تايلاندتاعى قازاقستان تۋريستەرىن اباي بولۋعا شاقىردى

تايلاندتاعى قايعىلى شارالارعا بايلانىستى قازاقستاننىڭ ينۆەستيتسيالار جانە دامۋ مينيسترلىگى قازاقستاندىق تۋريستەردەن قۇرمەت بەلگىسى رەتىندە سىپايى كيىنۋدى جانە ەل الدىندا كوڭىل كوتەرمەۋدى ءوتىندى. «قازاقستان رەسپۋبليكاسى ينۆەستيتسيالار جانە دامۋ مينيسترلىگى تۋريزم يندۋسترياسى دەپارتامەنتى تايلاندتاعى قازاقستاندىق تۋريستەردى قارالى كۇندەرى مونارحتارىن ازا تۇتقان تۇرعىندارعا قۇرمەت رەتىندە جابىق كيىنىپ, بايسالدىلىق تانىتۋعا, كوپشىلىك ورىنداردا كوڭىل كوتەرمەۋگە جانە قوعامدىق ورىنداردا تايلاند كورولدىك وتباسىنىڭ مۇشەلەرىن تالقىلاماۋعا شاقىردى. سونىمەن بىرگە, قر يدم تۋريزم يندۋسترياسى دەپارتامەنتى تايلاندقا تۋرلاردى جۇزەگە اسىراتىن تۋريستىك وپەراتورلاردان ەلدەگى قارالى كۇندەرى ءوزىن-ءوزى ۇستاۋ ەرەجەرىمەن كليەنتتەردى حاباردار ەتۋدى تاباندى تۇردە تالاپ ەتۋدە», - دەلىنگەن تۋريزم يندۋسترياسى دەپارتامەنتى ديرەكتورى مارات يگاليدىڭ حابارلاماسىندا. ەستەرىڭىزدە بولسا, 2016 جىلى 13 قازاندا تايلاند كورولى پحۋميپون ادۋليادەت 89 جاسقا قاراعان شاعىندا دۇنيەدەن وزدى. ول 70 جىلدان استام تاقتا وتىرىپ, قازىرگى زامانعى ەڭ ۇزاق بيلىكتە وتىرعان مونارح رەتىندە تاريحتا قالدى. ەلدە 1 جىل ازا تۇتۋ جاريالاندى. تايلاند پرەمەر-ءمينيسترى پرايۋت چان-وچا وتانداستارىن الداعى 30 كۇندە كەز كەلگەن ويىن-ساۋىق شارالارىنان اۋلاق بولۋعا شاقىردى. باسىلىمداردىڭ حابارلاۋىنشا, جەكە تۋريستىك ايماقتار مەن كەي دۇكەندەر جابىلعان. ەندى ءبىر دۇكەندەر ىشىمدىك ساتۋدى توقتاتتى. ازا تۇتۋ كەزىندە تايلاند تۋريستەرى مەيرامحانالار, بار, ساۋدا ورتالىقتارى سەكىلدى ويىن-ساۋىق تۇرلەرىنە قاتىستى ءتۇرلى شەكتەۋلەرگە كەز بولۋى مۇمكىن.