ءاليحان بوكەيحاننىڭ قۇرمەتىنە شىققان مونەتا رەسمي تانىستىرىلادى

ەرتەڭ الاش كوسەمى, ءاليحان بوكەيحاننىڭ  قۇرمەتىنە ارنالعان سالتاناتتى شارانىڭ ءبىرى – قازاقستان رەسپۋبليكاسىنىڭ ۇلتتىق بانكى شىعارعان مەرەيتويلىق ەستەلىك مونەتانىڭ سالتاناتتى تانىستىرىلىم ءراسىمى وتەدى. الاشتانۋشى-عالىمدار مەن «اق جول» قدپ, قر ۇلتتىق بانكىنىڭ ۇيىمداستىرۋىمەن وتەتىن ايتۋلى شارا 18 قازان كۇنى  ساعات 12.00-دە استانا قالاسىنداعى سارايشىق كوشەسى №5 ۇيدە وتەدى. مونەتا الاش قوزعالىسىنىڭ جەتەكشىسى, الاشوردا ۇكىمەتىنىڭ توراعاسى اليحان بوكەيحاننىڭ تۋعانىنا 150 جىل تولۋىنا وراي ەستەلىك رەتىندە شىعارىلعان. «بۇل تانىستىرىلىم شاراسى – ءاليحان بوكەيحاننىڭ تۇلعالىق قاسيەتىن ايقىنداۋ ىسىنە قوسىلعان ۇلكەن ۇلەس. قازاق ايتادى: «تاسقا باسىلعان تاڭبا ەشقاشان وشپەيدى» دەپ. ءاليحان بوكەيحاننىڭ تۇلعالىق قىرى ەندى مىنە ۇلتتىق بانكتىڭ مەرەكەلىك مونەتاسىنا بەينەلەنىپ وتىر. بۇل دەگەنىڭىز – بولاشاق كۇندەرى ۇلتتىق مۋزەيلەر مەن كورمەلەرگە قويىلىپ, ءوزىنىڭ تاريحي قۇنىن ارتتىراتىن, ساپالى ءارى قۇندى, قىمباتتى ەكسپونات بولارى حاق. مونەتاعا ءاليحاننىڭ تۇلعالىق كەلبەتىن بەينەلەۋ دەگەنىمىز – ونىڭ تۇلعالىق قىرىن جاستار مەن جاسوسپىرىمدەرگە ناسيحاتتاۋ, تانىتۋ دەگەن ءسوز. قازاق ەلىنە شەت ەلدەن كەلەتىن قوناقتار, تۋريستەر ۇلتتىق بانكتىڭ شىعارىپ وتىرعان بۇل مونەتاسىن وزدەرىنە كادەسىي رەتىندە ساتىپ الىپ, قازاق ەلىنەن اكەلگەن تابەرىگىمىز دەپ ۇرپاقتارىنا ايتا جۇرەرى انىق» - دەيدى ۇيىمداستىرۋشىلاردىڭ ءبىرى, الاشتانۋشى ەلدوس توقتارباي.