قازاقستاندا جىل سوڭىنا دەيىن جۇزگە جۋىق ءسۇت جيناۋ بەكەتتەرى اشىلادى

پرەمەر-ءمينيسترىنىڭ ورىنباسارى - اۋىل شارۋاشىلىعى ءمينيسترى اسقار مىرزاحمەتوۆ اۋىلدىق جەرلەردە جۇمىس ورىندارىن قۇرۋدىڭ جوسپارى تۋرالى ايتتى دەپ حابارلايدى ەگەمەن-اقپارات. «بۇل ماسەلە اۋىل شارۋشالىعى سالاسى ءۇشىن وزەكتى ەكەنى تۇسىنىكتى. ويتكەنى, قوسالقى شارۋاشىلىقتاردا ءوزىن-ءوزى جۇمىسپەن قامتاماسىز ەتكەن ادامداردىڭ سانى 675 مىڭدى قۇراپ وتىر. ەكىنشى جاعىنان الىپ قاراعاندا, مال شارۋاشىلىعى ونىمدەرى بويىنشا ەت پەن ءسۇت ءبىرىنشى كەزەكتە تۇر جانە سونىڭ 70-80 پايىزى وسى قوسالقى شارۋاشىلىقتاردا ءوندىرىلىپ وتىر. ال ەندى بۇل وندىرىلگەن ءونىمنىڭ تيىمدىلىگى قانداي؟ ارينە, تيىمدىلىك دەڭگەيى وتە تومەن. سەبەبى, ول ءونىمدى دايىنداۋ, وڭدەۋ شارالارى, سونداي-اق ساتۋشىلارعا جەتكىزۋ, ياعني لوگيستيكا ماسەلەسى شەشىلمەگەن»,-دەدى مىرزاحمەتوۆ سەناتتا وتكەن «قر پرەزيدەنتىنىڭ 2015 جىلعى 30 قاراشاداعى جولداۋى اياسىندا جۇمىسپەن قامتۋ جول كارتاسىن قۇقىقتىق قامتاماسىز ەتۋ شارالار تۋرالى» تاقىرىبىندا ءوتىپ جاتقان دوڭگەلەك ۇستەل وتىرىسىندا. وسى رەتتە ول ەلىمىزدە اۋىل شارۋاشىلىعى ونىمدەرىن وڭدەيتىن كاسىپورىنداردىڭ جۇكتەمەسى رەسپۋبليكا بويىنشا ورتاشا ەسەپپەن 60 پايىزدى قۇراپ وتىرعاندىعىن جەتكىزدى. ال, كەيبىر زاۋىتتاردىڭ جۇكتەمەسى 10 پايىزعا دا جەتپەيدى. «بۇل ەكى ماسەلەنى بىرىمەن ءبىرىن ۇشتاستىرا وتىرىپ, سالاداعى شارالاردى شەشۋدە ءتيىستى جۇمىستار اتقارىلۋدا. ول ءۇشىن ارنايى ۇشجىلدىق جوسپاردى قۇردىق. ونىڭ اياسىندا شىلدە-تامىز ايلارىندا جۇمىس توپتارىن جاساقتاپ, وڭىرلەرگە جىبەردىك»,-دەپ توقتالدى مىرزاحمەتوۆ. وسى رەتتە ءسۇتتى جيناۋ بەكەتتەرى مەن مالدى بورداقىلايتىن شاعىن الاڭداردىڭ جۇمىسىن دامىتۋ شارالارى قامتىلماق. «ءبىزدىڭ جاساعان ينديكاتورىمىزعا سايكەس, 2016 جىلدىڭ اياعىنا دەيىن 150 اۋىل شارۋاشىلىعى كوپەراتيۆتەرىن اشۋ, 100-گە جۋىق ءسۇت قابىلدايتىن بەكەتتەردى ىسكە قوسۋدى جانە 2 200-گە تارتا وتباسىلىق مال الاڭشالارىن اشۋدى العاشقى كەزدە جوسپارلانعان بولاتىنبىز. كەيىن ونىمدەردى قايتا وڭدەيتىن كاسىپورىنداردىڭ تاراپىنان قىزىعۋشىلىقتىڭ ارتۋىنا بايلانىستى ينديكاتورلاردى قايتا قاراپ شىقتىق. بۇگىنگى تاڭدا قارجىنى يگەرۋ 1 ساۋىرگە دەيىن بولعان سوڭ, وسى مەرزىمگە دەيىن سوزا وتىرىپ, ينديكاتورلاردى كوبەيتتىك. ەندى قۇرىلاتىن كوپەراتيۆتەردىڭ سانى 150-دەن 250-گە, ءسۇت جينايتىن بەكەتتەر 100-دەن 225-كە, ال بورداقىلاۋ الاڭشالارى 2 200-دەن 4 300-گە دەيىن ارتىپ وتىر. بۇل قاناتقاقتى جوبا رەتىندە بيىل بارشا وڭىردە باستالاتىن ينديكاتوردىڭ سيپاتتاماسى وسىنداي»,-دەدى مىرزاحمەتوۆ. ۇشجىلدىق جوسپارعا سايكەس, 200 مىڭنان استام قوسالقى شارۋاشىلىقتار قامتىلماق, سونداي-اق 70 مىڭنان استام جاڭا جۇمىس ورىندارى قۇرىلادى دەپ كۇتىلۋدە.