ۇلتتىق برەندكە داۋىس بەرۋ باستالدى

بۇل تۋرالى اقپارات جانە كوممۋنيكاتسيالار ءمينيسترى داۋرەن اباەۆ فەيسبۋكتەگى پاراقشاسىندا مالىمدەدى, دەپ حابارلايدى «ەگەمەن اقپارات». «15 قازاندا ءبىز ەلىمىزدىڭ ۇلتتىق برەندىن انىقتاۋ جونىندەگى بايقاۋعا ءوتىنىش قابىلداۋدى اياقتادىق. جالپى, تامىزدىڭ 31-نەن باستاپ 966 ءوتىنىم كەلگەن بولسا, سولاردىڭ 794-ءى داۋىس بەرۋ كەزەڭىنە جىبەرىلىپ وتىر. مەنىڭ ويىمشا, بۇل ازاماتتارىمىزدىڭ ەلدىك ماسەلەگە بەي-جاي قارامايتىنىن كورسەتتى. بايقاۋعا كاسىبي ماماندارمەن بىرگە ەلىمىزدىڭ تۇكپىر-تۇكپىرىنەن جانە كورشىلەس مەملەكەتتەردەن اۋەسقوي بەزەندىرۋشىلەر قاتىستى. ال بۇگىن بايقاۋدىڭ كەلەسى كەزەڭىنە وتەتىن جۇمىستاردى انىقتاۋ ءۇشىن SMS داۋىس بەرۋ باستالادى», – دەپ جازدى مينيستر. SMS جولداۋ تەگىن. سول ارقىلى ءوزىڭىز قالاعان ءبىر عانا جۇمىسقا داۋىس بەرە الاسىز. ءمينيستردىڭ ايتۋىنشا, بايقاۋدىڭ جۇمىس توبى داۋىس بەرۋدىڭ كوپتەگەن نۇسقاسىن قاراستىردى. ويتكەنى, 800-گە جۋىق ءوتىنىمنىڭ بارلىعىن جۇرت نازارىنا تەڭ دارەجەدە ۇسىنۋ وڭايعا تۇسكەن جوق. سوندىقتان بارلىق 794 جۇمىستى ولاردىڭ رەتتىلىگى ءاربىر قولدانۋشى ءۇشىن ءارتۇرلى بولاتىن تارتىپپەن ورنالاستىرىلعان. وزىڭىزگە ۇناعان, ۇلتتىق برەندكە وسى لايىق دەگەن جۇمىسقا مىنا سىلتەمە ارقىلى داۋىس بەرە الاسىز: http://mic.gov.kz/kk/competition/votes/1