دۋالدى وقىتۋ جۇيەسى پاۆلوداردا جاقسى ناتيجە بەرۋدە

وبلىستىق ءبىلىم باسقارماسىنىڭ حابارىنشا, بۇل كۇندەرى وڭىردەگى كوللەدج تۇلەكتەرىنىڭ 72 پايىزى جۇمىسقا ورنالاسۋدا. ويتكەنى, ءوندىرىستى وڭىردە ءسوز جوق, ۇلكەندى-كىشىلى كاسىپورىندار كوپ. ەكىنشىدەن, دۋالدى وقىتۋ جۇيەسىنىڭ تيىمدىلىگى بايقالۋدا. سول سياقتى, «قازاقستان اليۋميني» زاۋىتىنا قاراستى №7 ليتسەيدە دە دۋالدى وقىتۋ جۇيەسى جاقسى جولعا قويىلعان. ەكىباستۇزداعى, اقسۋداعى كاسىپورىندار قازىر وسى جاڭاشىل جۇيەنىڭ ناتيجەلەرىن كورۋدە. جالپى, كاسىبي-تەحنيكالىق مامانداردى دايىنداۋعا مەملەكەت تاراپىنان قارجى ءبولى­نەتىنى بەلگىلى. بولىنگەن قاراجاتتى جەر­گىلىكتى بيلىكتەگىلەر دۇرىس يگەرىپ, تالاپتى جاستاردى وقىتىپ, دۋالدى ءبىلىم جۇيەسىنىڭ پايداسىن كورسەك دەيدى. مەملەكەت باسشىسىنىڭ تاپسىرماسىن ورىنداۋ اياسىندا ەلىمىزدە «نۇرلى جول» جانە يندۋستريالىق-يننوۆاتسيالىق دامۋ باعدارلامالارىن جۇزەگە اسىرۋ ءۇشىن 35 مىڭعا دەيىن جاس ماماندى, ونىڭ ىشىندە, 18 مىڭ كاسىپتىك-تەحنيكالىق ءبىلىمى بار ماماندى تارتۋ جوسپارلانعان. ەلباسى ۇكىمەتكە 2013 جىلدان باستاپ حالىقارالىق ۇلگىدەگى كۋالىكتەر بەرۋ ارقىلى ينجەنەرلىك ءبىلىم بەرۋدى جانە زاماناۋي تەحنيكالىق ماماندىقتار جۇيەسىن دامىتۋدى قامتاماسىز ەتۋدى تاپسىردى. سونىمەن بىرگە, «كاسىبي-تەحنيكالىق جانە جوعارى ءبىلىم ەڭ ءبىرىنشى كەزەكتە ۇلتتىق ەكونوميكانىڭ مامان­دارعا دەگەن قازىرگى جانە كەلەشەكتەگى سۇرا­نىسىن بارىنشا وتەۋگە باعدار ۇستاۋى كەرەك. كوپ جاعىنان, بۇل حالىقتى ەڭبەكپەن قامتۋ ماسەلەسىن شەشىپ بەرەدى...» دەگەن بولاتىن. بيىل, مىسالى, 2014-2016 جىلدارى پاۆلو­دار مۇناي-حيميا زاۋىتىندا دۋالدى وقىتۋ باعدارلاماسى بويىنشا وندىرىستىك ءتاجىري­بەدەن وتكەن وبلىس ورتالىعىنداعى حيميا-مەحاني­كالىق كوللەدجىنىڭ 35 ستۋدەنتى­نىڭ 25-ءى كاسىپورىندارعا جۇمىسقا ورنالاستىرىلادى. زاۋىتتىڭ اقپاراتتىق-بايلانىس ءبولىمىنىڭ حابارىنشا, كاسىپورىندا 2012 جىلى باستاۋ العان دۋالدى وقىتۋ جوباسى جاڭا جۇيە بويىن­شا جولعا ءتۇستى. ناتيجەسىندە 60-قا جۋىق تۇلەك زاۋىتقا جۇمىسقا ورنالاسقان. ەكى جىلعا جۋىق ۋاقىت وندىرىستىك تاجىريبەدەن وتكەن كوللەدج ستۋدەنتتەرى كاسىپورىندا «مۇناي مەن گازدى وڭدەۋ تەحنولوگياسى» (18 ادام) جانە «مۇناي وڭدەۋ سالاسىنىڭ قۇرال-جابدىعىنا تەحنيكالىق قىزمەت كورسەتۋ جانە ونى جوندەۋ» (17 ادام) ماماندىقتارى بويىنشا ءبىلىم الادى. زاۋىتتىڭ باعالاۋ جانە دامىتۋ سەكتورى­نىڭ باستىعى ليۋدميلا پاكتىڭ ايتۋىنشا, ستۋدەنتتەر زاۋىتتا اپتاسىنا ءۇش كۇن تاجىريبە جيناقتايدى. ولاردىڭ ارقايسىسى كاسىپورىندا 1800 ساعاتتان ارتىق ۋاقىت وتكىزدى. ستۋدەنتتەرگە 36 جوعارى بىلىكتى ماماندار بەكىتىلگەن. بيىل دا كوميسسيا مۇشەلەرى اڭگىمەلەسۋ بارىسىندا جانە ديپلوم جۇمىستارىن قورعاعان كەزدە جاقسى ناتيجە كورسەتكەن 25 تۇلەكتى زاۋىتقا جۇمىسقا ورنالاستىرۋ تۋرالى شەشىم قابىلداپتى. ال جالپى ءبىز اڭگىمەلەپ وتىرعان وبلىس ورتالىعىنداعى حيميا-مەحانيكالىق كوللەدج تۇلەكتەرىنىڭ بۇدان ءارى قاراي وقۋلارىن جال­عاس­تىرۋ ءۇشىن «پاۆلودار مۇناي-حيميا زاۋىتى» جشس, ۋفا مەملەكەتتىك مۇناي تەحني­كالىق ۋنيۆەرسيتەتى, ي.گۋبكين اتىن­داعى رەسەي مەملەكەتتىك مۇناي جانە گاز ۋني­­ۆەر­سيتەتىندە باكالاۆريات باعدارلاماسى نەگى­­زىندە ماماندىقتارعا جىل سايىن گرانت ءبولىپ كەلەدى. بۇل كۇندەرى كوللەدج تۇلەكتەرى «مۇناي-حيميالىق زاۋىتى» جشس, «قازاقستان ءاليۋمينيى» اق, «كاستينگ» پف» جشس, «كاۋستيك» اق, «قازاقستان ەلەكتروليز زاۋىتى» اق, «نەفتەحيم LTD» جشس سياقتى جەتەكشى كاسىپورىنداردا ەڭبەك ەتۋدە. كوللەدج ديرەكتورى گۇلنار امانجولوۆانىڭ ايتۋىنشا, كوللەدجدە 700-دەي وقۋشى ءبىلىم الادى. وقۋشىلارعا «مۇناي, گاز وڭدەۋ جانە حيميا ونەركاسىبىنىڭ جابدىقتارىنا تەحنيكالىق قىزمەت كورسەتۋ جانە جوندەۋ», «بەيورگانيكالىق زاتتاردىڭ حيميالىق تەحنولوگياسى», «حيميالىق قوسىلىستاردىڭ ساپاسىن ساراپتامالىق تالداۋ», «مۇناي جانە گازدى قايتا وڭدەۋ تەحنولوگياسى», «اۆتوكولىكتەرگە تەحنيكالىق قىزمەت كورسەتۋ, جوندەۋ جانە پايدالانۋ», «اۆتوماتتاندىرۋ جانە باسقارۋ» ماماندىقتارى بويىن­شا گ.كونيۋحوۆا, ت.رۋدولف, س.گورباچەۆا, ن.قۇسايىنوۆا, ل.رۋسينوۆيچ, ي.ناۋمەنكو, ب.قۇرماناليەۆ, ۆ.شيكوۆ, ا.نازارەنكو, ە.سۆەتليچنايا سياقتى تاجىريبەلى, بىلىكتى مامان­­دار ساباق بەرەدى. ال تەحنوپاركتى قۇ­رال-جاب­دىق­تار­مەن قامتاماسىز ەتۋ ءۇشىن زاۋىت 2 ميل­ليون 311 مىڭ تەڭگە قاراجات ءبولىپتى. قۇرال­دار كوللەدجگە جالعا بەرىلدى. كاسىپورىن حي­ميا­لىق زەرتحانا مەن شەبەرحاناعا اكەلىنگەن بۇل قۇرىلعىلار مەن قۇرالداردى ورناتىپ, قۇرىپ بەردى. دۋالدى وقىتۋ جۇيەسى دەگەنىمىز – وقۋشىنى وقۋ ورنى مەن وندىرىستە قاتار باۋلۋ. ياعني, بولاشاق مامان وندىرىستە ءوز ءبىلىمىن ءىس-تاجىريبە ۇستىندە سىناپ كورە الادى. جالپى, دۋالدى وقىتۋ ءادىسى الەمدىك تاجىريبەدە بار. بۇل ءادىس گەرمانيا, اۆستريا, دانيا, نيدەرلاند, شۆەتسيا, انگليا, وڭتۇستىك كورەيا سياقتى دامىعان مەملەكەتتەردە جاقسى جۇزەگە اسۋدا. مىسالى, گەرمانيا­دا كاسىپتىك مەكتەپ وقۋشىسى ءبىر اپتانىڭ 3,5 كۇنىندە وندىرىستە, ال قالعان 1,5 كۇنىندە وقۋ ورىن­دارىندا تەوريالىق ءبىلىم الاتىن كورىنەدى. دۋالدى وقىتۋ – ۋاقىت تالابى. تەحنيكالىق جانە كاسىپتىك ءبىلىم بەرۋدى جاڭعىرتۋدىڭ باستى ماقساتى – قوعامنىڭ جانە ەكونومي­كا­نىڭ يندۋستريالىق-يننوۆاتسيالىق دامۋ سۇرانىستارىنا سايكەس دۋالدى جۇيەنى جاڭعىر­تا وتىرىپ, الەمدىك ءبىلىم بەرۋ كەڭىستىگىنە ەنۋ. ايتالىق, حيميا-مەحانيكالىق كوللەدجدە «وندىرىستىك وقىتۋ جاعدايىندا وقۋشىلاردىڭ عىلىمي-تەحنيكالىق شىعارماشىلىعىن دامىتۋ» تاقىرىبىندا كوشپەلى تاجىريبەلىك ساباقتار وتەدى. كۋرس تىڭداۋشىلارى كوللەدجدىڭ ماتەريالدىق-تەحنيكالىق بازاسىمەن تانىسۋعا مۇمكىندىك الادى. دۋالدى وقىتۋعا الەۋمەتتىك سەرىكتەستىكتى تارتۋ, نارىقتىق سۇرانىستارعا سايكەس جاڭا ماماندىقتاردى اشۋ مەن يگەرۋ, مەملەكەتتىك گرانتتاردى ۇتىپ الۋدىڭ وزەكتى ماسەلەلەرى بويىنشا ءوزارا پىكىر الماسقان تاجىريبەلىك ساباقتىڭ قورىتىندىسى بويىنشا بىرقاتار ۇسىنىستار جاسالعانىن ايتۋعا بولادى. ال ءبىز جازىپ وتىرعان كوللەدج ستۋدەنتتەرى «مۇناي, گاز وڭدەۋ جانە حيميا ونەركاسىبىنىڭ جابدىقتارىنا تەحنيكالىق قىزمەت كورسەتۋ جانە جوندەۋ», «مۇناي جانە گازدى قايتا وڭدەۋ تەحنولوگياسى» ماماندىقتارى بويىنشا ءبىلىم الۋدا. ساباقتار ەكى تىلدە جۇرگىزىلەدى. وندىرىستەگى وقۋ-تاجىريبەلەرىن بىتىرگەن سوڭ تۇلەكتەر وڭىردەگى وندىرىستىك كاسىپورىندارعا بىردەن جۇمىسقا ورنالاسادى. كوللەدج ديرەكتورى گۇلنار امانجولوۆانىڭ ايتۋىنشا, رەسەيدىڭ ومبى, توم, ءنوۆوسىبىر تەحني­كالىق ءبىلىم بەرەتىن جوعارى وقۋ ورىن­دارىمەن بايلانىستارى جالعاسۋدا. كوللەدج تۇلەكتەرى سول جاقتاردا ءبىلىم الۋدا. دۋالدى جۇيە جاستار ءۇشىن ءتيىمدى. كاسىبي ءبىلىم الۋعا مول مۇمكىندىك. فاريدا بىقاي, «ەگەمەن قازاقستان» پاۆلودار