قانات يسلامنىڭ قارسىلاسى قازاقستاندىق تىلشىلەرگە سۇحبات بەرەدى

20 قازان كۇنى كاسىپقوي بوكسشى قانات يسلامنىڭ قارسىلاسى پاتريك اللوتەي الماتىعا كەلەدى, دەپ حابارلايدى ەگەمەن-اقپارات. الماتى قالالىق دەنە تاربيەسى جانە سپورت باسقارماسىنىڭ اقپاراتىنا سايكەس, پاتريك اللوتەي مەن ونىڭ كومانداسى 20 قازان كۇنى الماتىعا كەلەدى. ال 21 قازان كۇنى ساعات 11:00-دە «سۇڭقار» حالىقارالىق ترامپلين كەشەنىندە ءباسپاسوز ماسليحاتى وتەدى. وندا قانات يسلام مەن پاتريك اللوتەي تىلشىلەردىڭ بارلىق سۇراقتارىنا جاۋاپ بەرەتىن بولادى. ەستەرىڭىزگە سالا كەتەيىك, 29 قازاندا الماتىدا «الماتى ارەنا» سپورت كەشەنىندە قانات يسلام مەن پاتريك اللوتەيدىڭ جەكپە-جەگى وتەدى. قانات يسلام ءوزىنىڭ «WBA fedelatin» چەمپيوندىق بەلبەۋىن قورعاپ, جارتىلاي ورتا سالماقتا «WBO intercontinental» تۇجىرىمىنىڭ چەمپيوندىق بەلبەۋى مەن «UBC» تۇجىرىمىنىڭ الەم چەمپيونى اتاعى ءۇشىن جۇدىرىقتاسادى. قانات يسلام وسى ۋاقىتقا دەيىن  21 كەزدەسۋ وتكىزىپ, بارىندە جەڭىسكە جەتكەن. ونىڭ 18-ءىن نوكاۋتپەن ۇتقان. سپورتشىنىڭ لاقاپ اتى - «قازاق». قارسىلاسى - گانالىق بوكسشى پاتريك اللوتەي. ول كاسىپقوي بوكستا وسى ۋاقىتقا دەيىن 36 كەزدەسۋ وتكىزىپ, ەكەۋىندە عانا ۇتىلعان, قالعان جەكپە-جەكتەرىن جەڭىسپەن اياقتادى. سونداي-اق 24 كەزدەسۋىندە قارسىلاستارىن نوكاۋتپەن ۇتقان. «قارسىلاسىم وسال ەمەس. ول دا «جەڭسەم» دەگەن نيەتپەن كەلە جاتىر. بىراق, مەن كاسىبي رينگتە العاش رەت ءوز ەلىمىزدە جەرگىلىكتى جانكۇيەرلەر الدىندا شارشى الاڭعا شىققالى وتىرمىن. مەن ولاردى ۇياتقا قالدىرمايمىن دەپ ويلايمىن. الماتىدا كۇندىز-ءتۇنى جاتتىعىپ جاتىرمىن. قازىر جۇمىس جوسپارىم ءبارى ويداعىداي», - دەگەن بولاتىن قانات يسلام. ايتا كەتەيىك, «الماتى ارەنا» سپورت كەشەنىندە وتەتىن اتالمىش كەشتە ءوزىنىڭ كاسىبي بوكستاعى العاشقى كەزدەسۋىن الەم چەمپيونى, ريوداعى وليمپيادا ويىندارىنىڭ قاتىسۋشىسى جانىبەك ءالىمحان ۇلى دا وتكىزەدى. سونىمەن قاتار ەل نامىسىن جانقوش تۇراروۆ, رۋسلان مىرساتاەۆ, الي احمەتوۆ, ايدار شارىباەۆ, ايدوس ەربوسىن ۇلى قورعايتىن بولاتىن. بوكس كەشىنە بيلەتتەر باعاسى 1 مىڭنان 10 مىڭ تەڭگەگە دەيىن.