مويىنقۇمدا نەسيە العان 25-ءتىڭ ەشقايسىسى جۇمىس ورنىن اشپاعان

اۋدان اكىمىنە جۇكتەلگەن مىندەت كوپ. بىراق, باستى مىندەتى – حالىققا قىزمەت ەتۋ, ەلدىڭ جاعدايىن جاساۋ ەكەنىن ۇمىتپاۋى قاجەت. جۇرتتىڭ جاعدايىن جاساۋ دەگەندە, ەڭ الدىمەن, جۇمىسپەن قامتۋ ماسەلەسى ەسكە تۇسەدى. ياعني, اكىمنىڭ نەگىزگى شارۋاسى وسى جۇمىسسىزدىقتى ازايتۋمەن استاسىپ جاتۋى ءتيىس. «اۋداندا قانشا جۇمىسسىز ادام بار, بيىل قانشا جۇمىس ورنى اشىلادى؟» دەگەن مالىمەتتەر كوبەيتۋ كەستەسى سياقتى ساناسىندا جاتتالىپ تۇرۋى كەرەك ەمەس پە؟ جوق, اۋليەاتا ءوڭىرى اكىمدەرىنەن  ونداي «ابجىلدىك» كۇتۋ ابەستىك ەكەن... قايبىر كۇنگى جيىندا جامبىل وبلىسىنىڭ اكىمى كارىم كوكىرەكباەۆ اۋدان باسشىلارىنان جۇمىسپەن قامتۋ تۋرالى مالىمەتتەردى سۇراعاندا ويپىرماي, دۇرىس جاۋاپ بەرگەن بىرەۋى بولمادى. بىرىنشىدەن, بىلمەيدى, ەكىنشىدەن, بىلگەنىنىڭ ءوزى تسيفرلاردى شاتاستىرىپ, ويران-بوتقاسىن شىعاردى. جالپى العاندا, «جۇمىسپەن قامتۋدىڭ جول كارتاسى-2020» باعدارلاماسى اياسىندا جامبىل وبلىسىندا كوپتەگەن وڭ  تىرلىكتەر اتقارىلۋدا. ماسەلەن, وسى باعدارلامانىڭ ەكىنشى باعىتى اياسىندا بيىل 831 ادامدى جۇمىسپەن قامتۋ ءۇشىن بارلىعى 3239,4 ملن تەڭگە قاراستىرىلعان. 372 ادام ارنايى وقۋدان ءوتىپ, 414 ادامعا 1119,5 ملن تەڭگەنىڭ شاعىن نەسيەسى بەرىلگەن. وسى نەسيە العاندار 280 جۇمىس ورىندارىن اشقان. ايتسە دە  مويىنقۇمدا نەسيە العان 25 ادامنىڭ بىردە-ءبىرى ەشقانداي جۇمىس ورىندارىن اشپاپتى. سول سياقتى مەركى اۋدانىندا 53 نەسيە الۋشى تەك 7 جۇمىس ورنىن عانا, تالاستاعى 29 ادام 9 جۇمىس ورنىن, جۋالىداعى 40 ادام 22 جۇمىس ورنىن, شۋدا نەسيە العان 37 ادام 22 جۇمىس ورنىن عانا اشقان. ياعني, «ءبىر نەسيە الۋشى كەمىندە ءبىر قوسىمشا جۇمىس ورنىن اشۋى ءتيىس» دەگەن تالاپ تولىق ورىندالمادى. اۋدان اكىمدەرى بۇل باعىتتاعى جۇمىستاردى قاتاڭ باقىلاۋعا الىپ, ەڭ الدىمەن نەسيە الۋشىلاردىڭ سالىق ورگاندارىندا تىركەلۋىن جانە ءاربىر نەسيە الۋشىدا كەمىندە قوسىمشا ءبىر جۇمىس ورنىنىڭ اشىلۋىن قامتاماسىز ەتۋلەرى قاجەت ەدى. بىراق بۇل ماسەلەنى قادا­عا­لاماق تۇگىلى قانشا جۇمىسسىز ادام ءتىر­كەلگەنىن جاتتاي الماي جۇرگەن جامبىلدىق اكىمدەر تىم جايباراقات. سول سياقتى باعدارلامانىڭ  ءۇشىنشى  باعىتى بويىن­شا  كاسىپتىك  وقىتۋمەن 271 ادام قامتىلىپ, 270-ءى جۇمىسقا ورنالاستى. جۇمىسقا ورنا­لاسقانداردىڭ ىشىنەن 228-ءىنىڭ نەمەسە 84,4 پايىزىنىڭ مىندەتتى زەينەتاقى جارنالارى اۋدارىلعان. الايدا, بۇل كورسەتكىش مويىنقۇم اۋدانىندا نەبارى 12,5, شۋ اۋدانىندا 20,8 پايىزدى عانا قۇراپ وتىر. جالپى العاندا, جۇمىس ىستەپ جۇرگەندەردىڭ زەينەتاقى جارنالارىن اۋدارۋ ءبىر اقىرەت پە دەپ قالدىم. مىنە, قاراڭىز, جاستار پراكتيكاسىنا جولدانعان 44 تۇلەكتىڭ, ال الەۋمەتتىك جۇمىس ورىندارىنا جولدانعان 23 ادامنىڭ 10 پايىزدىق زەينەتاقى جارنالارى اۋدارىلماعان. – وبلىستا ىسكە اسىرىلىپ جاتقان يندۋستريالىق-يننوۆاتسيالىق دامۋ مەملەكەتتىك باعدارلاماسى بويىنشا اشىلعان جۇمىس ورىندارىنا جوسپار بويىنشا 195 ادام ورنالاسۋى كەرەك بولسا, بۇگىنگى كۇنى 85  ادام, اگروبيزنەس سالاسى بويىنشا جوسپارلانعان 344-ءتىڭ ورنىنا 151 ادام عانا جۇمىسقا ورنالاسقان, – دەيدى جامبىل وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى جورابەك باۋبەكوۆ. «قازاقستاندا جۇمىسسىزدىق دەگەن بولماۋى كەرەك. بۇل ءۇشىن بارلىق مۇمكىن­دىكتەر بار», دەگەن بولاتىن ەلباسى ن.نازارباەۆ. شىنىندا مۇمكىندىك مول. تەك ىقىلاس جوق. ال قالاي ايتساق تا بۇل وبلىستاعى جاعداي تومەن. ورالحان ءداۋىت, «ەگەمەن قازاقستان» جامبىل وبلىسى