كەن ورىندارىنا كەرەك قۇبىر اقتاۋدا شىعارىلادى

اقتاۋداعى «اقتاۋ تەڭىز پورتى» ارنايى ەكونوميكالىق ايماعىنان جاڭا زاۋىت ىسكە قوسىلدى. ەلىمىزدە جاڭا ساناتتى جانە جوعارى ساپالى ءونىم وندىرەتىن زاۋىت ءوڭىردىڭ الەۋمەتتىك-ەكونوميكالىق دامۋىنا زور ۇلەسىن قوسادى دەپ كۇتىلەدى. يتاليالىق «تەناريس گلوبال سەرۆيسەز» كومپا­نياسى 12 ملرد تەڭگە ينۆەستيتسيا سالعان پرەميۋم سانات­تى بولات قۇبىرلاردى كەسكىندەيتىن زاۋىت قۇرى­لىسى از مەرزىمدە اياقتالدى. قازاقستان بويىن­شا العاش رەت اتالمىش ءونىمدى ءوندىرۋدى قولعا العان زاۋىت «قاراشىعاناق پەترولەۋم وپەرەيتينگ ب.ۆ.» جانە «تەڭىزشەۆرويل» مۇناي كومپانيالارىمەن ۇزاق مەرزىمدى كەلىسىمشارتقا وتىرعان. كومپانيا بۇل كەن ورىندارىن مۇناي جانە گاز ونىمدەرىن تاسىمالداۋ ءۇشىن تولىقتاي ءوز ونىمدەرىمەن قامتاماسىز ەتۋدى, سونداي-اق, قازاقستانداعى وزگە دە ءىرى كەن ورىندارىنداعى مۇناي-گاز جوبالارىنا كوممەرتسيالىق, تەحنيكالىق, ينجەنەرلىك جانە لوگيستيكالىق قولداۋ كورسەتۋدى مەجەلەپ وتىر. بۇل كاسىپ تۇرىنە ماشىقتانعان, تاجىريبەسى جەتكىلىكتى يتاليالىق كومپانيا قارجى قۇيعان زاۋىتتان وندىرىلگەن ءونىم, «تەناريس گلوبال سەرۆيسەز» كومپانياسى باسقارما توراعاسى پاولو روككونىڭ ايتۋىنشا, جوعارى فۋنكتسيالى جانە بۇرعىلاۋ كەزىندە كەزدەسەتىن ەڭ اۋىر جاعدايلارعا توتەپ بەرەدى, ياعني جاعدايعا ساي قىزمەت ەتەدى ەكەن. ازىرگە ەلىمىز بويىنشا گازدى-گەرمەتيكالىق بۇراندالى-بولشەكتى قۇبىرلاردى كەسكىندەيتىن جالعىز زاۋىت سانالاتىن زاۋىتتىڭ جىلدىق قۋاتى – 45 مىڭ توننا. كۇشىنە ەنگەن سوڭ 90 ادامدى جۇمىس ورنىمەن قامتيتىن زاۋىتتا قازىرگى تاڭدا 40 ادام جۇمىس ىستەۋدە. ماماندار الدىن الا رۋمىنيادا وقىپ, ءىس-تاجىريبە جيناقتاپ قايتتى. زاۋىت ءوز ونىمدەرىمەن 80 پايىز ىشكى نارىقتى قامتاماسىز ەتىپ, 20 پايىز ءونىمدى سىرتقى نارىققا – رەسەي جانە ەۋروپا ەلدەرىنە ەكسپورتتاۋدى كوزدەيدى. ماڭعىستاۋ وبلىسى اكىمىنىڭ ورىنباسارى ر.ءامىرجانوۆتىڭ ايتۋىنشا, جىل سوڭىنا دەيىن «اقتاۋ تەڭىز پورتى» ارنايى ەكونوميكالىق ايماعى» اۋماعىنان تاعى ءبىر نىسان ىسكە قوسىلماق. ماڭعىستاۋدىڭ گەوگرافيالىق ورنالاسۋى مەن مۇناي كەن ورىندارىنىڭ شوعىرلانۋى جاڭا زاۋىتتاردىڭ ىرگەتاسى مۇنايلى وڭىردە قالانۋىنا سەپتىگىن تيگىزەدى ەكەن. ەلىمىزدىڭ ەنەرگەتيكا ءمينيسترىنىڭ ورىن­باسارى م.مىرزاعاليەۆ, قازاقستاندىق جانە شەتەلدىك مۇناي كومپانيالارىنىڭ وكىلدەرى قاتىسقان زاۋىتتىڭ اشىلۋ سالتاناتىندا بۇل ءىستى ەل ەكونوميكاسىن دامىتۋعا ۇلەس قوسادى دەپ باعالاپ, زاۋىت جۇمىسىنا ساتتىلىك تىلەدى. گۇلايىم شىنتەمىرقىزى, «ەگەمەن قازاقستان» ماڭعىستاۋ وبلىسى