تۇرىك سەريالدارىنىڭ الەمدە 400 ملن كورەرمەنى بار

  سوڭعى جىلدارى تۇركيادا كينو سالاسىنا اقشا سالاتىن كاسىپكەرلەر كوبەيدى. قۇيعان قارجىسىنىڭ قايتارىمى جامان بولمايتىنىن جاقسى تۇسىنگەندەي. ءىستىڭ كوزىن تاۋىپ, ءتىلىن تۇسىنگەن ادامعا بۇل دا ۇلكەن بيزنەس. باۋىرلاس ەلدەگى كينوكومپانيالار مەن پروديۋسەرلىك ورتالىقتار بۇنى بيزنەس دەپ بىلگەنىنە بىرنەشە جىلدىڭ ءجۇزى بولدى. ماقساتى – 78 ميلليون تۇرعىنى بار ىشكى نارىقتى يگەرۋ عانا ەمەس, تەلەتاۋارلارىن سىرت ەلدەرگە دە ەكسپورتتاۋ. ماقساتتارىنا جەتىپ تە جاتقان سياقتى. ونى ءوزىمىزدىڭ ارنالاردىڭ مازمۇنىنان اڭعارۋعا بولادى. 2002-2003 جج. برازيليا مەن ارگەنتينا سەريالدارى سايابىرسىپ, ولاردىڭ ورنىن تۇرىك سەريالدارى باستى. اننا, يزابەللا, راكەل دەگەن ەسىمدەردىڭ ورنىنا شەحريزات, زەينەپ, بەريۆان دەپ ات قويۋ سانگە اينالدى. ۇلدارىمىز «يۋسۋفپىن» دەپ ماقتانىپ, «قامبارسىڭ» دەپ كەمسىتەتىن بولدى. بۇل ماقتانىش ەمەس ارينە. سەريال ساتىپ الۋ ءداستۇرى ءالى ۇزىلگەن جوق. ال, تۇرىك اعايىندار ءبىز سەكىلدى سەريالعا «ءزارۋ» ەلدەرگە كينو ساتىپ, بۇل سالادان دا كاسىپتىڭ كوزىن تاپقانداي. ماسەلەن, قازاق كورەرمەندەرىنە جاقسى تانىس اتاقتى «سۇلتان سۇلەيمەن» تاريحي سەريالى بيىل 20 ميلليون دوللار اسا تابىسپەن تۇرىك تەلەيندۋسترياسىندا رەكورد جاساپ وتىر. كەزىندە ەلىمىزدەگى  تەلەارنالاردىڭ بىرىنەن كورسەتىلگەن  «كوكجالدار مەكەنى» (kurtlar vadisi) سەريالى دا قوماقتى قارجى تاپقان تەلەجوبالاردىڭ ءبىرى. 15 ملن دوللارلىق پايدامەن «سۇلتان سۇلەيماننەن» كەيىن ەكىنشى ورىندا. بۇلاردان دا باسقا پروديۋسەرلىك ورتالىقتاردىڭ قورجىنىن قامپايتىپ,  ەل قازىناسىنا تامشىلاپ بولسا دا قارجى قۇيىپ جاتقان سەريالدار بارشىلىق. كينو ونەر عانا ەمەس, تابىس ءھام يدەولوگيا ەكەنىن تۇسىنگەن تۇرىك ۇكىمەتى كينو تۇسىرەمىز دەگەندەردى دەمەپ جۇرگەنىنە بىرنەشە جىل ءوتتى. 2000 جىلداردىڭ باسىندا تۇركيادا كينوستۋديالار جابىلىپ ءجۇرىپ جىلىنا بار-جوعى ونشاقتى كينو تۇسىرەدى ەكەن. كەيىننەن مەملەكەت قولداۋ كورسەتە باستاعان سوڭ 12 ايدا تۇسىرىلەتىن تەلەونىمنىڭ سانى 100-دەن اسقان. بارلىعى ساپالى دەمەيمىز, دەگەنمەن, تابىس اكەلىپ جاتقانى, كينويندۋستريانى دامىتۋعا ۇلەس قوسىپ جاتقانى انىق. كەز كەلگەن تاقىرىپتى سەريالعا اينالدىرا سالاتىن تۇرىك كينو ماماندارىنىڭ ەڭبەگى ارقاسىندا كينو تۋىندىلار ەلگە كەلەتىن تۋريستەر سانىن 16-18 پايىزعا ارتتىرعان.   تۇركيانىڭ مادەنيەت جانە تۋريزم مينيسترلىگى 2009-2012 جىلدار ارالىعىندا  الەمنىڭ 76 ەلىنە 40 مىڭ 675 ساعات سەريال ساتقانى تۋرالى مالىمەت جاريا ەتتى. الۋشىلار بالقان تۇبەگى جانە ازيا, ونىڭ ىشىندە ورتالىق ازيا ەلدەرى. ەڭ كوپ تابىس اكەلگەن سەريالداردىڭ قاتارىندا قازاقستانعا جاقسى تانىس «اساۋ جۇرەك», «كوكجالدار مەكەنى» بار. شامامەن 2010 جىلداردان باستاپ تۇرىك كينوگەرلەرى ەۋروپا مەن امەريكا ەلدەرىنىڭ نارىعىنا نازار اۋداردى. بىرتىندەپ كورشىلەس گرەكيا, رەسەي جانە ءتىپتى بىرىككەن اراب امىرلىكتەرىنەن ميلليونداعان كورەرمەن تارتتى. بۇل قىزىعۋشىلىق اتالعان ەلدەردە «مەرھابا», «ناسىلسىن», «تامام» «تەشەككۇرلەر» سوزدەرىن جاتتاۋدان باستاپ تۇرىك ءتىلىن ۇيرەنگىسى كەلەتىندەر سانىن كوبەيتۋگە سەپ بولعان. گرەكيادا, بالقان ەلدەرىندە ونشاقتى تۇرىك ءتىلى كۋرستارى اشىلعان. رەسەيدىڭ «دوماشني تۆ» كابەلدىك تەلەارناسى تۇرىك سەريالدارىنا ورىن بەرگەن. بۇل ەلدە كورەرمەنگە قاتتى ۇناعانى سونشالىق, «سۇلتان سۇلەيمەن» سەريالىن اپتاسىنا 11 ساعات بويى ەفيرگە قويىلعان. دۋبايدا شىعاتىن «Gulf news» باسىلىمى سوڭعى جيىرما جىلدا ءباا-ىنە تۇركيانىڭ 60 ملن دوللارعا 100-دەن اسا سەريال ساتقانىن جازىپتى. تۇركيانى افريكا ەلدەرىنە دە جاقىنداتا تۇسكەن وسى تەلەتاۋار دەسەك, قاتەلەسپەيمىز: افريكانىڭ سولتۇستىگى مەن وڭتۇستىگىندەگى ەلدەردە 85 ملن كورەرمەنى بار ەكەن. ياعني, ساپاسى مىقتى بولسىن, ناشار بولسىن, تۇرىك سەريالدارى ول ەلگە ايتارلىقتاي پايدا اكەلۋدە. 2008 جىلى سەريالداردان تۇسەتىن تابىسى 2 ملن دوللاردان اسپاعان ەكەن. 3-4 جىل ىشىندە كىرىس كولەمى 70 پايىزعا ارتقان. اسا قىسقا ۋاقىتتىڭ ىشىندە تەز دامىعان سالانىڭ ءبىرى. تاعى ءبىر ماسەلە. سوڭعى مالىمەتتەر بويىنشا, تۇرىك سەريالدارىنىڭ الەمدە 400 ميلليونعا تارتا كورەرمەنى بار ەكەن. ول ەلدەردەن باراتىن دەمالۋشىلاردىڭ كوبى ىستامبۇلعا تابانى تيە سالىپ سۇلتان سۇلەيمەننىڭ سارايى مەن حيۋرەمنىڭ گارەمىن كورۋگە اسىعادى. ول جەرلەرگە كىرۋ اقىلى ارينە. «Deloitte Türkiye» زەرتتەۋ ورتالىعى جاريالاعان مىنا اقپاراتقا قاراڭىز.  تۇركيادا سەريالداردان تۇسكەن قاراجات 2013 جىلى 200 ميلليون دوللارعا  جەتسە, 2015 جىلى 350 ملن بولعان. تۇرىك كينوگەرلەرى 2023 جىلعا قاراي سەريال ەكسپورتتاۋدان تۇسەتىن پايدانى 1 ملرد دوللارعا جەتكىزەمىز دەگەن مەجە قويىپ وتىر. جىل وتكەن سايىن قانداي قارقىنمەن دامىپ كەلە جاتقانىن كورسەتەتىن دەرەكتەرگە قاراساق, بۇل ابدەن مۇمكىن نارسە. قازاق ورداسىنىڭ تاريحىنان كوپتەپ سەريالدار ءتۇسىرۋ ارقىلى كوشپەندىلەردىڭ تاريحى مەن مادەنيەتىن, سالت-داستۇرىنە دەگەن قىزىعۋشىلىقتى ارتتىرۋعا, سول ارقىلى قازاقستانعا كەلەتىن تۋريستەر سانىن كوبەيتۋگە بولادى. نەگە وسى سالانى دامىتپاسقا؟ ال دامىتامىز دەسەك, تۇرىك اعايىننىڭ تاجىريبەسى جاقسى ۇلگى بولار ەدى. سامات سۇلەي