اقتاۋ گارنيزونىنىڭ 100 ساربازىنا قىزمەتتىك پاتەر بەرىلدى

  قر قورعانىس ءمينيسترى اقتاۋ گارنيزونىنا جۇمىس ساپارىمەن باردى,- دەپ حابارلايدى قر قورعانىس مينيسترلىگىنىڭ ءباسپاسوز قىزمەتى. سونداي-اق, ساكەن جاسۇزاقوۆ اقتاۋ گارنيزونىنىڭ 100 اسكەري قىزمەتشىسىنە جاڭا قىزمەتتىك پاتەردىڭ كىلتىن تابىستادى. 2016 جىلعى 13 قازاندا قر قورعانىس ءمينيسترى «باتىس» وڭىرلىك قولباسشىلىعى اقتاۋ گارنيزونىنىڭ بولىمدەرىنە جۇمىس ساپارىمەن باردى.  باتىس وڭىرىنە جۇمىس ساپارى بارىسىندا مينيستر اعىمداعى جاعداي مەن 2016 وقۋ جىلى بويىنشا قورىتىندى تەكسەرىستىڭ وتكىزىلۋ بارىسى تۋرالى قۇرلىق اسكەرلەرىنىڭ باس قولباسشىسى مەن «باتىس» وڭىرلىك قولباسشىلىعى اسكەرلەرى قولباسشىسىنىڭ بايانداماسىن تىڭدادى. اقتاۋدا قورعانىس ۆەدومستۆوسىنىڭ باسشىسى ينفراقۇرىلىم نىساندارىنىڭ, قر قارۋلى كۇشتەرى اسكەري-تەڭىز كۇشتەرىنىڭ كورابلدەرى مەن كەمەلەرىنىڭ ورنالاسۋىنا ارنالعان سالىنىپ جاتقان ءپيرستىڭ قۇرىلىس بارىسىن تەكسەردى. اقتاۋ گارنيزونىنىڭ 100 اسكەري قىزمەتشىسى جاڭا قىزمەتتىك پاتەردىڭ كىلتىنە يە بولدى.  «باسپانامەن قامتاماسىز ەتۋ قارۋلى كۇشتەردىڭ جوعارعى باس قولباسشىسى تاراپىنان بىزگە, ياعني, وتان قورعاۋشىلارعا دەگەن قامقورلىعىنىڭ جارقىن كورىنىسى بولىپ تابىلادى.  بۇگىنگى كۇن باسپانا, اسكەري گارنيزونداردىڭ الەۋمەتتىك ينفراقۇرىلىمى وبەكتىلەرىنىڭ سالىنۋ ماسەلەلەرى جوسپارلى تۇردە شەشىلىپ جاتقاندىعىنىڭ تاعى ءبىر دالەلى ىسپەتتى», - دەپ مينيستر اتاپ ءوتتى. سونىمەن قاتار, جۇمىس ساپارى شەڭبەرىندە قورعانىس ءمينيسترى ۇلتتىق اسكەري-پاتريوتتىق ورتالىعىنىڭ فيليالىن اشۋ جانە اقتاۋ گارنيزونىندا اسكەري قىزمەتشىلەر مەن ولاردىڭ وتباسى مۇشەلەرىنە ارنالعان اسكەري گوسپيتال تۇرعىزۋ تۋرالى بىرقاتار شەشىم قابىلدادى.