتۋدىڭ جول كارتاسىن قۇقىقتىق قامتاماسىز ەتۋ جونىندەگى شارالار تۋرالى» تاقىرىبىنا وتكەن دوڭگەلەك ۇستەل بارىسىندا. ايتا كەتۋ كەرەك, قر بعم دەرەكتەرى بويىنشا جىل سايىن كوللەدجدەردەن 14 مىڭعا جۋىق ادام نەمەسە 13%, ال جوعارعى وقۋ ورىندارىنان 40 مىڭعا جۋىق ادام وقۋدان شىعارىلادى. مەكتەپتەن كەيىن بىلىكتىلىكسىز 21 مىڭ ادام نارىققا شىعادى.