گرۋزين بالۋاندارى بەت قاراتپادى

سوڭعى جىلدارى الەمنىڭ ءار تۇكپىرىندە قازاق كۇرەسىمەن كاسىبي تۇردە  شۇعىلداناتىن سپورتشىلاردىڭ قاراسى ارتىپ كەلەدى. ونىڭ ايقىن دالەلى رەتىندە, «ەۋرازيا بارىسى», «الەم بارىسى» سىندى قازاق كۇرەسىنەن وتەتىن جارىستارعا قاتىسۋشىلاردىڭ سانىنىڭ كۇن وتكەن سايىن ارتىپ كەلە جاتقاندىعى دەر ەدىك. مۇنىڭ سىرتىندا ايماقتاردا دا حالىقارالىق دەڭگەيدەگى جارىستار وتەتىن بولعان. سونداي سايىستىڭ ءبىرى قىزىلوردا وبلىسى, جاڭاقورعان اۋدانىنىڭ ماشبەك اۋىلىندا ءوتتى. ەڭبەك ارداگەرى ماشبەك نالىباەۆتى ەسكە الۋعا ارنالعان جارىس ءداستۇرلى جارىس بيىل 11-ءشى رەت جالاۋىن كوتەردى. وعان قازاقستان, گرۋزيا, موڭعوليا, قىرعىزستان جانە وزبەكستاننان بارلىعى 28 بالۋان قاتىستى. سايىستىڭ اشىلۋ سالتاناتىنا قىزىلوردا وبلىسىنىڭ اكىمى قىرىمبەك كوشەرباەۆ پەن وڭىرارالىق ارىپتەستىك اياسىندا دەلەگاتسيانى باستاپ كەلگەن اق­توبە وبلىسىنىڭ اكىمى بەردىبەك ساپارباەۆ قاتىسىپ, سپورتشىلاردى ءداستۇرلى دودامەن قۇتتىقتادى. – قازاق كۇرەسىنەن رەسپۋب­ليكالىق چەمپيونات ون ءبىرىن­شى رەت جانە تۇيە بالۋاندار اراسىنداعى حالىقارالىق تۋر­نير ەكىنشى مارتە ءوتىپ جاتىر. «قازاقستان بارىسىنىڭ» العاشقى جەڭىمپازى شىققان ايماق ءۇشىن وسى باسەكە بولاشاقتا دا بيىك ماق­ساتتى باعىندىرۋ باسپالداعى بولماق. بۇگىندە ەلباسىنىڭ ەرەكشە قولداۋىنىڭ ارقاسىندا ەلىمىزدە سپورتتىق ينفراقۇرىلىم قارقىندى دامىپ, دەنەشىنىقتىرۋمەن شۇ­عىلدانۋشىلار قاتارى ءوستى. بي­ىل ەل تاۋەلسىزدىگىنىڭ 25 جىل­دى­­عى قارساڭىندا تۋرنير وتكى­زە­مىز. تاۋەلسىز مەملەكەتىمىزگە بەي­­بىتشىلىك, قازاقستاندىق سپورتشىلارعا جەڭىس تىلەيمىن, – دەدى قىرىمبەك كوشەرباەۆ. ال بەردىبەك ساپارباەۆ سپورتشىلار مەن جانكۇيەرلەرگە جارىستىڭ كورىگىن قىزدىرىپ, بەلسەنە ات سا­لىسقاندارى ءۇشىن العىس ايتتى. سونىمەن, حالىقارالىق تۋرنير دە مارەسىنە جەتتى. باس جۇلدەنى  گرۋزيادان كەلگەن بالۋان لەۆان  ماتياشۆيلي يەلەنىپ, «لادا گرانتا» اۆتوكولىگىن جەڭىپ الدى. ەكىن­شى ورىن جانە 500 مىڭ تەڭگە اقشالاي سىيلىق قازاقستاندىق ايبەك نۇعىماروۆتىڭ ەنشىسىنە بۇيىردى. ءۇشىنشى ورىنعا تاعى ءبىر گۇرجىستاندىق گۋرام تۋشيۆيلي تۇراقتادى. وعان 300 مىڭ تەڭگە اقشالاي سىيلىق بەرىلدى. بۇدان بولەك, «جان اراي» جشس ديرەكتورى باقداۋلەت ماقاشەۆ ءوز اتىنان تۋشيۆيليگە 1000 اقش دوللارىن تابىستادى. ءتۋرنيردىڭ قورىتىندىسى بويىنشا وزگە دە سپورتشىلار ديپلوممەن جانە العىس حاتتارمەن ماراپاتتالىپ, باعالى سىيلىقتار تابىس ەتىلدى. ەرجان بايتىلەس, «ەگەمەن قازاقستان» قىزىلوردا وبلىسى, جاڭاقورعان اۋدانى