«قازىعۇرتتىڭ» قارسىلاسى – «پاري سەن-جەرمەن»

كەشە ۋەفا-نىڭ ايەلدەر كوماندالارى اراسىنداعى چەمپيوندار ليگاسى 1/8 فينالدىق راۋندىنىڭ جەرەبەسى تارتىلدى. ناتيجەسىندە قازاقستان كلۋبتارى اراسىنان جارىستىڭ وسى كەزەڭىنە شىققان ءبىرىنشى ۇجىم اتانعان شىمكەنتتىڭ «بيك-قازىعۇرتى» ءپاريجدىڭ «پاري سەن-جەرمەنىمەن» كۇش سىناساتىن بولدى. ءبىزدىڭ قىزدار ءبىرىنشى كەزدە­سۋىن قارسىلاستار الاڭىندا 9 قاراشا كۇنى وتكىزەدى. ال قارىمتا ويىنى 17 قاراشادا شىمكەنتتە وينالادى. وسى رەتتە بۇعان دەيىنگى توپتىق ويىن­داردا يسپانيانىڭ «بار­سەلوناسى» مەن گەر­مانيانىڭ «فرانكفۋرتىن» ۇتىپ, 1/16 فينالدا يتاليانىڭ «ۆە­روناسىن» جارىس جولىنان شىعارىپ تاستاعان جەر­لەس­تەرىمىزدىڭ كىم-كىمگە دە وڭاي شاعىلاتىن جاڭعاق بولا قوي­ماسىن ايتا كەتۋىمىز كەرەك. ونىڭ ۇستىنە, كوماندانىڭ سوڭعى ماتچتى ءوز الاڭىندا وتكىزەتىنى ءبىراز ءۇمىتتىڭ قولامتاسىن ۇرلەپ بەرگەندەي بولىپ وتىر. ءتۋرنيردىڭ بۇل كەزەڭىندە سونداي-اق, چەمپيوندار ليگا­سىنىڭ قازىرگى چەمپيونى «ليون» (فرانتسيا) الدىمەن ءوز ۇيىندە شۆەيتساريانىڭ «تسيۋريحىمەن» كەزدەسەدى. ال گەرمانيانىڭ «با­ۆارياسى» رەسەيدىڭ «روسسيان­كاسىن», شۆەتسيانىڭ «ەسكيل­س­تۋنا يۋنايتەدى» نەمىستىڭ «ۆولفسبۋرگىن» ءوز الاڭدارىندا قابىلدايدى. بۇلاردىڭ ءبارى العاشقى ماتچتارىن 9 قاراشادا وتكىزىپ, پلەي-وفف ويىندارىن 17 قاراشادا اياقتايدى. سول سياقتى 10 قاراشادا «بار­­سەلونا» (يسپانيا) – «تۆەن­تە» (نيدەرلاند), «مانچەستەر سي­تي» (انگليا) – «بروندبيۋ» (دا­نيا), «سلاۆيا» پراگا (چەحيا) – «رۋسەنگورد» (شۆەتسيا), «برە­شيا» (يتاليا) – «فورتۋنا» يوررينگ (دانيا) كوماندالارى ءوزارا ۇشىراسادى. بۇلاردىڭ قارىمتا ويىندارى 16 قاراشا كۇنى وينالادى.   رۋسلان يگىلىك